হিন্দুস্তান এৰোনটিক্স লিমিটেড (HAL) আৰু জিই এৰোস্পেচে এক বৃহৎ পদক্ষেপ গ্ৰহণ কৰিছে। যোৱা শুকুৰবাৰে, দুয়োটা সংস্থাই ১১৩টা এফ৪০৪-জিই-আইএন২০ জেট ইঞ্জিন ক্ৰয় কৰাৰ বাবে চুক্তি স্বাক্ষৰ কৰে। এই চুক্তিয়ে ভাৰতৰ দেশীয় প্রযুক্তিত নিৰ্মিত তেজস যুদ্ধ বিমানৰ উৎপাদনত এক বিশেষ সুবিধা প্ৰদান কৰিব।
সাম্প্রতিক সময়ত দুয়োখন দেশৰ শুল্ক উত্তেজনাৰ মাজতে এই গুৰুত্বপূর্ণ প্ৰতিৰক্ষা চুক্তি স্বাক্ষৰিত হয়।
কিছুদিন আগতে, ভাৰত চৰকাৰে HAL-ৰ সৈতে ৯৭খন উন্নতমানৰ তেজস ক্ৰয়ৰ বাবেও চুক্তি কৰিছে। এই নতুন ইঞ্জিনৰ চুক্তিয়ে সেই তেজস বিমানসমূহ সময়মতে যোগান ধৰাত গুৰুত্বপূর্ণ ভূমিকা ল’ব।
জানিব পৰা মতে, জিই এৰোস্পেচে ২০২৭ চনৰ পৰা ২০৩২ চনৰ ভিতৰত এই ইঞ্জিন আৰু অন্যান্য প্রয়োজনীয় পেকেজ ভাৰতক যোগান ধৰিব।
৯৭খন উন্নতমানৰ তেজস ক্ৰয়ৰ আনুমানিক মূল্য প্রায় ৬৫ হাজাৰ কোটি টকা। যুদ্ধবিমানসমূহ HAL-ৰ ডিজাইন মতে নিৰ্মাণ কৰা হ’ব।
প্রায় চাৰি দশকৰ পাছত ভাৰতীয় বায়ুসেনাৰ পৰা মিগ-২১ (MiG-21) যুদ্ধ বিমানে অৱসৰ লৈছে। ইয়াৰ পাছতে বায়ুসেনাত এই স্থান কোনে পূৰণ কৰিব, সেই প্রশ্ন উত্থাপিত হৈছিল। বিশ্লেষকসকলৰ ধাৰণা সঁচা প্রমাণিত কৰি, দেশীয় প্রযুক্তিত নিৰ্মিত তেজস ফাইটাৰ জেটে এই শূন্যস্থান পূৰণ কৰিবলৈ আগবাঢ়ি আহিছে।
অৱশ্যে, তেজস নিৰ্মাণৰ ক্ষেত্ৰত HAL-এ বাৰে বাৰে সমস্যাৰ সন্মুখীন হৈছে, যাৰ মূল কাৰণ আছিল ইঞ্জিনৰ অভাৱ। ইয়াৰ পাছতে ভাৰত চৰকাৰে ইঞ্জিন লাভ কৰাৰ বাবে উদ্যোগ লয়।
শেহতীয়াকৈ মালয়েছিয়াত দুয়োখন দেশৰ প্ৰতিৰক্ষামন্ত্ৰীসকলৰ এক বৈঠকত এই চুক্তি স্বাক্ষৰ কৰা হয়।
