আমেৰিকাৰ হাৰ্ভাৰ্ড বিশ্ববিদ্যালয়ৰ সমীপত অবৈধভাৱে চলি আছিল এক অভিজাত দেহ ব্যৱসায়। দেশখনৰ আৰক্ষীয়ে তদন্ত কৰি ভাৰতীয় মূলৰ ব্যৱসায়ী অনুৰাগ বাজপেয়ীক গ্ৰেপ্তাৰ কৰিছে। অবৈধ পতিতালয়লৈ যোৱাৰ অভিযোগত আৰক্ষীয়ে তেওঁক গ্ৰেপ্তাৰ কৰে।
জানিব পৰা মতে, অনুৰাগ প্ৰযুক্তিৰ জৰিয়তে পানী বিশুদ্ধকৰণৰ কাম কৰা কোম্পানী ‘গ্ৰেডিয়েণ্ট’ৰ মুখ্য কাৰ্যবাহী বিষয়া আৰু সহ-প্ৰতিষ্ঠাপক আছিল। আমেৰিকাৰ পানী বিশুদ্ধকৰণ উদ্যোগৰ তেওঁ অন্যতম ডাঙৰ নাম।
সংবাদ মাধ্যমৰ বাতৰি অনুসৰি ‘দ্য কেম্ব্ৰিজ ব্ৰথেল হিয়াৰিংছ’ নামেৰে পৰিচিত এই গোচৰটোত ৩০ জনতকৈ অধিক বিশিষ্ট লোক জড়িত হৈ আছে। মেছাচুচেটছৰ কেম্ব্ৰিজৰ এটা উচ্চমানৰ এপাৰ্টমেণ্টত চলি থকা অবৈধ পতিতালয়ত বৃহৎ ধনৰ বিনিময়ত যৌনতা ক্ৰয় কৰাৰ অভিযোগ উঠিছে।
কিন্তু কি এই ‘কেম্ব্ৰিজ ব্ৰথেল গোচৰ’? দ্য ৱাল ষ্ট্ৰীট জাৰ্নেলৰ মতে, মেছাচুচেটছৰ কেম্ব্ৰিজৰ এটা উচ্চমানৰ এপাৰ্টমেণ্টত অবৈধভাৱে চলি থকা এই পতিতালয়টোৱে কৰ্পৰেট কাৰ্যবাহী, চৰকাৰী বিষয়া, চিকিৎসক, অধিবক্তাকে ধৰি অভিজাত ক্লায়েণ্টেসকলক যৌন পৰিসেৱা আগবঢ়াইছিল। কিন্তু সেই যৌন পৰিসেৱা পোৱাটোও কম সমস্যাজনক নাছিল। ইয়াৰ বাবে গ্ৰাহকে চৰকাৰী আইডি কাৰ্ড, অফিচৰ বেজ, আনকি ব্যক্তিগত সামগ্ৰীও জমা কৰিবলগীয়া হৈছিল।
জানিব পৰা মতে যৌন পৰিসেৱাৰ বাবে প্ৰতি ঘণ্টাত ৬০০ ডলাৰ (প্ৰায় ৫০ হাজাৰ টকা) পৰ্যন্ত লোৱা হৈছিল।
চৰকাৰী অধিবক্তা আৰু তদন্তকাৰীয়ে অভিযোগ কৰিছে যে যৌন পৰিসেৱা আগবঢ়োৱা বহু মহিলাক এছিয়াৰ পৰা আমেৰিকালৈ সৰবৰাহ কৰা হৈছিল। সমগ্ৰ বিষয়টোৰ ওপৰত তদন্ত আৰম্ভ কৰা হৈছে। অনুৰাগকে ধৰি বহু লোকক গ্ৰেপ্তাৰ কৰা হৈছে। আৰক্ষীৰ সূত্ৰ অনুসৰি চলি থকা আইনী প্ৰক্ৰিয়াৰ মূল লক্ষ্য হৈছে গ্ৰাহকৰ তালিকা আৰু তেওঁলোকৰ যোগাযোগৰ তথ্য বিতংভাৱে পৰীক্ষা কৰা।
