সাম্প্ৰতিক ক্ৰিকেট বিশ্বৰ অন্যতম শ্ৰেষ্ঠ বলাৰ হিচাপে নিজকে প্ৰতিষ্ঠা কৰা ভাৰতীয় বলিং আক্ৰমণৰ মূল স্তম্ভ যশপ্ৰীত বুমৰাহে টি-২০ ক্ৰিকেটত আন এক মাইলষ্ট’ন স্পৰ্শ কৰিছে।
চলিত ইণ্ডিয়ান প্ৰিমিয়াৰ লীগৰ এখন লীগ মেচত মঙলবাৰে চানৰাইজাৰ্ছ হায়দৰাবাদৰ বিৰুদ্ধে খেলখনত মুম্বাই ইণ্ডিয়ানছ তিনি ৰানত পৰাস্ত হ’লেও মেচখনত বুমৰাহে এই বৃহৎ অভিলেখ স্থাপন কৰে।
হায়দৰাবাদৰ নিম্নক্ৰমৰ বেটাৰ ৱাশ্বিংটন সুন্দৰৰ উইকেট দখল কৰি টি-২০ ক্ৰিকেটত ২৫০ টা উইকেট সম্পূৰ্ণ কৰে বুমৰাহে। এই সফলতা অৰ্জন কৰা বুমৰাহ প্ৰথমগৰাকী ভাৰতীয় বেগী বলাৰত পৰিণত হয়।
এতিয়ালৈকে চাৰিজন ভাৰতীয় স্পিনাৰ – ৰবিচন্দ্ৰন অশ্বিন (২৭৪), যুজবেন্দ্ৰ চাহাল (২৭১), পীযুষ চাওলা (২৭০) আৰু অমিত মিশ্ৰাই (২৬২) টি-২০ ক্ৰিকেটত ২৫০ উইকেটৰ সীমা অতিক্ৰম কৰিছে।
বেগী বলাৰৰ ক্ষেত্ৰত এই তালিকাত বুমৰাহৰ পিছত আছে আন এগৰাকী অভিজ্ঞ বলাৰ ভুৱনেশ্বৰ কুমাৰ। ভুৱনেশ্বৰে এই পৰ্যন্ত টি-২০ ফৰ্মেটত ২২৪ টা উইকেট লাভ কৰিছে।
আনহাতে ২০০ উইকেটৰ সীমা অতিক্ৰম কৰা আনগৰাকী ভাৰতীয় পেচাৰ হৈছে জয়দেৱ উনাডকাট। বাওঁহতীয়া পেচাৰগৰাকীয়ে নিজৰ টি-২০ কেৰিয়াৰত এই পৰ্যন্ত ২০১ টা উইকেট লাভ কৰিছে।
