আমেৰিকাৰ সৈতে প্ৰস্তাৱিত বাণিজ্যিক চুক্তিক “জনবিৰোধী” আৰু “ৰাষ্ট্ৰীয় সাৰ্বভৌমত্ব বিৰোধী” বুলি অভিহিত কৰি কৃষক সংগঠনৰ একত্ৰিত মঞ্চ সংযুক্ত কিষাণ মৰ্চাই কেন্দ্ৰীয় বাণিজ্য আৰু উদ্যোগ মন্ত্ৰী পীয়ুষ গোৱেলক অপসাৰণৰ দাবীত এক নতুন কাৰ্যসূচী ঘোষণা কৰিছে।
১৭ ফেব্ৰুৱাৰীত অনুষ্ঠিত এক সংবাদমেলত এছ কে এমৰ নেতৃত্বই অভিযোগ কৰে যে গোৱেলে “কৃষি আৰু দুগ্ধ খণ্ড বহুজাতিক নিগমৰ বাবে মুকলি কৰি ভাৰতৰ আত্মনিৰ্ভৰশীলতা আৰু সাৰ্বভৌমত্বক বিসৰ্জন কৰিছে।”
সংগঠনটোৱে জনোৱা মতে, অহা ২৭ ফেব্ৰুৱাৰীৰ ভিতৰত দেশৰ সকলো ৰাজ্যৰ মুখ্যমন্ত্ৰী আৰু বিৰোধী নেতাৰ কাৰ্যালয়লৈ প্ৰতিনিধি দল প্ৰেৰণ কৰা হ’ব। সংসদৰ নতুন অধিৱেশন আৰম্ভ হোৱাৰ দিনা ৯ মাৰ্চত গাঁও পৰ্যায়ৰ বৈঠক আৰু প্ৰচাৰ সভা অনুষ্ঠিত কৰা হ’ব। একে সময়তে উচ্চ পদস্থ বিষয়ালৈ মুকলি পত্ৰ প্ৰেৰণ কৰা হ’ব, য’ত প্ৰধানমন্ত্ৰী নৰেন্দ্ৰ মোডীক আমেৰিকাৰ চুক্তিত স্বাক্ষৰ নকৰিবলৈ আহ্বান জনোৱা হ’ব।
চুক্তিখন প্ৰস্তুত কৰাৰ দায়িত্বত আছিল গোৱেল। চলিত মাহৰ আৰম্ভণিতে এই চুক্তিৰ কথা ঘোষণা কৰিছিল আমেৰিকাৰ ৰাষ্ট্ৰপতি ড’নাল্ড ট্ৰাম্পে। কৃষক সংগঠন আৰু কেইবাটাও বিৰোধী দলে এই প্ৰস্তাৱিত চুক্তিখন দেশৰ কৃষি অৰ্থনীতিৰ বাবে ক্ষতিকাৰক আৰু প্ৰত্যাহাৰ কৰা উচিত বুলি দাবী কৰিছে।
চুক্তি অনুসৰি ভাৰতীয় ৰপ্তানিৰ ওপৰত আমেৰিকাৰ ‘পাৰস্পৰিক শুল্ক’ ২৫ শতাংশৰ পৰা ১৮ শতাংশলৈ হ্ৰাস কৰা হ’ব। ইয়াৰ বিনিময়ত আমেৰিকাৰ সামগ্ৰীৰ ওপৰত ভাৰতৰ শুল্ক শূন্যলৈ হ্ৰাস কৰা হ’ব বুলি দাবী কৰা হৈছে। আমেৰিকা প্ৰশাসনৰ মতে, অতিৰিক্ত ২৫ শতাংশ শুল্কৰ পৰা হাত সাৰিবলৈ ভাৰতে ৰাছিয়াৰ পৰা তেল আমদানি বন্ধ কৰি পাঁচ বছৰৰ ভিতৰত প্ৰায় ৫০০ বিলিয়ন ডলাৰৰ আমেৰিকাৰ সামগ্ৰী ক্ৰয় কৰিবলৈ সন্মত হৈছে।
কৃষি খণ্ডক চুক্তিৰ পৰিসৰৰ বাহিৰত ৰখা হৈছে – এই কথা প্রথমে দাবী কৰিছিল শাসকীয় বিজেপি চৰকাৰে৷ কিন্তু পৰৱৰ্তী সংবাদমেলত গোৱেলে কয় যে ভাৰতীয় ৰপ্তানি আমেৰিকাৰ কপাহ বা অন্যান্য কেঁচামাল আমদানি কৰিলে ১৮ শতাংশ শুল্কৰ পৰা ৰেহাই পাব পাৰি। চুবুৰীয়া ৰাষ্ট্ৰ বাংলাদেশৰ সৈতে আমেৰিকাৰ চুক্তিৰ উদাহৰণ দি তেওঁ কয় যে যদি তাত আমেৰিকাৰ কপাহ ব্যৱহাৰ কৰা হয় তেন্তে ১৯ শতাংশ শুল্ক ৰেহাই দিয়া হয়।
