নতুন দিল্লীৰ সমীপৰ গুৰগাঁৱত অসমৰ মৌচুমী গৌতম নামৰ ত্রিশ বছৰীয়া এগৰাকী বিবাহিতা মহিলাৰ ৰহস্যজনকভাৱে হোৱা মৃত্যুৰ ঘটনাই চাঞ্চল্যৰ সৃষ্টি কৰিছে।
জানিব পৰা মতে, ইণ্ডিগ’ এয়াৰ লাইন্স বিমান সেৱা কোম্পানীটোৰ কৰ্মচাৰী হিচাপে মৌচুমী গুৱাহাটীত কৰ্মৰত হৈ আছিল। মাত্ৰ বিশ দিনমান আগেয়ে প্ৰশিক্ষণৰ বাবে তেওঁ গুৰগাঁৱলৈ গৈছিল আৰু প্ৰশিক্ষণ সমাপ্ত কৰি শুকুৰবাৰে তেওঁ গুৱাহাটীলৈ ঘূৰি অহাৰ কথা আছিল। আৰক্ষীৰ সূত্ৰৰ পৰা জানিব পৰা মতে মহিলাগৰাকীৰ ঘৰ উজনি অসমৰ ডিব্ৰুগড়ত।
কিন্তু শুকুৰবাৰে ৰহস্যজনকভাৱে মৌচুমী গৌতমৰ মৃতদেহ উদ্ধাৰ হয়। বিগত বিশ দিন ধৰি তেওঁ বাস কৰি থকা ঘৰটোত ডিঙিত চিপ লৈ থকা অৱস্থাত প্ৰত্যক্ষ কৰি চুবুৰীয়াইআৰক্ষীক খবৰ দিয়ে।
আনহাতে, আৰক্ষী আহি ঘটনাস্থলীত উপস্থিত হৈ মৃতদেহটো চমজি লোৱাৰ লগতে মৌচুমীৰ পৰিয়ালৰ লোককো খবৰ দিয়ে। বৰ্তমান সমগ্ৰ বিষয়টো গুৰগাঁৱৰ ডি এল এফ ছেক্টৰ ২৯ থানাৰ আৰক্ষীয়ে তদন্ত কৰি আছে।
ইপিনে, আৰক্ষীয়ে তদন্তৰ খাতিৰত কোনো তথ্য সদৰী কৰিব বিচৰা নাই যদিও মৌচুমীৰ এনে আকস্মিক ৰহস্যজনক মৃত্যুৱে বিভিন্ন মহলত তীব্ৰ চাঞ্চল্যৰ সৃষ্টি কৰিছে।