ক’ৰ’না ভাইৰাছে সৃষ্টি কৰা ভয়-শংকা আৰু ইয়াৰ মহাসংক্ৰমণৰ প্ৰতি লক্ষ্য ৰাখি বিভিন্ন নীতি-নিয়ম তথা সাৱধানতাৰে আজিৰ পৰা গোৱাত অনুষ্ঠিত হ’ব ইণ্ডিয়ান ছুপাৰ লীগ অৰ্থাৎ আই এছ এল।
আজিৰ পৰা আৰম্ভ হ’বলগীয়া সপ্তম সংস্কৰণটিত কেৱল প্ৰতিযোগিতাৰ পৰিবেশ সলনি হোৱাই নহয় ফুটবলৰ কিছু গুৰুত্বপূৰ্ণ নিয়মো সলনি হৈছে।
মেচত সলনি হোৱা ফুটবল খেলুৱৈৰ সংখ্যা, ডাগ আউটত ৰিজাৰ্ভ ফুটবলৰ উপস্থিতি ইত্যাদিৰ নিয়ম সলনি হোৱাৰ লগতে প্ৰতিযোগিতাত মেচৰ সংখ্যাও বৃদ্ধি পাইছে।
যিহেতু গোৱাৰ তিনিখন ষ্টেডিয়ামত সকলো মেচ খেলা হ’ব, সেয়ে দল সমূহৰ বাবে হোম আৰু এৱে মেচৰ কথাটো অপ্ৰাসংগিক হৈ পৰিছে। ষ্টেডিয়ামত দৰ্শকৰ প্ৰৱেশ শূণ্য।
কিন্তু এইবাৰ তিনিজনৰ পৰিৱৰ্তে পাঁচজন খেলুৱৈক চাবষ্টিটিউট প্লেয়াৰ হিচাপে খেলপথাৰত নমাব পাৰিব। কিন্তু কোনো দলে হাফ টাইমৰ আগত পাঁচজন খেলুৱৈক নমাব নোৱাৰে।
ইফালে ডাগআউটত ৭ জনৰ পৰিৱৰ্তে ৯ জন ৰিজাৰ্ভ ফুটবলাৰ ৰাখিব পাৰিব।
উল্লেখ্য যে যোৱা বছৰ আই এছ এলত মুঠ ৯৫ খন মেচ খেলা হৈছিল। কিন্তু এইবাৰ ১০ টা দলৰ সলনি ১১ টা দলে টুৰ্ণামেণ্টত অংশ ল’ব। সেয়ে প্ৰতিযোগিতাত ২০খন অতিৰিক্ত মেচৰ বাবে মুঠ সংখ্যা ১১৫ খনলৈ বৃদ্ধি পাব।
আনহাতে দলত ৫ৰ পৰা ৭ জন বিদেশী ফুটবলাৰ থাকিব। ইয়াৰে পাঁচজনক ফিল্ডত নমাব পাৰিব। বিদেশীৰ ভিতৰত এজন দেশী এছিয়ান প্লেয়াৰ হ’ব লাগিব।
দেশৰ আটাইতকৈ জনপ্ৰিয় ফুটবল টুৰ্ণামেণ্টখন কেৰালা ব্লাষ্টাৰ্ছ এফ চি আৰু এ টি কে মোহন বাগানৰ মেচেৰে শুভাৰম্ভণি হ’ব।