১৯ ছেপ্তেম্বৰৰ পৰা ১০ নৱেম্বৰলৈকে য়ুনাইটেড আৰৱ এমিৰেটছ চমুকৈ য়ুএইত অনুষ্ঠিত হ’বলগীয়া আই পি এলৰ বাবে তুংগত উঠিছে প্ৰস্তুতি।
অৱশ্যে এইবাৰৰ আই পি এলৰ টাইটেল স্পনছৰাৰ পৰা ভিভোক আঁতৰোৱা বাবে কিছু সমস্যাৰ সন্মুখীন হৈছে বি চি চি আই।
এতিয়া বি চি চি আইয়ে নতুন স্পনছাৰৰ অনুসন্ধান আৰম্ভ কৰিছে আৰু ইয়াৰ বাবে ইতিমধ্যে কেইবাটাও কোম্পানি আগবাঢ়ি আহিছে বুলি জানিব পৰ গৈছে।
শেহতীয়াকৈ পোৱা খবৰ অনুসৰি ভিভোৰ পিছত এতিয়া মোবাইল কোম্পানি অপ্পোৰ বিজ্ঞাপন দেখা পোৱা নাযাব আই পি এলৰ মেচৰ সময়ত।
ভিভো, অপ্পোৰ উপৰি কেইবাটাও চীনা কোম্পানিৰ বিজ্ঞাপন ডিজিটেল প্লেটফৰ্মত দেখা পোৱা নাযাব।
উল্লেখ্য যে আই পি এল ২০১৯ত সৰ্বাধিক বিজ্ঞাপন দিয়া তালিকাৰ শীৰ্ষ দহৰ ভিতৰত আছিল ভিভো আৰু অপ্পো।
এটা মিডিয়া ৰিপ’ৰ্ট অনুসৰি ভিভো আৰু অপ্পোৱে যোৱা বছৰ আই পি এলত প্ৰায় ২৪০ কোটি টকা খৰচ কৰিছিল। বাৰ্কৰ ৰিপ’ৰ্ট মতে বিজ্ঞাপনৰ শীৰ্ষ দহৰ ভিতৰত আছিল এই দুটা চাইনীজ মোবাইল কোম্পানি।
অৱশ্যে এইবাৰৰ আই পি এল চলা সময়ত ভাৰতত ফেষ্টিভেল ছিজন আৰম্ভ হ’ব সেয়ে বিজ্ঞাপনৰ ক্ষেত্ৰত ব্ৰডকাষ্টাৰে বিশেষ অসুবিধাৰ সন্মুখীন নহয় বুলি ধাৰণা কৰা হৈছে।