বিগত বৰ্ষৰ অক্টোবৰ মাহত ঘোষণা কৰা যুদ্ধবিৰতিৰ জৰিয়তে গাজাত শান্তি ঘূৰি অহাৰ আশা কৰা হৈছিল যদিও শনিবাৰে সংঘটিত এক ভয়াৱহ বিমান আক্ৰমণে পৰিস্থিতি পুনৰ উত্তপ্ত কৰি তুলিছে। গাজাৰ চিকিৎসালয় কৰ্তৃপক্ষই সদৰী কৰা অনুসৰি, শনিবাৰে ইজৰাইলী বাহিনীৰ আক্ৰমণত কমেও ২৩ জন পেলেষ্টাইনী লোকৰ মৃত্যু হৈছে। ১০ অক্টোবৰৰ যুদ্ধবিৰতিৰ পাছত এয়া অন্যতম শোকাবহ আৰু বৃহৎ আক্ৰমণৰ ঘটনা হিচাপে বিবেচিত হৈছে।
ইজৰাইলে হামাছৰ বিৰুদ্ধে পুনৰ যুদ্ধবিৰতি উলংঘনৰ অভিযোগ উত্থাপন কৰাৰ এদিন পাছতেই গাজাৰ বিভিন্ন স্থানত এই আক্ৰমণ চলোৱা হয়। চিকিৎসালয়ৰ সূত্ৰই প্ৰকাশ কৰা মতে, গাজা চহৰৰ এটা আৱাসিক অট্টালিকা আৰু খান ইউনিছৰ এটা আশ্ৰয় শিবিৰত হোৱা এই আক্ৰমণত দুটা পৰিয়ালৰ দুগৰাকী মহিলা আৰু ছয়গৰাকী শিশুক ধৰি কেইবাজনো লোক নিহত হয়। ইয়াৰ উপৰি, গাজা চহৰৰ এখন আৰক্ষী থানাতো ইজৰাইলে বিমান আক্ৰমণ চলায়, যাৰ ফলত কমেও ১১ জন লোক নিহত হোৱাৰ লগতে বহুতো আহত হয়। চিফা হাস্পতালৰ সঞ্চালক মহম্মদ আবু চেলমিয়াই এই তথ্য নিশ্চিত কৰিছে।
ইজৰাইলৰ এই ধাৰাবাহিক আক্ৰমণ এনে এক সময়ত সংঘটিত হৈছে, যাৰ পিছদিনাই মিচৰ সীমান্তৰ ৰাফা (Rafah) সীমান্ত মুকলি হোৱাৰ কথা আছিল। যুদ্ধৰ প্ৰায় সমগ্ৰ সময়ছোৱাত গাজাৰ সকলোবোৰ সীমান্ত বন্ধ হৈ আছিল। উপযুক্ত চিকিৎসাৰ বাবে বহিঃৰাজ্যলৈ যাবলগীয়া হাজাৰ হাজাৰ পেলেষ্টাইনীৰ বাবে ৰাফা সীমান্তই আছিল একমাত্ৰ ভৰসা, কাৰণ গাজাৰ বেছিভাগ চিকিৎসা আন্তঃগাঁথনি ইতিমধ্যে ধ্বংসস্তূপত পৰিণত হৈছে।
আমেৰিকাৰ মধ্যস্থতাত হোৱা যুদ্ধবিৰতিৰ দ্বিতীয় পৰ্যায়ৰ এক গুৰুত্বপূৰ্ণ পদক্ষেপ আছিল এই সীমান্ত মুকলি কৰা। এই পৰ্যায়ত সীমান্ত মুকলিৰ লগতে হামাছৰ দুই দশকৰ শাসনৰ অন্ত পেলাই গাজাক অস্ত্ৰমুক্ত কৰা আৰু পুনৰ নিৰ্মাণৰ বাবে নতুন চৰকাৰ গঠন কৰাৰ দৰে কেইবাটাও প্ৰত্যাহ্বানমূলক বিষয় অন্তৰ্ভুক্ত আছে।
ইফালে ইজৰাইলী সেনাৰ দাবী অনুসৰি, তেওঁলোকে গাজাত ‘তিনিজন সন্ত্ৰাসবাদী’ক হত্যা কৰিছে। ইজৰাইলী বাহিনীয়ে জনাইছে যে যুদ্ধবিৰতিৰ নিয়মাৱলী উলংঘনৰ প্ৰত্যুত্তৰতহে তেওঁলোকে এই সামৰিক অভিযান চলাইছে। তেওঁলোকৰ মতে, ৰাফাৰ ইজৰাইল-নিয়ন্ত্ৰিত অঞ্চলৰ এটা সুৰংগৰ পৰা ওলাই অহা তিনিজন উগ্ৰপন্থীক সেনাই গুলীয়াই হত্যা কৰে।
আনহাতে গাজাৰ স্বাস্থ্য মন্ত্ৰালয়ৰ পৰিসংখ্যা অনুসৰি, ১০ অক্টোবৰত যুদ্ধবিৰতি আৰম্ভ হোৱাৰ পৰা এতিয়ালৈকে ইজৰাইলী বাহিনীৰ আক্ৰমণত ৫০৯ জন পেলেষ্টাইনী লোকৰ মৃত্যু হৈছে। ৰাষ্ট্ৰসংঘ আৰু নিৰপেক্ষ বিশেষজ্ঞসকলে স্বাস্থ্য মন্ত্ৰালয়ে আগবঢ়োৱা এই তথ্যক সাধাৰণতে বিশ্বাসযোগ্য বুলি গণ্য কৰি আহিছে।