জানিব পৰা মতে, ২০২৫ চনৰ আৰম্ভণিতে এই গোচৰত অনুৰাগক গ্ৰেপ্তাৰ কৰা হৈছিল। বষ্টন অঞ্চলত আৰক্ষীয়ে চলোৱা ষ্টিং অপাৰেচনৰ সময়ত তেওঁক গ্ৰেপ্তাৰ কৰা হৈছিল। অৱশ্যে সেই সময়ত বিষয়টো ৰাজহুৱা কৰা হোৱা নাছিল। শেহতীয়াকৈ প্ৰকাশ পোৱা আদালতৰ নথি-পত্ৰত অনুৰাগৰ নাম পোহৰলৈ আহিছে। অনুৰাগৰ লগতে আন কেইবাজনো মুখ্য কাৰ্যবাহী বিষয়াৰ নাম নথিত আছে। কিন্তু আটাইতকৈ বেছি চৰ্চা হৈছে অনুৰাগক কেন্দ্ৰ কৰি।
‘কেম্ব্ৰিজ ব্ৰথেল কেচ’ পোহৰলৈ অহাৰ পিছত ভাৰতীয় মূলৰ ব্যৱসায়ী অনুৰাগক লৈ ছ’চিয়েল মিডিয়াত ব্যাপক প্ৰতিক্ৰিয়াৰ সৃষ্টি হৈছে। তেওঁৰ বিষয়ে অধিক জানিবলৈ ইণ্টাৰনেটত চাৰ্চ কৰিবলৈ আৰম্ভ কৰিছে নেটিজেনসকলে।
ব্যৱসায়ী হিচাপেও অনুৰাগ সফল। তেওঁৰ নেতৃত্বত গ্ৰেডিয়েণ্ট এতিয়া সহস্ৰ কোটি টকাৰ কোম্পানীত পৰিণত হৈছে। কোম্পানীটোৱে ২৫খনতকৈও অধিক দেশত কাম কৰে। বিশ্বজুৰি তেওঁলোকৰ ২৫০০ৰো অধিক কাৰ্যালয় আছে। গ্ৰেডিয়েণ্টে অৰ্ধপৰিবাহী, ঔষধ, খনি, আৰু খাদ্য তথা পানীয়ৰ দৰে উদ্যোগসমূহক বিশুদ্ধ পানী বিশুদ্ধকৰণ সেৱা প্ৰদান কৰে।
অনুৰাগৰ জন্ম ভাৰতত। অনুৰাগৰ লিংকডইন প্ৰফাইলৰ মতে, লক্ষ্ণৌৰ লা মাৰ্টিনিয়েৰৰ পৰাই তেওঁ স্কুলীয়া শিক্ষা সম্পূৰ্ণ কৰিছিল। ২০০৬ চনত মিছৌৰী-কলম্বিয়া বিশ্ববিদ্যালয়ৰ পৰা মেকানিকেল ইঞ্জিনিয়াৰিঙৰ ডিগ্ৰী লাভ কৰা অনুৰাগে এম আই টিত নামভৰ্তি কৰে। তাৰ পিছত তেওঁ কেতিয়াও পিছলৈ ঘূৰি চোৱা নাই।
সেই অনুৰাগেই হৈছে যৌন কেলেংকাৰীত অভিযুক্ত। ক্ৰমাৎ সমালোচনা আৰু বিতৰ্কৰ মাজতে গ্ৰেডিয়েণ্ট কোম্পানীটোৰ পৰা তেওঁৰ পদত্যাগৰ দাবী উত্থাপন হৈছে। যদিও কোম্পানীটোৱে ৰাজহুৱাভাৱে মুখ্য কাৰ্যবাহী বিষয়াৰ কাষত থিয় দিছে।
গ্ৰেডিয়েণ্টে এক বিবৃতিত কয় যে আমি ন্যায় ব্যৱস্থাত বিশ্বাস কৰোঁ আৰু এই সমস্যাটো যথাসময়ত আৰু সৌহাৰ্দ্যপূৰ্ণভাৱে সমাধান হ’ব বুলি আত্মবিশ্বাসী। গ্ৰেডিয়েণ্টে প্ৰযুক্তিগত উদ্ভাৱনৰ ক্ষেত্ৰত উৎকৃষ্টতাৰ বাবে চেষ্টা অব্যাহত ৰাখিব আৰু সমাজৰ সকলো স্তৰতে বিশুদ্ধ পানীৰ সুবিধা নিশ্চিত কৰিব।