এই মন্তব্যই কপাহ খেতিয়কক ক্ষুব্ধ কৰি তুলিছে। তেওঁলোকে কয় যে ইয়াৰ ফলত ভাৰতীয় কপাহ খেতিয়কসকলৰ স্বাৰ্থক সম্পূৰ্ণৰূপে আওকাণ কৰা হয় আৰু আমেৰিকাৰ ৰাষ্ট্ৰ সমৰ্থিত, যান্ত্ৰিক কৃষিৰ সৈতে প্ৰতিযোগিতা কৰাটো অসম্ভৱ হৈ পৰে। ইতিমধ্যে সমগ্ৰ দেশৰ লাখ লাখ কৃষকে কপাহ খেতিৰ ক্ষেত্ৰত নিজৰ অলাভজনক অৱস্থাৰ কথা প্ৰকাশ কৰিছে। বিভিন্ন প্ৰতিবেদনত প্ৰকাশ পাইছে যে বিগত দুটা দশকত বৃহৎ সংখ্যক কৃষকে পৰ্যাপ্ত চৰকাৰী সমৰ্থন আৰু সুৰক্ষাৰ অভাৱত আত্মহত্যা কৰিছে।
এছ কে এমৰ অন্যতম বৃহৎ সংস্থা অল ইণ্ডিয়া কিষাণ সভাই এক বিবৃতিত কয় যে, “আমেৰিকাৰ কেঁচা কপাহৰ আমদানিয়ে ঘৰুৱা কপাহৰ মূল্য আৰু অধিক হ্ৰাস কৰিব আৰু ঋণগ্ৰস্ত, আত্মহত্যাপ্ৰৱণ কপাহ খেতি কৰা অঞ্চলসমূহৰ সংকট তীব্ৰতৰ হ’ব।” এআইকেএছে অভিযোগ কৰে যে গোৱেলে আমেৰিকাৰ কপাহ খেতিয়কসকলৰ স্বাৰ্থ ফলপ্ৰসূভাৱে সুৰক্ষিত কৰি আছে, আনহাতে ভাৰতীয় কৃষকসকলে বৃদ্ধি পোৱা উৎপাদন ব্যয়ৰ সৈতে যুঁজি আছে আৰু নূন্যতম সহায়ক মূল্য (এমএছপি) লাভ কৰা নাই।
বিগত কেইবছৰমানৰ পৰা এছ কে এমৰ নেতৃত্বত আইনগতভাৱে স্বীকৃতিপ্ৰাপ্ত এম এছ পিৰ দাবীত কেইবাটাও দেশজোৰা আন্দোলন চলিছে। ১২ ফেব্ৰুৱাৰীত কৃষক সংগঠনসমূহেও কেন্দ্ৰীয় ট্ৰেড ইউনিয়নৰ আহ্বানত এক ঐতিহাসিক ধৰ্মঘটত অংশগ্ৰহণ কৰে। কৃষকসকলে আশংকা কৰিছে যে প্ৰস্তাৱিত বাণিজ্যিক চুক্তিখন কাৰ্যকৰী হ’লে ঘৰুৱা বজাৰত সুৰক্ষা হ্ৰাস পাব, উদ্যোগপতিসকলক আমেৰিকাৰ কপাহ আমদানি কৰিবলৈ উৎসাহিত কৰা হ’ব আৰু লাখ লাখ কৃষকক কৃষিৰ পৰা আঁতৰাই ৰাখিবলৈ বাধ্য কৰাব।
এই চুক্তি আৰু ইয়াৰ সম্ভাৱ্য প্ৰভাৱক লৈ ৰাজনৈতিক আৰু অৰ্থনৈতিক বিতৰ্ক তীব্ৰতৰ হৈ পৰিছে। এতিয়া এই চুক্তিৰ চৰ্ত চৰকাৰে আনুষ্ঠানিকভাৱে প্ৰকাশ কৰে নে নকৰে আৰু কৃষক সংগঠনৰ আন্দোলন কিমান দূৰলৈ যাব সেয়া লক্ষ্যনীয় হৈ পৰিব।
