ৰাজ্যৰ আৰক্ষী প্ৰশাসনত আজি ব্যাপক সালসলনি ঘটোৱা হয়। অসম আৰক্ষী বিভাগৰ এই নতুন সালসলনি অনুসৰি গুৱাহাটীৰ আৰক্ষী আয়ুক্ত হৰমীত সিঙক বদলি কৰি বিশেষ আৰক্ষী সঞ্চালক প্ৰধান (প্ৰশাসন) হিচাপে নিযুক্তি দিয়া হৈছে।
গৃহ আৰু ৰাজনৈতিক বিভাগৰ এক অধিসূচনা অনুসৰি ১৯৯২ চনৰ বেচৰ আই.পি.এছ. বিষয়া সিঙক লগতে বিশেষ আৰক্ষী সঞ্চালক প্ৰধান (সীমান্ত) হিচাপে নিযুক্তি দিয়া হ’ব।
হৰমীত সিঙৰ স্থানত অসম চৰকাৰ, গৃহ আৰু ৰাজনৈতিক আৰু তথ্য আৰু জনসংযোগ বিভাগৰ আয়ুক্ত আৰু সম্পাদক হিচাপে নিযুক্ত আই.পি.এছ. বিষয়া দিগন্ত বৰাক নিযুক্তি দিয়া হ’ব।
তেওঁলোকৰ লগতে আৰক্ষী উপ-আয়ুক্ত (পূব), গুৱাহাটীৰ পুলিচ কমিছনাৰেট হিচাপে নিযুক্ত সুধাকৰ সিঙক বদলি কৰি নলবাৰীৰ আৰক্ষী অধীক্ষক হিচাপে নিযুক্তি দিয়া হৈছে।
আনহাতে নলবাৰীৰ আৰক্ষী অধীক্ষক পবীন্দ্ৰ কুমাৰ নাথক বদলি কৰি নগাঁৱৰ জখলাবন্ধাৰ চেকোনীস্থিত ২য় এ এফ পি এফ বেটেলিয়নৰ কমাণ্ডেণ্ট হিচাপে নিযুক্তি দিয়া হয়।
তদুপৰি শিৱসাগৰৰ লিগিৰিপুখুৰীস্থিত ১নং এপিবিএন অধিনায়ক সুৰজীত সিং পানেছাৰক বদলি কৰি আৰক্ষী উপ-আয়ুক্ত (পূব) আৰু গুৱাহাটীৰ পুলিচ কমিছনাৰেট হিচাপে নিযুক্তি দিয়া হৈছে।