প্ৰধানমন্ত্ৰী নৰেন্দ্ৰ মোদীয়ে শনিবাৰে মালয়েছিয়াত উপস্থিত হৈ দেশখনৰ সৈতে ভাৰতৰ সম্পৰ্ক অধিক শক্তিশালী কৰাৰ এক গুৰুত্বপূৰ্ণ পদক্ষেপ গ্ৰহণ কৰিছে। কুৱালালামপুৰত ভাৰতীয় প্ৰব্ৰজনকাৰীসকলক সম্বোধন কৰি তেওঁ ঘোষণা কৰে যে ভাৰতৰ জনপ্ৰিয় ডিজিটেল পেমেণ্ট প্লেটফৰ্ম ইউপিআই অতি সোনকালে মালয়েছিয়াত আৰম্ভ কৰা হ’ব। ২০২৬ চনৰ নিজৰ প্ৰথমটো বিদেশ ভ্ৰমণৰ বাবে মালয়েছিয়াক নিৰ্বাচন কৰি প্ৰধানমন্ত্ৰীগৰাকীয়ে দুয়োখন দেশৰ মাজত থকা অৰ্থনৈতিক, প্ৰতিৰক্ষা আৰু সাংস্কৃতিক সম্পৰ্কক এক নতুন মাত্ৰা প্ৰদান কৰিছে। ২০২৪ চনত দুয়োখন দেশৰ মাজত গঢ়ি উঠা ব্যাপক কৌশলগত অংশীদাৰিত্বক এই ভ্ৰমণে অধিক গতিশীল কৰিব বুলি ধাৰণা কৰা হৈছে।
অনুষ্ঠানত ভাষণ দি প্ৰধানমন্ত্ৰীয়ে মালয়েছিয়াত বসবাস কৰা ভাৰতীয় মূলৰ লোকসকলৰ বাবে কেইবাটাও সুখবৰ প্ৰদান কৰে। তেওঁ জনাইছে যে ভাৰত চৰকাৰে অলপতে লোৱা এক ঐতিহাসিক সিদ্ধান্ত অনুসৰি এতিয়াৰে পৰা মালয়েছিয়াৰ ভাৰতীয় মূলৰ নাগৰিকসকলে ষষ্ঠ প্ৰজন্মলৈকে অ’চিআই কাৰ্ডৰ সুবিধা লাভ কৰিব। ইয়াৰ জৰিয়তে ভাৰতীয় মূলৰ লোকসকলৰ নিজৰ শিপাৰ সৈতে থকা সম্পৰ্ক অধিক গাঢ় হ’ব। প্ৰধানমন্ত্ৰীয়ে কয় যে ভাৰতে সদায় তেওঁলোকক মুকলি মনেৰে আদৰণি জনাবলৈ সাজু হৈ আছে।
প্ৰধানমন্ত্ৰী মোদীয়ে মালয়েছিয়াৰ প্ৰধানমন্ত্ৰী আনোৱাৰ ইব্ৰাহিমৰ সৈতে থকা তেওঁৰ মধুৰ ব্যক্তিগত সম্পৰ্কৰ কথাও উল্লেখ কৰে। তেওঁ কয় যে যোৱা বছৰ আছিয়ান সন্মিলনত উপস্থিত থাকিব নোৱাৰি তেওঁ মালয়েছিয়ালৈ অহাৰ যি প্ৰতিশ্ৰুতি দিছিল, সেই প্ৰতিশ্ৰুতি ৰক্ষা কৰিবলৈকে তেওঁ ২০২৬ চনৰ আৰম্ভণিতে ইয়ালৈ আহিছে। মালয়েছিয়াৰ প্ৰধানমন্ত্ৰীয়ে তেওঁক আদৰিবলৈ বিমানবন্দৰলৈ যোৱা আৰু সভাস্থলীলৈ নিজে সংগ দিয়া কাৰ্যক মোডীয়ে ভাৰতৰ প্ৰতি থকা সন্মানৰ নিদৰ্শন বুলি অভিহিত কৰে। আনহাতে আনোৱাৰ ইব্ৰাহিমেও মোডীক এজন মহান বন্ধু বুলি অভিহিত কৰি তেওঁৰ সংগ্ৰামী জীৱনৰ প্ৰশংসা কৰে।
সাংস্কৃতিক দিশৰ ওপৰত আলোকপাত কৰি প্ৰধানমন্ত্ৰীয়ে ৮০০ গৰাকী নৃত্যশিল্পীয়ে একেলগে প্ৰদৰ্শন কৰা এক বৰ্ণিল কাৰ্যসূচীৰ ভূয়সী প্ৰশংসা কৰে। তেওঁ কয় যে মালয়েছিয়াত ভাৰতীয় খাদ্য, ভাষা আৰু চিনেমাৰ জনপ্ৰিয়তাই প্ৰমাণ কৰে যে দুয়োখন দেশৰ মাজত এক গভীৰ সাংস্কৃতিক মিল আছে। বিশেষকৈ মালয়েছিয়াৰ প্ৰধানমন্ত্ৰীৰ তামিল গীতৰ প্ৰতি থকা অনুৰাগৰ কথাও তেওঁ উল্লেখ কৰে। এই ভ্ৰমণৰ সময়তে ভাৰতে বিতৰ্কিত ধৰ্ম প্ৰচাৰক জাকিৰ নাইকৰ প্ৰত্যাৰ্পণৰ সন্দৰ্ভতো মালয়েছিয়া চৰকাৰৰ সৈতে আলোচনা কৰাৰ সম্ভাৱনা আছে। মুঠৰ ওপৰত মোদীৰ এই ভ্ৰমণে ডিজিটেল লেনদেনৰ পৰা আৰম্ভ কৰি বাণিজ্যিক আৰু প্ৰতিৰক্ষা ক্ষেত্ৰলৈকে এক ইতিবাচক পৰিৱৰ্তন কঢ়িয়াই আনিব।
