অৰুণাচল প্ৰদেশ চীনৰ অংশ। এই যুক্তিতে চাংহাই বিমানবন্দৰত এগৰাকী ভাৰতীয় যুৱতীক হাৰাশাস্তি কৰা অভিযোগ উঠিছে। দীৰ্ঘসময় ধৰি যুৱতীগৰাকীক আটক কৰি ৰখা হয়। আনকি বিমানবন্দৰ কৰ্তৃপক্ষই তেওঁৰ পাছপ’ৰ্টো অবৈধ বুলি প্ৰমান কৰিবলৈ চেষ্টা কৰিছিল।
২১ নৱেম্বৰত সংঘটিত হয় এই ঘটনা। সেইদিনা লণ্ডনৰ পৰা জাপানলৈ গৈ আছিল প্ৰেমা ৱাংজাম থংডক। জাপান অভিমুখী বিমানখনে ছাংহাই পুডং বিমানবন্দৰত তিনি ঘণ্টীয়া বিৰতি লৈছিল। সেই সময়তে অৰুণাচল প্ৰদেশৰ ভাৰতীয় নাগৰিক প্ৰেমা ৱাংজাম থংডকক হাৰাশাস্তি কৰা হয়।
প্ৰেমাই অভিযোগ কৰে যে ইমিগ্ৰেচন কাউণ্টাৰৰ বিষয়াসকলে তেওঁৰ পাছপ’ৰ্ট ‘অবৈধ’ বুলি ঘোষণা কৰে। ছাংহাই পুডং বিমানবন্দৰ কৰ্তৃপক্ষই দাবী কৰে যে অৰুণাচল প্ৰদেশ চীনৰ অংশ।
বৰ্তমান প্ৰেমা লণ্ডনত থাকে যদিও এতিয়াও ভাৰতীয় নাগৰিক। প্ৰেমা ৱাংজাম থংডকে সংবাদ মাধ্যমৰ আগত কয়, “ইমিগ্ৰেচনৰ পিছত মই মোৰ পাছপ’ৰ্ট জমা দি নিৰাপত্তাৰক্ষীৰ ওচৰত ৰৈ আছিলো। ঠিক তেতিয়াই এজন বিষয়া আহি মোৰ নাম লৈ ‘ভাৰত, ভাৰত’ বুলি চিঞৰিবলৈ ধৰিলে আৰু মোক এফালে থিয় হ’বলৈ ক’লে। তেওঁ কিয় এনে আচৰণ কৰি আছে? মই সোধাত তেওঁ মোক ইমিগ্ৰেচন ডেস্কলৈ লৈ গৈ ক’লে, ‘অৰুণাচল, বৈধ পাছপ’ৰ্ট নহয়।’
ভাৰতীয় পাছপ’ৰ্ট কিয় বৈধ নহয়? বিমানবন্দৰৰ ইমিগ্ৰেচন বিষয়াগৰাকীক সোধাত প্ৰেমাক কয়, “অৰুণাচল চীনৰ এটা অংশ। আপোনাৰ পাছপ’ৰ্ট অবৈধ।”
প্ৰেমাই জনায় যে বিষয়টো বুজাই দিয়াৰ পিছতো বিমানবন্দৰ কৰ্তৃপক্ষই মানি ল’বলৈ ইচ্ছুক নাছিল। ইয়াৰ বিপৰীতে ভাৰতীয় যুৱতীগৰাকীয়ে দাবী কৰে যে তেওঁক বিভিন্ন যুক্তিৰে বিপথে পৰিচালিত কৰা হৈছিল।
তেওঁৰ মতে, যোৱা বছৰ ছাংহাইৰ মাজেৰে কোনো সমস্যা নোহোৱাকৈ ট্ৰেনজিট কৰিছিল আৰু লণ্ডনত থকা চীনৰ দূতাবাসে আশ্বাস দিছিল যে ভাৰতীয়সকলে চাংহাইৰ মাজেৰে যাত্ৰা কৰাত কোনো সমস্যা নহ’ব।
