বিশ্বজুৰি ক’ৰ’নাৰ ত্ৰাস আৰু সন্মুখত ঈদ-উল ফিটাৰ।
দেশৰ বিভিন্ন প্ৰান্তৰ লগতে ৰাজ্যতো বিভিন্ন প্ৰান্তত একাংশ ইছলাম ধৰ্মাৱলম্বী লোকে ক’ৰ’নাৰ ভয়াৱহতা পাহৰি বজাৰ-সমাৰ কৰিবলৈ ওলাই আহিছে।
তেওঁলোকে লগত কণ-কণ শিশু লৈ অহাৰ লগতে কাপোৰৰ দোকানসমূহত মানি চলা নাই কোনোধৰণৰ সামাজিক দূৰত্ব।
তাক লৈ চিন্তিত হৈ পৰিছে একাংশ সচেতন ইছলাম ধৰ্মাৱলম্বী লোক।
ডুবাইৰ পৰা অসমৰ ইছলাম ধৰ্মী লোকলৈ এক ভিডিঅ’ৰ জৰিয়তে বিশেষ আহ্বান জনাইছে জমিয়তৰ সভাপতি মৌলানা মুস্তাক আনফৰে।
তেওঁ কয়, ‘ঈদ সন্মুখত। আমি দেখা পাইছো আমাৰ কিছুমান মহিলাই ঈদৰ বজাৰ কৰাত ব্যস্ত। ল’কডাউনত কিছু শিথিলতা আহিছে কিন্তু ভাইৰাছৰ ত্ৰাস শেষ হোৱা নাই। ই কেতিয়া যাব কোনেও ক’ব নোৱাৰে।‘
‘আজি সংবাদ মাধ্যমত দেখিছো লগত ল’ৰা-ছোৱালী লৈ ঈদৰ বজাৰ কৰিবলৈ ওলাই গৈছে য’ত কোনোধৰণৰ সামাজিক দূৰত্ব মানি চলা নাই। আপোনাৰ ভুলৰ বাবে শিশু আৰু পৰিয়াললৈ ধ্বংস নামি আহিব পাৰে।‘ তেওঁ লগতে কয়।
ইছলাম ধৰ্মাৱলম্বী মহিলাসকলক অনুৰোধ জনাই তেওঁ কয়, ‘আল্লাই আমাক মুনিন বনাই পঠাইছে। এইসকল মানুহ প্ৰকৃত মুমিন হ’ব নোৱাৰে যিসকলৰ প্ৰতিবেশী ভোকত থাকিব আৰু আপুনি নিজে পেট ভৰাই খাব।‘
তেওঁ আৰু কয় ‘এই সংকটৰ সময়ত বহু লোক ভোকত মৃত্যুক সাৱটি লৈছে। এই সময়ত যদি ল’ৰা-ছোৱালীৰ কাৰণে কাপোৰ ক্ৰয় কৰাত ব্যস্ত থাকো তেন্তে আমি কি পৰিচয় দিম?’
এই ক’ৰ’নাৰ আতংকৰ মাজতে ঈদৰ আনন্দৰ সলনি জাতি-ধৰ্ম বৰ্ণ নিৰ্বিশেষে সকলো দৰিদ্ৰ লোকক সহায়ৰ বাবে তেওঁ আহ্বান জনায়।
‘এই সময়ত জাতি ধৰ্ম বৰ্ণ নিৰ্বিশেষে প্ৰতিবেশী দৰিদ্ৰ লোকক আৰ্থিক সহায় কৰিব লাগে।এই সময়ত ইয়াতকৈ ডাঙৰ পূণ্য একোৱেই নাই।‘ তেওঁ এইদৰে কয়।
ইপিনে, বৰপেটা অঞ্চলৰ সমাজকৰ্মী চাবেদ ভুঞাই নৰ্থ ইষ্ট নাওৰ জৰিয়তে অসমৰ সকলো ইছলাম ধৰ্মাৱলম্বী লোকলৈ আহ্বান জনাই কয়, ‘কোনো লোকে ঘৰৰ পৰা বাহিৰলৈ ওলাই ঈদৰ বজাৰ কৰিবলৈ নাযাব বা গ’লেও কেতিয়াও নিজৰ সৰু সৰু শিশু আৰু ৬০ বছৰৰ উৰ্দ্ধৰ লোকক লগত লৈ নাযাব।‘
তেওঁ লগতে আহ্বান জনাই কয়, ‘ৰাজহুৱা স্থানত থু-খেকাৰ নেপেলাব আৰু সামাজিক দূৰত্বৰ নীতি-নিৰ্দেশনা ভংগ নকৰিব। লগতে মাস্ক অবিহনে বাহিৰলৈ নোলাব।
তাৎপয্যপূৰ্ণভাৱে, এইটোৱেই আপোনালোকৰ জীৱনৰ শেষ ঈদ নহয় বুলি মন্তব্য কৰি ভুঞাই কয় ‘এইটো আমাৰ এইবৰ্ষৰ সৰ্বশ্ৰেষ্ঠ ত্যাগ বুলি বিবেচনা কৰক।‘