সাধাৰণতে বয়সস্থ লোকসকলৰ কোষ্ঠকাঠিন্যৰ সমস্যা দূৰ কৰা এবিধ প্ৰয়োজনীয় ঔষধ হিচাপে পৰিচিত ইচবগুল মানৱ শৰীৰৰ ওজন হ্ৰাস কৰাৰ ক্ষেত্ৰতো এক মহৌষধ হ’ব পাৰে। মেদবহুলতা কমাবলৈ মানুহে চিয়া বীজ, তুলসীৰ বীজ বা তিচিৰ বীজ আদি বিভিন্ন ধৰণৰ উপায় অৱলম্বন কৰে যদিও ইচবগুলৰ সঠিক ব্যৱহাৰে এই প্ৰক্ৰিয়াটো অধিক সহজ কৰি তুলিব পাৰে। স্বাস্থ্য বিশেষজ্ঞসকলৰ মতে, সঠিক নিয়ম মানি ইচবগুল গ্ৰহণ কৰিলে এমাহৰ ভিতৰতে শৰীৰৰ অতিৰিক্ত ওজন কমোৱাটো সম্ভৱপৰ হৈ উঠে।
ইচবগুল থকা দ্ৰৱণীয় ফাইবাৰে পাকস্থলীত পানী শোষণ কৰি ফুলি উঠে, যাৰ ফলত ইয়াক খালে বহু সময়লৈকে পেট ভৰি থকাৰ অনুভৱ হয়। ইয়াৰ ফলশ্ৰুতিত সঘনাই ভোক লগা আৰু অতিৰিক্ত খাদ্য বা জলপান খোৱাৰ প্ৰৱণতা হ্ৰাস পায়, যিয়ে শৰীৰত কেলৰিৰ প্ৰৱেশ নিয়ন্ত্ৰণ কৰে। ইয়াৰ উপৰি শৰীৰৰ ওজন কমাবৰ বাবে সৰ্বপ্ৰথমে হজম প্ৰক্ৰিয়া উন্নত হোৱাটো প্ৰয়োজন, অন্যথা পেট পৰিষ্কাৰ নোহোৱাৰ লগতে গেছৰ সমস্যা বৃদ্ধি পায়। ইচবগুলে হজম শক্তি বৃদ্ধি কৰাৰ লগতে পাচনতন্ত্ৰত চৰ্বি শোষণৰ গতি লেহেমীয়া কৰে। ইয়াৰ ফলত শৰীৰত অতিৰিক্ত মেদ জমা হ’ব নোৱাৰে আৰু ওজন নিয়ন্ত্ৰণত থাকে। বিশেষ পাৰ্শ্বক্ৰিয়া নথকা এইবিধ সামগ্ৰী প্ৰায় সকলো লোকেই নিৰাপদে গ্ৰহণ কৰিব পাৰে।
সমস্যা অনুসৰি ইচবগুল খোৱাৰ নিয়ম বেলেগ বেলেগ হোৱা দেখা যায়। ওজন নিয়ন্ত্ৰণ কৰিব বিচৰাসকলে নিয়মীয়াকৈ আহাৰ গ্ৰহণ কৰাৰ বিছৰ পৰা ত্ৰিশ মিনিট পূৰ্বে এগিলাচ গৰম পানীত এচামুচৰ পৰা দুচামুচ ইছবগুল মিহলাই খাব লাগে। আনহাতে, কোষ্ঠকাঠিন্যৰ সমস্যাৰ পৰা উপশম পাবলৈ নিশা শোৱাৰ আধা ঘণ্টা পূৰ্বে এগিলাচ গৰম গাখীৰ বা পানীৰ সৈতে সমপৰিমাণৰ ইচবগুল খোৱাৰ পৰামৰ্শ দিয়া হয়। ইয়াৰ বিপৰীতে পেট বেয়া হ’লে বা পেটৰ অসুখ হ’লে আহাৰ গ্ৰহণ কৰাৰ ঠিক পাছতেই একাপ দৈৰ সৈতে এচামুচ বা দুচামুচ ইছবগুল মিহলাই খালে সুফল পোৱা যায়।
পৰিশেষত, ইচবগুলে শৰীৰৰ ভিতৰত প্ৰৱেশ কৰি যথেষ্ট পৰিমাণৰ পানী শোষণ কৰি লোৱাৰ বাবে ইয়াক গ্ৰহণ কৰা লোকসকলক দিনটোত প্ৰচুৰ পৰিমাণে পানী খোৱাৰ পৰামৰ্শ দিয়া হৈছে। পৰ্যাপ্ত পৰিমাণৰ পানী পান নকৰিলে শৰীৰত ডিহাইড্ৰেচনৰ দৰে সমস্যাই দেখা দিব পাৰে বুলি সতৰ্ক কৰি দিয়া হৈছে। সঠিক পৰিমাণৰ পানী আৰু নিৰ্দিষ্ট নিয়ম মানি চলিলে ইছবগুল স্বাস্থ্যৰ বাবে অত্যন্ত উপকাৰী বুলি প্ৰতীয়মান হৈছে।
