আমেৰিকাৰ ৰাষ্ট্ৰপতি ড’নাল্ড ট্ৰাম্পে প্ৰথমে ভাবিছিল যে এই যুদ্ধ চাৰি-পাঁচ সপ্তাহ ধৰি চলিব পাৰে। অৱশ্যে সোমবাৰে তেওঁ কয়, ‘তেওঁলোকৰ একো বাকী নাই। যুদ্ধ প্ৰায় শেষ হৈ গৈছে।’ ট্ৰাম্পৰ এই মন্তব্যৰ কেইঘণ্টামানৰ ভিতৰতে ইৰাণৰ ইছলামিক ৰিভল্যুচনেৰী গাৰ্ড কৰ্পে ইয়াৰ প্ৰত্যুত্তৰত এটা বিবৃতি প্ৰকাশ কৰি কয় যে, ‘যুদ্ধ কেতিয়া শেষ হ’ব সেইটো আমি নিৰ্ধাৰণ কৰিম। আন কোনোৱে নহয়।’
একে সময়তে তেওঁলোকে সকীয়াই দিছে যে আমেৰিকা আৰু ইজৰাইলক হৰমুজ প্ৰণালী মাজেৰে এক লিটাৰ তেলও পৰিবহণ কৰিবলৈ দিয়া নহ’ব। তদুপৰি, তেওঁলোকে আৰব আৰু ইউৰোপীয় দেশসমূহৰ বাবে বিশেষ চৰ্ত নিৰ্ধাৰণ কৰিছে।
ইছলামিক ৰিভল্যুচন গাৰ্ড কৰ্পছে বিবৃতিত স্পষ্টভাৱে কয়, ‘পশ্চিম এছিয়াৰ ভৱিষ্যত এতিয়া আমাৰ হাতত। আমেৰিকাৰ সামৰিক বাহিনীৰ হাতত একো নাই।’ ইয়াৰ পিছত তেওঁলোকে সতৰ্কবাণীমূলক সুৰত কয়, ‘যুদ্ধ কেতিয়া শেষ হ’ব আমি নিৰ্ধাৰণ কৰিম।’
ইৰাণৰ তেল নিয়ন্ত্ৰণ কৰাৰ ইংগিত দিছে ট্ৰাম্পে। তেওঁ কয়, ‘এই সম্ভাৱনা আছে। অতি প্ৰবল সম্ভাৱনা। কিন্তু এই বিষয়ে আলোচনা কৰাৰ সময় এতিয়াও হোৱা নাই।’ ইয়াৰ পিছতে ট্ৰাম্পে ভেনিজুৱেলাৰ প্ৰসংগ উত্থাপন কৰে। তেওঁ কয়, ‘ভেনিজুৱেলালৈ চাওক। যোৱা মাহতে আমি তেওঁলোকৰ পৰা ৮ কোটি ডলাৰৰ তেল লৈছিলো।’
পশ্চিম এছিয়াৰ যুদ্ধৰ বাবে বিশ্ব বজাৰত খাৰুৱা তেলৰ মূল্য দ্ৰুতগতিত বৃদ্ধি পাইছে। বিগত চাৰি বছৰত প্ৰথমবাৰৰ বাবে প্ৰতি বেৰেলৰ মূল্য ১১০ ডলাৰ হৈছেগৈ। বিশেষকৈ হৰমুজ প্ৰণালী কাৰ্যতঃ বন্ধ হোৱাৰ পিছত সমগ্ৰ বিশ্বতে তেলৰ যোগানক লৈ আতংক বিয়পি পৰিছে। এই সন্দৰ্ভত সকীয়াই দিয়ে ট্ৰাম্পে।
তেওঁ পোনপটীয়াকৈ কয়, ‘প্ৰয়োজন হ’লে আমি হৰমুজ প্ৰণালী দখল কৰিম। ইৰাণৰ বিৰুদ্ধে কঠোৰ ব্যৱস্থা গ্ৰহণ কৰা হ’ব।’ ইছলামিক ৰিভল্যুচনেৰী গাৰ্ড কৰ্পছেও ইয়াৰ প্ৰতিক্ৰিয়া প্ৰকাশ কৰিছে। তেওঁলোকে কয়, ‘আমি আমেৰিকা আৰু ইজৰাইলক এই অঞ্চলৰ পৰা এক লিটাৰ তেলও ল’বলৈ নিদিওঁ।’
অৱশ্যে ইছলামিক ৰিভল্যুচনেৰী গাৰ্ড কৰ্পে আৰব আৰু ইউৰোপীয় দেশসমূহক হৰমুজৰ মাজেৰে তেল টেংকাৰ লৈ যাবলৈ অনুমতি দিছে। কিন্তু এটা চৰ্তত। তেওঁলোকে কয়, যদি আৰব আৰু ইউৰোপীয় দেশসমূহে আমেৰিকা আৰু ইজৰাইলৰ ৰাষ্ট্ৰদূতক বহিষ্কাৰ কৰে, তেন্তে তেওঁলোকে হৰমুজৰ মাজেৰে মুক্তভাৱে তেল টেংকাৰ লৈ যাব পাৰিব। কোনো ধৰণৰ বাধা দিয়া নহয়।
