ভাৰতীয় মূলৰ আমেৰিকান মহাকাশচাৰী অনিল মেননে আন্তঃৰাষ্ট্ৰীয় মহাকাশ কেন্দ্ৰলৈ এক আঠ মহীয়া গুৰুত্বপূৰ্ণ মহাকাশ অভিযান আৰম্ভ কৰিছে। এই অভিযানৰ সময়ছোৱাত তেওঁ কেইবাটাও অত্যাধুনিক বৈজ্ঞানিক পৰীক্ষা-নিৰীক্ষা চালাব যিবোৰে ভৱিষ্যতৰ গভীৰ মহাকাশ গৱেষণাত মানৱজাতিক সহায় কৰিব আৰু পৃথিৱীৰ জীৱন উপকৃত কৰিব পৰা প্ৰযুক্তিৰ বিকাশ ঘটাব। বাইকোনুৰ কছমড্ৰ’মৰ পৰা ছয়ূজ মহাকাশযানৰ জৰিয়তে আন দুজন ৰাছিয়ান মহাকাশচাৰী আন্না কিকিনা আৰু পিয়ট্ৰ’ ডুব্ৰভৰ সৈতে তেওঁ মহাকাশলৈ ৰাওনা হয়।
জৰুৰীকালীন চিকিৎসা আৰু এৰোস্পেচ চিকিৎসাৰ বিশেষজ্ঞ চিকিৎসক অনিল মেননে এই দীঘলীয়া অভিযানত কেৱল এজন গৱেষক হিচাপেই নহয়, বৰঞ্চ এজন পৰীক্ষামূলক ব্যক্তি হিচাপেও কাম কৰিব। মহাকাশৰ মধ্যাকৰ্ষণহীন পৰিৱেশে মানৱ শৰীৰত কেনে প্ৰভাৱ পেলায়, সেই বিষয়ে তেওঁৰ এই প্ৰবাসে গুৰুত্বপূৰ্ণ তথ্য প্ৰদান কৰিব। নাছা আৰু ইয়াৰ আন্তঃৰাষ্ট্ৰীয় সহযোগীসকলে চন্দ্ৰ আৰু মঙল গ্ৰহলৈ ভৱিষ্যতে কৰিবলগীয়া অভিযানৰ প্ৰস্তুতিৰ বাবে এই জ্ঞান অতি প্ৰয়োজনীয় হ’ব।
এই অভিযানৰ অন্যতম প্ৰধান পৰীক্ষা হ’ল কৃতিম বুদ্ধিমত্তা বা এআই চালিত আলট্ৰাচাউণ্ড স্কেনিঙৰ ব্যৱহাৰ। এই প্ৰযুক্তিয়ে মহাকাশচাৰীসকলক পৃথিৱীৰ চিকিৎসকৰ সহায় নোলোৱাকৈয়ে জটিল চিকিৎসা পৰীক্ষা কৰাত সহায় কৰিব। গভীৰ মহাকাশ অভিযানৰ সময়ত যোগাযোগৰ পলম হোৱাৰ বাবে লগে লগে পৰামৰ্শ লোৱাটো অসম্ভৱ হৈ পৰে, গতিকে এই ব্যৱস্থা তেতিয়া এক অপৰিহাৰ্য আহিলা হৈ পৰিব পাৰে। ইয়াৰ উপৰি মেননে মহাকাশত উন্নত মানৰ অৰ্ধপৰিবাহী বা ছেমিকণ্ডাক্টৰ নিৰ্মাণৰ সৈতে জড়িত পৰীক্ষাতো অংশ ল’ব। বিজ্ঞানীসকলৰ বিশ্বাস যে মহাকাশৰ ওজনহীন পৰিৱেশত কোনো খুঁত নথকা ছেমিকণ্ডাক্টৰ সামগ্ৰী উৎপাদন কৰিব পৰা যাব, যিয়ে পৃথিৱীৰ কম্পিউটাৰ আৰু যোগাযোগ ব্যৱস্থাক অধিক শক্তিশালী কৰিব।
সমগ্ৰ অভিযানৰ সময়ছোৱাত মানৱ শৰীৰৰ ক্ৰিয়াকলাপৰ ওপৰত বিশেষ চকু ৰখা হ’ব। ওজনহীনতাৰ ফলত তেজৰ প্ৰবাহ, হৃদযন্ত্ৰৰ কাৰ্যক্ষমতা আৰু সামগ্ৰিক স্বাস্থ্যৰ কি পৰিৱৰ্তন হয়, সেই বিষয়ে মেননে কেইবাটাও অধ্যয়নত ভাগ ল’ব। ইয়াৰ দ্বাৰা ভৱিষ্যতৰ মহাকাশচাৰীসকলক সুৰক্ষিত ৰাখিবলৈ উন্নত ব্যৱস্থা গঢ়ি তোলাত গৱেষকসকলক সহায় হ’ব। আন এক গুৰুত্বপূৰ্ণ পৰীক্ষা হ’ব বায়’প্ৰিণ্টিং বা জৈৱিক কলাৰ প্ৰস্তুতকৰণ। ইয়াৰ জৰিয়তে মানুহৰ বয়স বৃদ্ধিৰ প্ৰক্ৰিয়া আৰু বয়সৰ সৈতে জড়িত ৰোগৰ নতুন চিকিৎসা পদ্ধতিৰ বিষয়ে জানিব পৰা যাব।
অনিল মেননৰ অনন্য শিক্ষাগত আৰু পেছাদাৰী পটভূমিয়ে তেওঁক এই অভিযানৰ বাবে একেবাৰে উপযুক্ত কৰি তুলিছে। নাছাৰ মহাকাশচাৰী দলত যোগদান কৰাৰ পূৰ্বে তেওঁ এগৰাকী ফ্লাইট চাৰ্জন হিচাপে কাম কৰি মহাকাশচাৰী আৰু বাণিজ্যিক মহাকাশ অভিযানসমূহক চিকিৎসা সেৱা আগবঢ়াইছিল। আগন্তুক আঠমাহত তেওঁৰ এই অভিযানৰ পৰা সংগ্ৰহ কৰা তথ্যই মানৱ মহাকাশ যাত্ৰাক অধিক সুৰক্ষিত আৰু দীৰ্ঘম্যাদী কৰাৰ ক্ষেত্ৰত নাছাৰ প্ৰচেষ্টাক বহুখিনি আগুৱাই লৈ যাব। এই ফলাফলসমূহে আৰ্টেমিছ কাৰ্যসূচীৰ অধীনত চন্দ্ৰলৈ আৰু ভৱিষ্যতে মঙল গ্ৰহলৈ প্ৰথম মানৱ অভিযানৰ পৰিকল্পনাত গুৰুত্বপূৰ্ণ ভূমিকা পালন কৰিব।
