বিগত তিনি বছৰত ৰে’লত পৰিৱেশন কৰা খাদ্যৰ নিম্ন মানদণ্ড আৰু পেণ্ট্ৰী কাৰৰ অপৰিষ্কাৰ পৰিৱেশক লৈ উত্থাপিত কেইবাটাও অভিযোগৰ তদন্তৰ অন্তত সেৱা প্ৰদানকাৰী প্ৰতিষ্ঠানসমূহক ৫.১৩ কোটি টকাৰ জৰিমনা বিহা হৈছে। ৰাজ্যসভাত ৰে’লমন্ত্ৰী অশ্বিনী বৈষ্ণৱে এক লিখিত উত্তৰত এই কথা প্ৰকাশ কৰিছে।
প্ৰিমিয়াম আৰু এক্সপ্ৰেছ ৰে’লসমূহত পৰিৱেশন কৰা খাদ্যৰ মানদণ্ডক লৈ কংগ্ৰেছ সাংসদ চন্দ্ৰকান্ত হান্দোৰেই ৰাজ্যসভাত এক প্ৰশ্ন উত্থাপন কৰিছিল। বিগত তিনি বছৰত ৰাজ্য আৰু জিলাভিত্তিত ৰে’লৰ নিম্নমানৰ খাদ্য, অপৰিষ্কাৰ পেণ্ট্ৰী কাৰ আৰু আতিথ্যৰ অভাৱ সন্দৰ্ভত কিমান অভিযোগ পোৱা গৈছে বুলি তেওঁ প্ৰশ্ন কৰিছিল। ইয়াৰ লগতে, গ্ৰাহকৰ পৰা অতিৰিক্ত ধন সংগ্ৰহ কৰা, নিম্নমানৰ খাদ্য যোগান ধৰা বা নিৰ্ধাৰিত পৰিমাণতকৈ কম খাদ্য দিয়াৰ অপৰাধত দোষী সাব্যস্ত হোৱা আই আৰ চি টি চিৰ অনুজ্ঞাপত্ৰপ্ৰাপ্ত প্ৰতিষ্ঠানসমূহৰ বিৰুদ্ধে কি আইনী ব্যৱস্থা গ্ৰহণ কৰা হৈছে, সেই বিষয়েও সাংসদগৰাকীয়ে জানিবলৈ বিচাৰিছিল।
এই প্ৰশ্নৰ উত্তৰত ৰে’লমন্ত্ৰীগৰাকীয়ে কয় যে ভাৰতীয় ৰেলৱেই প্ৰতি বছৰে গড়ে প্ৰায় ৫৮ কোটি আহাৰ পৰিৱেশন কৰে আৰু ইয়াৰ ভিতৰত গড়ে মাত্ৰ ০.০০০৮ শতাংশ অভিযোগহে লাভ কৰা হয়। বিগত তিনি বছৰত এই অভিযোগসমূহৰ তদন্তৰ অন্তত দোষী প্ৰতিষ্ঠানসমূহক ৫.১৩ কোটি টকা জৰিমনা বিহা হৈছে বুলি তেওঁ উল্লেখ কৰে। ৰেলযাত্ৰীসকলক নিৰ্ধাৰিত মানদণ্ড অনুসৰি উন্নত আৰু স্বাস্থ্যসন্মত খাদ্য যোগান ধৰিবলৈ ভাৰতীয় ৰেলৱে সদায় প্ৰতিশ্ৰুতিবদ্ধ বুলি উল্লেখ কৰি মন্ত্ৰীগৰাকীয়ে কয় যে এইক্ষেত্ৰত সময়ে সময়ে প্ৰয়োজনীয় পদক্ষেপ গ্ৰহণ কৰা হয়।
খাদ্যৰ মানদণ্ড, পৰিষ্কাৰ-পৰিচ্ছন্নতা আৰু সুৰক্ষা উন্নত কৰাৰ বাবে গ্ৰহণ কৰা কেইবাটাও পদক্ষেপৰ বিষয়েও মন্ত্ৰীগৰাকীয়ে সদৰী কৰে। ইয়াৰ ভিতৰত নিৰ্ধাৰিত ‘বেচ কিটচেন’ বা মূল পাকঘৰৰ পৰা খাদ্য যোগান ধৰা, নিৰ্দিষ্ট স্থানত অত্যাধুনিক পাকঘৰ মুকলি কৰা আৰু খাদ্য প্ৰস্তুতকৰণৰ পোনপটীয়া নিৰীক্ষণৰ বাবে পাকঘৰত চিচিটিভি কেমেৰা স্থাপন কৰা আদি অন্যতম।
তদুপৰি, ৰে’লত ডিজিটেল লেনদেন আৰু ইলেক্ট্ৰনিক বিলিং ব্যৱস্থা প্ৰসাৰৰ বাবে পেণ্ট্ৰী কাৰসমূহত পইণ্ট অৱ চেল মেচিন স্থাপন কৰা হৈছে বুলিও তেওঁ জানিবলৈ দিয়ে। যাত্ৰীৰ সুবিধাৰ্থে পেণ্ট্ৰী কাৰসমূহত ইউপিআই, কিউআৰ ক’ড আৰু স্বাইপ মেচিনৰ দৰে একাধিক ডিজিটেল পেমেণ্টৰ সুবিধাও উপলব্ধ কৰা হৈছে।
