ইজৰাইল–ইৰান সংঘাতৰ প্ৰেক্ষাপটত পূৰ্বে বন্ধ হৈ থকা ইৰানৰ আকাশপথ একান্তভাৱে ভাৰতীয় ছাত্ৰ-ছাত্ৰীৰ উদ্ধাৰ অভিযানৰ বাবে মুকলি কৰা হৈছে। সংঘৰ্ষ পীড়িত ইৰানৰ বিভিন্ন চহৰত আবদ্ধ হৈ পৰা প্ৰায় ১,০০০ জন ভাৰতীয় ছাত্ৰ-ছাত্ৰীক অহা দুদিনৰ ভিতৰত দিল্লীলৈ ঘূৰাই অনা হ’ব বুলি সদৰী কৰিছে। এই উদ্ধাৰ অভিযানৰ প্ৰথম খন বিমান আজি নিশা ১১ বাজত দিল্লীত অৱতৰণৰ কথা, আৰু শনিবাৰে পুৱা আৰু সন্ধিয়া দ্বিতীয় খন বিমানো উপস্থিত হ’বহি।
ইজৰাইল আৰু ইৰানৰ মাজত চলি থকা ক্ষেপণাস্ত্ৰ বিনিময় আৰু ড্ৰোন আক্ৰমণৰ বাবে ইৰানৰ আকাশ মাৰ্গৰ অধিকাংশই আন্তঃৰাষ্ট্ৰীয় বিমান চলাচলৰ বাবে বন্ধ হৈ পৰিছিল। এই সংকটকালীন পৰিস্থিতিৰ মাজত ভাৰতীয় নাগৰিকসকলৰ বাবে এক বিশেষ বিমান কৰিডৰ সৃষ্টি কৰা হৈছে।
ইজৰাইলৰ “অপাৰেছন ৰাইজিং লায়ন”ৰ জৰিয়তে ইৰানৰ পাৰমাণৱিক স্থাপনাসমূহক লক্ষ্য কৰি কৰা আক্ৰমণৰ উত্তৰস্বৰূপে তেহৰাণে চলোৱা প্রত্যাক্রমণত সংঘাত তীব্ৰতৰ হৈ পৰে। এনে পৰিস্থিতিত নাগৰিকসকলৰ সুৰক্ষাৰ বাবে ভাৰতীয় চৰকাৰে বুধবাৰে ‘অপাৰেছন সিন্ধু’ আৰম্ভ কৰে।
ইৰানত বৰ্তমান প্ৰায় ৪,০০০ ভাৰতীয় নাগৰিক থাকে, যাৰ প্ৰায় অৰ্ধাংশ ছাত্ৰ-ছাত্ৰী। ইয়াৰে বহুতে তুৰ্কীৰ সীমান্তৰ কাষৰ পশ্চিম আজাৰবাইজান প্ৰদেশত অৱস্থিত উৰমিয়া মেডিকেল ইউনিভাৰ্ছিটিত অধ্যয়ন কৰি আছে, য’ত সাম্প্ৰতি পৰিস্থিতি ভয়াবহ হৈ পৰিছে।
চলিত সপ্তাহৰ আৰম্ভণিতে জম্মু-কাশ্মীৰৰ ১১০ জন ছাত্ৰ-ছাত্ৰীক ইৰানৰ উত্তৰাঞ্চলৰ পৰা আৰ্মেনিয়াৰ ইয়েৰেভানলৈ লৈ যোৱা হৈছিল। এই ছাত্ৰ-ছাত্ৰীসকলে ১৮ জুন ২:৫৫ বজাত ইয়েৰেভানৰ পৰা দিল্লীলৈ উৰামাৰে কৰে আৰু ১৯ জুনৰ পুৱা ভাৰতত উপস্থিত হয়।
ভাৰত চৰকাৰৰ বৈদেশিক পৰিক্ৰমা মন্ত্ৰালয়ে ইৰান আৰু আৰ্মেনিয়াৰ চৰকাক ধন্যবাদ জ্ঞাপন কৰি কয় যে বিদেশত থকা ভাৰতীয় নাগৰিকৰ সুৰক্ষা সৰ্বোচ্চ প্ৰাথমিকতা। ইৰাণৰ দিল্লীস্থিত দূতাবাসেও উল্লেখ কৰে যে ইৰানৰ বৈদেশিক মন্ত্ৰ্যালয়ে ভাৰতীয় কূটনৈতিকসকলৰ সৈতে একে-ধৰণৰ সহযোগিতাৰে কাম কৰি আছে।