প্ৰেমাই লগতে অভিযোগ কৰে যে একাধিক ইমিগ্ৰেচন বিষয়া আৰু চাইনা ইষ্টাৰ্ণ এয়াৰলাইন্সৰ কৰ্মচাৰীয়ে তেওঁক সোধা-পোছা কৰাৰ সময়ত তেওঁক উপহাস কৰিছিল, তেওঁক লৈ হাঁহিছিল আৰু আনকি তেওঁক “চীনা পাছপ’ৰ্টৰ বাবে আবেদন কৰক” বুলিও পৰামৰ্শ দিছিল। ১৮ ঘণ্টা ধৰি তেওঁক বিমানবন্দৰৰ ভিতৰত ৰখা হৈছিল, এই সময়ছোৱাত তেওঁ দাবী কৰিছিল যে তেওঁক স্পষ্ট তথ্য, উপযুক্ত খাদ্য বা বিমানবন্দৰৰ সুবিধাৰ পৰা বঞ্চিত কৰা হৈছিল।
প্ৰেমাই অভিযোগ কৰে যে তেওঁৰ পাছপ’ৰ্ট ৰখা হৈছিল আৰু বৈধ ভিছা থকাৰ পিছতো তেওঁক জাপানলৈ যোৱা পৰৱৰ্তী বিমানত উঠাত বাধা দিয়া হৈছিল।
ট্ৰেনজিট এৰিয়াত আৱদ্ধ হৈ থকা প্ৰেমাই টিকট পুনৰ বুকিং কৰিব, খাদ্য কিনিব বা এটা টাৰ্মিনেলৰ পৰা আনটো টাৰ্মিনেলৰ মাজত যাব পৰা নাছিল। তেওঁ লগতে দাবী কৰে যে বিষয়াসকলে তেওঁক চাইনা ইষ্টাৰ্ণত নতুন টিকট কিনিবলৈ হেঁচা প্ৰয়োগ কৰিছিল আৰু ইয়াৰ পিছতহে তেওঁৰ পাছপ’ৰ্ট ঘূৰাই দিয়া হ’ব বুলি ইংগিত দিছিল। ইয়াৰ ফলত বিমান সেৱা আৰু হোটেল বুকিং বাদ পৰাৰ বাবে আৰ্থিক লোকচান হয়।
অৱশেষত ব্ৰিটেইনত থকা বন্ধু এজনৰ জৰিয়তে প্ৰেমাই ছাংহাইত থকা ভাৰতীয় কনছুলেটত উপস্থিত হ’বলৈ সক্ষম হয়। পিছত ভাৰতীয় বিষয়াসকলে তেওঁক চীনৰ চহৰখনৰ পৰা মাজ নিশা পুনৰ বিমানত উঠাই দিয়ে।
ভাৰতীয় যুৱতী প্ৰেমা ৱাংজাম থংডকে এই ঘটনাক অপমান বুলি অভিহিত কৰিছে। প্ৰধানমন্ত্ৰী নৰেন্দ্ৰ মোডী আৰু জ্যেষ্ঠ বিষয়াসকললৈ এখন পত্ৰ লিখি ইয়াক ভাৰতৰ সাৰ্বভৌমত্ব আৰু অৰুণাচল প্ৰদেশৰ নাগৰিকক প্ৰত্যক্ষভাৱে অপমান কৰা বুলি অভিহিত কৰিছে।
এই বিষয়টো বেইজিঙৰ সৈতে উত্থাপন কৰি শাস্তিমূলক ব্যৱস্থা আৰু ক্ষতিপূৰণৰ বাবে হেঁচা প্ৰয়োগ কৰিবলৈ ভাৰত চৰকাৰক আহ্বান জনাইছে প্ৰেমাই। অৰুণাচল প্ৰদেশৰ ভাৰতীয়সকলে যাতে ভৱিষ্যতে আন্তঃৰাষ্ট্ৰীয় ভ্ৰমণৰ সময়ত এনেধৰণৰ বাধাৰ সন্মুখীন নহয় তাৰ নিশ্চয়তা বিচাৰিছে যুৱতীগৰাকীয়ে।
