কোভিড১৯ আক্ৰান্ত স্থানৰ পৰা শিৱসাগৰলৈ পাচলি সৰবৰাহ বন্ধ কৰিবলৈ ভাৰতীয় মজদুৰ সংঘৰ উপায়ুক্তক স্মাৰক পত্ৰ প্ৰদান কৰে।
দেশত এতিয়া ক’ৰ’না ভাইৰাছে মহামাৰী ৰূপ ধাৰণ কৰিছে। যাৰ বাবে আজিৰে পৰা সমগ্ৰ দেশতে তৃতীয় পৰ্যায়ৰ ল’কডাউন আৰম্ভ হৈছে।
দেশৰ লগতে ৰাজ্যৰ বিভিন্ন জিলাসমুহত প্ৰশাসনে ক’ৰ’না ভাইৰাছ সংক্ৰমণ ৰোধৰ বাবে বিভিন্ন কাৰ্য ব্যৱস্থা হাতত লৈছে। শিৱসাগৰ জিলাতো অন্য জিলাৰ পাচলি আমদানি কৰাত প্ৰশাসনে কঠোৰ ব্যৱস্থা গ্ৰহণ কৰিছিল যদিও একাংশ ব্যক্তিয়ে ক’ৰ’না আক্ৰান্ত স্থানৰ পৰা পাচলি আনি জিলাখনত বিক্ৰী কৰি থকাৰ এক গুৰুত্ব অভিযোগ উঠিছে।
যাৰ বাবে আজি শিৱসাগৰত থলুৱা শাক পাচলি ক্ৰয় বিক্ৰয়ৰ সন্দৰ্ভত ভাৰতীয় মজদুৰ সংঘই শিৱসাগৰ জিলা উপায়ুক্তক বিষয়টো দৃষ্টি গোচৰ কৰাৰ লগতে এখন স্মাৰক পত্ৰ প্ৰদান কৰে।
আজি ভাৰতীয় মজদুৰ সংঘৰ সভাপতি পাৰ্থ প্ৰদীপ বৰা আৰু সম্পাদক ভাস্কৰ দাসৰ স্বাক্ষৰিত এখন সন্মাৰক পত্ৰ শিৱসাগৰ জিলা উপায়ুক্ত লক্ষীনন্দন গগৈক প্ৰদান কৰে।
স্মাৰক পত্ৰত সংঘই উল্লেখ কৰে যে, নামনি অসম আৰু মধ্য অসমৰ বহুকেইখন জিলা ইতিমধ্য কোভিড১৯ আক্ৰান্ত স্থান হিচাপে চৰকাৰে ঘোষণা কৰিছে। তেনে স্থানৰ পৰা এচাম দুষ্ট চক্ৰই পাচলি সৰবৰাহ কৰি আছে। এনে সৰবৰাহকাৰীৰ বিৰুদ্ধে কঠোৰ ব্যৱস্থা লবলৈ সংঘই দাবী জনায়।
থলোৱা কৃষকৰ দ্বাৰা উৎপাদিত শাক পাচলিৰ পৰিৱৰ্তে জিলাখনৰ বিভিন্ন স্থানত আবতৰীয়া পাচলি বিক্ৰী কৰি থকা দেখিবলৈ পোৱা গৈছে। এই কাৰ্য অতি ভয়ানক বুলি সংঘই উল্লেখ কৰিছে। নগৰত চুকে কোণে এনে পাচলি বিক্ৰেতাসকলৰ ওপৰত বিহিত ব্যৱস্থাৰ দাবী জনায়।
ল’কডাউনৰ পিছত শিৱসাগৰৰ কেন্দ্ৰীয় বজাৰকে ধৰি জিলাখনৰ দাতিকাষৰীয়া বজাৰ সমুহত চালানি পাচলি বিক্ৰী সম্পূৰ্ণ বন্ধ কৰি কেৱল থলুৱাভাৱে উৎপাদিত পাচলি বিক্ৰীৰ ব্যৱস্থা গ্ৰহণ কৰিবলৈ দাবী জনায়।
শাক পাচলি কিনা বেচাৰ ক্ষেত্ৰত মধ্যভোগী অনা অসমীয়া ব্যৱসায়ীৰ হস্তক্ষেপ সম্পূৰ্ণ ৰূপে বন্ধ কৰাৰ লগতে শিৱসাগৰৰ পাচলি বজাৰখন অনা অসমীয়া ব্যৱসায়ীৰ কবলৰ পৰা আনি থলুৱা শিক্ষিত ব্যক্তিৰ হাতত গতাবৰ বাবে সুপৰিকল্পনা গ্ৰহণ কৰিবলৈ দাবী জনায়।
আনহাতে বছৰ বছৰ ধৰি ধান খেতি উৎপাদন বন্ধ হৈ থকা চৰকাৰী বাম পথাৰ সমু পাচলি উৎপাদলৰ পথাৰলৈ পৰিৱৰ্তন কৰিবলৈ প্ৰশাসনক অনুৰোধ জনায়।
ইয়াৰোপৰি কেন্দ্ৰীয় বজাৰ তথা আন আন বজাৰসমুহত পাইকাৰী ব্যৱসায়ীক পাইকাৰী ব্যৱসায় আৰু খুচুৰা ব্যৱসায়ী কেৱল খুচুৰা ব্যৱসায় কৰিবলৈ ব্যৱস্থা গ্ৰহণ কৰিবলৈ ভাৰতীয় মজদুৰ সংঘই দাবী জনায়।
