বিগত কিছুদিন ধৰি আইপিএলৰ বেগুণীয়া টুপীৰ দৌৰত দিল্লী কেপিটেলছৰ কাগিছো ৰাৱাডাৰ সৈতে যুঁজ চলি আহিছিল মুম্বাই ইণ্ডিয়ানছৰ যশপ্ৰীত বুমৰাহৰ।
লীগৰ অন্তিমখন মেচত মুম্বাই ইণ্ডিয়ানছে তেওঁক জিৰণি দিয়াত ৰাৱাডাই সৰ্বাধিক উইকেট দখলৰ দৌৰত বুমৰাহক পিছ পেলায়।
কিন্তু আইপিএল -২০২০ৰ প্ৰথমখন কোৱালিফায়াৰ মেচত দিল্লীৰ বিৰুদ্ধে খেলপথাৰত নামে বুমৰাহ।
বুমৰাহে তেওঁৰ নিৰ্দিষ্ট ৪অভাৰত ১৪ৰাণৰ বিনিময়ত ৪টা উইকেট লৈ ৰাৱাডাৰ পৰা আজুৰি আনে পাৰ্পল কেপ বা বেগুমীয়া টুপী। এখন মেচ কম খেলা বুমৰাহে ইতিমধ্যে দখল কৰিছে ২৭টা উইকেট।
দিল্লীৰ বিৰুদ্ধে দুৰ্দান্ত প্ৰদৰ্শনৰ লগে লগে যশপ্ৰীত বুমৰাহে মেন অফ দ্য মেচ হোৱাই নহয় লগতে কেইবাটাও অভিলেখো গঢ়িছে।
বুমৰাহে নিজৰ টী-২০ কেৰিয়াৰত ১৪ৰাণত ৪টা উইকেট লাভ কৰি শ্ৰেষ্ঠ বলিং প্ৰদৰ্শনৰ দৃষ্টান্ত গঢ়িছে।
আইপিএলৰ প্লে-অফ মেচত মুম্বাই ইণ্ডিয়ানছৰ কোনো বলাৰৰ এইটোৱে বৰ্তমানলৈকে শ্ৰেষ্ঠ প্ৰদৰ্শন।
এইবাৰৰ আইপিএলত এতিয়ালৈকে দুখন মেচত ৪টা কৈ উইকেট দখল কৰাৰ কৃতিত্বও বুমৰাহে লাভ কৰিছে।
আইপিএলৰ এটা সংস্কৰণত কোনো ভাৰতীয় বলাৰে ২৭টা উইকেট লাভ কৰাৰ অভিলেখো গঢ়িলে বুমৰাহে।
এইক্ষেত্ৰত বুমৰাহে আন এগৰাকী ভাৰতীয় বলাৰ ভুৱনেশ্বৰ কুমাৰক অতিক্ৰম কৰে। ২০১৭ৰ আইপিএলত ভুৱনেশ্বৰ কুমাৰে ২৬টা উইকেট দখল কৰিছিল।
