ভাৰতীয় ৰে’লৱেত বৰ্তমান বিভিন্ন পৰ্যায়ত কেইবালাখ পদ খালী হৈ আছে। এই কৰ্মচাৰীৰ সমস্যাৰ প্ৰতি লক্ষ্য ৰাখি এই পদসমূহ স্থায়ী নিযুক্তিৰ পৰিৱৰ্তে ঠিকাভিত্তিকভাৱে অৱসৰপ্ৰাপ্ত কৰ্মচাৰীৰে পূৰণ কৰাৰ সিদ্ধান্ত গ্ৰহণ কৰিছে। এই পদ্ধতিৰ লক্ষ্য হৈছে কাৰ্য্যকৰী খৰচ হ্ৰাস কৰাৰ বাবে এই সিদ্ধান্ত গ্ৰহণ কৰা হৈছে বুলি সদৰী কৰিছে কৰ্তৃপক্ষই। নিবনোৱা তথা শ্ৰমিক সংগঠনসমূহে চৰকাৰৰ এই সিদ্ধান্তৰ তীব্ৰ বিৰোধিতা কৰিছে।
অন্যান্য কেন্দ্ৰীয় বিভাগ আৰু মন্ত্ৰালয়ৰ দৰেই ৰে’লৱেতো কৰ্মচাৰীৰ তীব্ৰ নাটনিৰ সন্মুখীন হৈছে, যাৰ ফলত যাত্ৰী সেৱাতো প্ৰভাৱ পৰিবলৈ আৰম্ভ কৰিছে। এই প্ৰত্যাহ্বানৰ সৈতে মোকাবিলা কৰিবলৈ ভাৰতীয় ৰে’লৱেই ৬৫ বছৰৰ তলৰ অৱসৰপ্ৰাপ্ত কৰ্মচাৰীসকলক তেওঁলোকৰ শাৰীৰিক ফিটনেছৰ মূল্যায়ন অৱসৰৰ পূৰ্বে পাঁচ বছৰৰ প্ৰদৰ্শনৰ পৰ্যালোচনাৰ ভিত্তিত দুবছৰৰ চুক্তিত পুনৰ নিযুক্তি দিয়াৰ পৰিকল্পনা কৰিছে। আৰু প্ৰতিটো ৰে’লৱে জ’নৰ জেনেৰেল মেনেজাৰসকলক এই নিযুক্তিপ্ৰদান কৰিবলৈ ক্ষমতা প্ৰদান কৰা হৈছে। এই ক্ষমতাত নিয়োজিত অৱসৰপ্ৰাপ্ত কৰ্মচাৰীসকলক “স্বেচ্ছাসেৱক” বুলি কোৱা হ’ব। ২০ জুনত জাৰি কৰা গাইডলাইনৰ জৰিয়তে এই নীতি আনুষ্ঠানিকভাৱে ঘোষণা কৰা কৰিছে।
বাওঁপন্থী ট্ৰেড ইউনিয়ন চিটিইউ আৰু সৰ্বভাৰতীয় ট্ৰেড ইউনিয়ন কংগ্ৰেছকে ধৰি ৰে’লৱে ইউনিয়নসমূহে এই সিদ্ধান্তক লৈ উদ্বেগ প্ৰকাশ কৰি কয় যে বিগত দশক বা তাতোকৈ অধিক সময় ধৰি এই ব্যৱস্থাটো প্ৰয়োজনীয় প্ৰায় আধা কৰ্মচাৰীৰে চলি আহিছে। তেওঁলোকৰ মতে অৱসৰপ্ৰাপ্তসকলক নিযুক্তি দিলে কৰ্মশক্তিৰ ভিতৰত বয়সৰ ভাৰসাম্য বিঘ্নিত হ’ব পাৰে। যদিও খৰচ হ্ৰাস কৰা হৈছে ইয়াৰ উদ্দেশ্য, অৱসৰপ্ৰাপ্তসকলে অতিৰিক্ত সুবিধা অবিহনে কেৱল দৰমহাহে লাভ কৰিব নেকি বুলি সমালোচকসকলে যুক্তি আগবঢ়ায়। এই পদ্ধতিয়ে এই খণ্ডত সুযোগ বিচৰা নিবনুৱা যুৱক-যুৱতীসকলৰ প্ৰয়োজনীয়তাক আওকাণ কৰিব পাৰে।
ৰে’লৱেত বৰ্তমান কৰ্মচাৰীৰ প্ৰত্যাহ্বানসমূহ উল্লেখযোগ্য। কম সংখ্যক কৰ্মীৰে কাম চলাব লগিয়া হোৱাৰ বাবে শেহতীয়াকৈ ৰে’ল দুৰ্ঘটনা বৃদ্ধি পাইছে বুলি ক’ব পাৰি। এইদৰে অৱসৰপ্ৰাপ্ত কৰ্মী নিযুক্তিৰ কৌশল সুৰক্ষা আৰু সেৱাৰ দক্ষতা বৃদ্ধিৰ বাবে ৰচনা কৰা হৈছে। কিন্তু ই নতুন, স্থায়ী নিযুক্তিৰ ক্ষেত্ৰত প্ৰশ্ন উত্থপিত হৈছে।
