আই পি এল ২০২৫-ৰ ১৮ সংখ্যক সংস্কৰণৰ যাত্ৰা এতিয়া অন্ত পৰাৰ দিশে। প্ৰায় আঢ়ৈ মাহজোৰা ৰোমাঞ্চকৰ যাত্ৰাৰ অন্তত কাইলৈ অনুষ্ঠিত হ’ব এই বৰ্ষৰ আই পি এলৰ অন্তিম পৰ্ব, অৰ্থাৎ ফাইনেল মেচ। কালিলৈ ফাইনেল মেচত অৱতীৰ্ণ হ’ব ৰয়েল চেলেঞ্জাৰ্ছ বাংগালুৰু আৰু পঞ্জাৱ কিংছ। এইবাৰ প্ৰথমবাৰৰ বাবে আই পি এলত ফাইনেল খেলাৰ সুযোগ লাভ কৰিছে দুয়োটা দলে। নিশ্চিতভাৱে দেখা যাব এক নতুন চেম্পিয়ন ।
এই বিশেষ দিনটোত ফাইনেল মেচ আৰম্ভ হোৱাৰ পূৰ্বে অনুষ্ঠিত হ’ব আই পি এল ২০২৫ৰ সামৰণি অনুষ্ঠান। স্বাভাৱিকভাৱে উদ্বোধনী অনুষ্ঠানৰ দৰেই সামৰণি অনুষ্ঠানটোলৈও অনুৰাগীৰ উচ্ছাস অভূতপূর্ব। বহু অনুৰাগীয়ে এই অনুষ্ঠানলৈ আশাৰে বাট চাই আছে।
সামৰণি অনুষ্ঠান কেতিয়াৰ পৰা, ক’ত অনুষ্ঠিত হ’ব–
পূৰ্বে নির্ধাৰিত সূচী অনুসৰি ফাইনেল মেচখন ২৫ মে’ত কলকাতাৰ ইডেন গাৰ্ডেনত অনুষ্ঠিত হোৱাৰ কথা আছিল। কিন্তু ভাৰত-পাকিস্তান সীমান্ত সংঘাতৰ পৰিপ্ৰেক্ষিতত প্ৰতিযোগিতাৰ সময়সূচী এক সপ্তাহৰ বাবে পিছুৱাই দিয়া হয়। নতুন সূচী অনুসৰি আই পি এল ২০২৫ৰ ফাইনেল আৰু সামৰণি অনুষ্ঠান ৩ জুন, আহমেদাবাদৰ নৰেন্দ্ৰ মোদী ষ্টেডিয়ামত অনুষ্ঠিত হ’ব।
বিচিচিআইৰ বিশেষ ঘোষণা: ভাৰতীয় সেনাক শ্ৰদ্ধাঞ্জলি–
বিচিচিআইৰ সচিব দেৱজিৎ শইকীয়াই এই অনুষ্ঠান সম্পৰ্কে এক গুৰুত্বপূর্ণ ঘোষণা কৰিছে। তেওঁ জনোৱা মতে, এইবাৰ আই পি এলৰ সামৰণি অনুষ্ঠানত ভাৰতীয় সেনাৰ তিনিজন জ্যেষ্ঠ বিষয়া আমন্ত্ৰিত হ’ব। লগতে, সেনাৰ প্ৰতি শ্ৰদ্ধাঞ্জলি জ্ঞাপন কৰা হ’ব এই অনুষ্ঠানৰ জৰিয়তে। যদিও এই বিষয়া সকলে অনুষ্ঠানত উপস্থিত থাকিব নে নাই, সেই বিষয়ে এতিয়ালৈকে নিশ্চিত তথ্য লাভ কৰা নাই।
আই পি এলৰ অফিচিয়েল এক্স (Twitter) হেণ্ডলত প্ৰকাশ কৰা অনুসৰি, এই সামৰণি অনুষ্ঠানত সংগীতৰ জৰিয়তে উজ্বল কৰি তুলিব দেশৰ বিখ্যাত সংগীতজ্ঞ শংকৰ মহাদেৱন আৰু তেওঁৰ দুই পুত্ৰ – সিদ্ধাৰ্থ মহাদেৱন আৰু শিৱম মহাদেৱনে। অনুষ্ঠান আৰম্ভ হ’ব সন্ধিয়া ৬ বজাৰ পৰা।
মূল আকৰ্ষণ: সংগীতৰে মুখৰ হ’ব সামৰণি সন্ধিয়া–
Live Streaming: ক’ত চাব পাৰিব-
আই পি এল ২০২৫ৰ সামৰণি অনুষ্ঠান ষ্টাৰ স্প’ৰ্টছ নেটৱৰ্কত লাইভ সম্প্রচাৰ হ’ব। লগতে, অনলাইন প্লেটফৰ্ম জিঅ’ হটষ্টাৰতো উপলব্ধ হ’ব অনুষ্ঠানটো।
সেইদৰে, আই পি এল ২০২৫ৰ শেষৰ দিনটোত মেচৰ উত্তেজনাৰ লগতে সংগীত, শ্ৰদ্ধাঞ্জলি আৰু উদ্দীপনাৰে পৰিপূৰ্ণ হ’ব সামৰণি অনুষ্ঠান। অনুৰাগীয়ে নিশ্চয়কৈ এক মনোমোহা সন্ধিয়া উপভোগ কৰিব বুলি আশা কৰিছে।
