দীৰ্ঘ চাৰিটা দশকৰ অন্তত ইৰাকৰ ফুটবল দলে আকৌ এবাৰ বিশ্বৰ আটাইতকৈ ডাঙৰ প্ৰতিযোগিতা বিশ্বকাপৰ মঞ্চত খেলিবলৈ যোগ্যতা অৰ্জন কৰিছে। এই ডাঙৰ সফলতাৰ আঁৰত থকা আটাইতকৈ গুৰুত্বপূৰ্ণ খেলুৱৈগৰাকী হ’ল আয়মান হুচেইন। বলিভিয়াৰ বিৰুদ্ধে খেলা নিৰ্ণায়ক খেলখনত তেওঁৰ গ’লৰ সহায়তে ইৰাকে জয়লাভ কৰিছিল আৰু তেওঁক নিজ দেশত এজন জাতীয় নায়ক হিচাপে গণ্য কৰা হয়। কিন্তু সেই একেগৰাকী তাৰকা খেলুৱৈ আয়মানৰ সৈতে আমেৰিকাৰ বিমান বন্দৰত এজন সন্ত্ৰাসবাদীৰ দৰে ব্যৱহাৰ কৰাৰ ঘটনাই এতিয়া তীব্ৰ বিতৰ্কৰ সৃষ্টি কৰিছে।
স্পেইনৰ বিৰুদ্ধে প্ৰস্তুতিমূলক খেলখন খেলি ইৰাকৰ দলটোৱে আমেৰিকাত উপস্থিত হৈছিল। চিকাগোৰ বিমান বন্দৰত দলটো অৱতৰণ কৰাৰ পিছতে আয়মান হুচেইনক হাৰাশাস্তি কৰা আৰম্ভ হয়। দলৰ বাকীসকল খেলুৱৈক এৰি দিলেও আয়মানক আমেৰিকাৰ সুৰক্ষা কৰ্মীয়ে আটক কৰে। নিজৰ দেশৰ হৈ ৮৯ খন খেলত ৩২ টা গ’ল কৰা এই ত্ৰিশ বছৰীয়া খেলুৱৈ তথা দলৰ অধিনায়কগৰাকীক এটা সুকীয়া কোঠালৈ লৈ যোৱা হয় আৰু তাত তেওঁক দীৰ্ঘ সময় ধৰি সোধা-পোছা কৰা হয়। ইৰাক দলৰ বিষয়াসকলে তেওঁক মুক্ত কৰিবলৈ সকলো ধৰণৰ চেষ্টা চলাইছিল যদিও প্ৰথম অৱস্থাত সফল হোৱা নাছিল। অৱশেষত দীৰ্ঘ সাত ঘণ্টা ধৰি চলা জেৰাৰ অন্ততহে আয়মানক মুক্তি দিয়া হয়।
আমেৰিকাৰ প্ৰশাসনৰ তৰফৰ পৰা জনোৱা হৈছে যে এজন চিনাক্ত সন্ত্ৰাসবাদীৰ সৈতে আয়মানৰ নামৰ মিল থকাৰ বাবেই তেওঁক সন্দেহবশতঃ আটক কৰা হৈছিল। কিন্তু আটাইতকৈ ডাঙৰ আৰু দুখজনক কথাটো হ’ল যে আয়মান হুচেইন নিজেই সন্ত্ৰাসবাদৰ এগৰাকী ভুক্তভোগী। তেওঁৰ পিতৃ ইৰাকৰ সেনাবাহিনীৰ এজন সদস্য আছিল আৰু ২০০৮ চনত অল কায়দাৰ সৈতে হোৱা যুদ্ধত তেওঁ নিহত হৈছিল। কেৱল সেয়াই নহয়, ২০১৪ চনত ইচলামিক ষ্টেটৰ সন্ত্ৰাসবাদীয়ে আয়মানৰ ভাতৃক অপহৰণ কৰি লৈ গৈছিল আৰু তেতিয়াৰ পৰাই তেওঁ নিৰুদ্দেশ হৈ আছে। এনে এক দেশপ্ৰেমী পৰিয়ালৰ সদস্য তথা এগৰাকী আন্তঃৰাষ্ট্ৰীয় ক্ৰীড়াবিদক সন্ত্ৰাসবাদী বুলি সন্দেহ কৰি কৰা এই দুৰ্ব্যৱহাৰক লৈ এতিয়া সকলোৱে ক্ষোভ প্ৰকাশ কৰিছে, যদিও এই সন্দৰ্ভত আমেৰিকা প্ৰশাসনে বৰ্তমানলৈকে কোনো আনুষ্ঠানিক বিবৃতি দিয়া নাই।
