অহা ১৭ ফেব্ৰুৱাৰীত বাংলাদেশত অনুষ্ঠিত হ’বলগীয়া এক গুৰুত্বপূৰ্ণ অনুষ্ঠানলৈ ভাৰতৰ প্ৰধানমন্ত্ৰী নৰেন্দ্ৰ মোডীক আনুষ্ঠানিকভাৱে আমন্ত্ৰণ জনোৱা হৈছে। বাংলাদেশ জাতীয়তাবাদী দলৰ নৱনিৰ্বাচিত মুৰব্বী তাৰিক ৰহমানৰ শপত গ্ৰহণ অনুষ্ঠানত অংশগ্ৰহণৰ বাবে বাংলাদেশ চৰকাৰে এই আহ্বান জনাইছে। সংসদীয় নিৰ্বাচনত দুই তৃতীয়াংশ সংখ্যাগৰিষ্ঠতা লাভ কৰি বিএনপি ক্ষমতা দখল কৰাৰ পিছতে বাংলাদেশৰ অন্তৱৰ্তীকালীন উপদেষ্টা মহম্মদ ইউনুছে কূটনৈতিক মাধ্যমেৰে শনিবাৰে মোডীলৈ এই আমন্ত্ৰণ পত্ৰ প্ৰেৰণ কৰে। উল্লেখ্য যে নিৰ্বাচনৰ ফলাফল ঘোষণাৰ পাছতে মোডী আৰু ৰহমানৰ মাজত টেলিফোনিক বাৰ্তালাপো হৈছিল।
অৱশ্যে ১৭ ফেব্ৰুৱাৰীৰ এই আমন্ত্ৰণ প্ৰধানমন্ত্ৰী মোডীয়ে ৰক্ষা কৰাৰ সম্ভাৱনা অতি কম। ইয়াৰ মূল কাৰণ হৈছে সেইদিনা তেওঁৰ ভাৰতত কেইবাটাও পূৰ্বনিৰ্ধাৰিত গুৰুত্বপূৰ্ণ কাৰ্যসূচী আছে। সেইদিনা প্ৰধানমন্ত্ৰী মোডীয়ে মুম্বাইত ফ্ৰান্সৰ ৰাষ্ট্ৰপতি ইমানুৱেল মেক্ৰনৰ সৈতে এক দ্বিপাক্ষিক আলোচনাত মিলিত হ’ব। ইয়াৰ পাছতে তেওঁ দিল্লীত অনুষ্ঠিত হ’বলগীয়া কৃত্ৰিম বুদ্ধিমত্তা বা এআই ইমপেক্ট শীৰ্ষ সন্মিলনত অধ্যক্ষতা কৰিব। এনে ব্যস্ততাৰ বাবে মোডীয়ে নিজে উপস্থিত থকাৰ পৰিৱৰ্তে ভাৰতৰ হৈ এজন জ্যেষ্ঠ প্ৰতিনিধিক বাংলাদেশলৈ প্ৰেৰণ কৰাৰ সম্ভাৱনা আছে। এই ক্ষেত্ৰত উপ-ৰাষ্ট্ৰপতি চি পি ৰাধাকৃষ্ণন অথবা লোকসভাৰ অধ্যক্ষ ওম বিৰলাই ভাৰতক প্ৰতিনিধিত্ব কৰিব পাৰে।
বাংলাদেশৰ সংবাদ মাধ্যমৰ তথ্য অনুসৰি এই শপত গ্ৰহণ অনুষ্ঠানলৈ কেৱল ভাৰতকে নহয়, বৰঞ্চ বিশ্বৰ কেইবাখনো গুৰুত্বপূৰ্ণ দেশক আমন্ত্ৰণ জনোৱা হৈছে। ছাৰ্কভুক্ত দেশসমূহৰ ভিতৰত পাকিস্তান, নেপাল, ভূটান, শ্ৰীলংকা আৰু মালদ্বীপৰ নেতাসকলক আমন্ত্ৰণ জনোৱা হৈছে। ইয়াৰ উপৰিও চীন, চৌদি আৰব, তুৰ্কিয়ে, সংযুক্ত আৰব আমিৰশ্বাহী, কাটাৰ আৰু মালয়েছিয়াৰ দৰে প্ৰায় ১২খন দেশৰ প্ৰতিনিধিক এই অনুষ্ঠানলৈ নিমন্ত্ৰণ কৰা হৈছে। বিএনপিৰ বৈদেশিক পৰিক্ৰমা উপদেষ্টা হুমাইউন কোবিৰে জনোৱা মতে সকলো আঞ্চলিক নেতাৰ উপস্থিতিত এই অনুষ্ঠানটো অতি জাকজমকতাৰে আয়োজন কৰাৰ পৰিকল্পনা কৰা হৈছে।
আনহাতে দক্ষিণ এছিয়াৰ আন একাংশ নেতা ১৭ ফেব্ৰুৱাৰীৰ বাংলাদেশৰ এই কাৰ্যসূচীৰ পাছতে ভাৰত ভ্ৰমণৰো কথা আছে। শ্ৰীলংকাৰ ৰাষ্ট্ৰপতি অনুৰা কুমাৰ ডিছানায়াকে আৰু ভূটানৰ প্ৰধানমন্ত্ৰী শ্বেৰিং টবগেই ১৮ ফেব্ৰুৱাৰীত দিল্লীত অনুষ্ঠিত হ’বলগীয়া গোলকীয় এআই সন্মিলনত অংশ ল’বলৈ আহিব। সমান্তৰালভাৱে ফ্ৰান্সৰ ৰাষ্ট্ৰপতি মেক্ৰন ১৬ ফেব্ৰুৱাৰীতেই ভাৰতত উপস্থিত হ’ব আৰু ১৭ ফেব্ৰুৱাৰীত মুম্বাইৰ ৰাজভৱনত প্ৰধানমন্ত্ৰী মোডীৰ সৈতে আলোচনা কৰি দিল্লীলৈ ৰাওনা হ’ব। এনেদৰে ১৭ আৰু ১৮ ফেব্ৰুৱাৰীত বাংলাদেশ আৰু ভাৰত দুয়োখন দেশতে গুৰুত্বপূৰ্ণ আন্তঃৰাষ্ট্ৰীয় ৰাজনৈতিক সমীকৰণ দেখিবলৈ পোৱা যাব।
