পাকিস্তানী প্ৰধান মন্ত্ৰী ইমৰাণ খানক বিস্ফোৰক অভিযোগেৰে থকা সৰকা কৰিছে প্ৰাক্তন সতীৰ্থ ক্ৰিকেটাৰ তথা পাকিস্তান ক্ৰিকেট দলৰ প্ৰাক্ত অধিনায়ক জাভেদ মিঞাদাদে।
প্ৰাক্তন অধিনায়কগৰাকীয়ে পাকিস্তান ক্ৰিকেট বোৰ্ডৰ কামকাজত ইমানে অসন্তুষ্ট হৈ পৰিছে যে প্ৰধান মন্ত্ৰী ইমৰাণ খানে বিদেশীৰ স্বাৰ্থত কাম কৰি থকা বুলি অভিযোগ আনিছে।
দৰাচলতে, পিচিবিৰ মুখ্য কাৰ্যবাহী পদত পাকিস্তানী বংশোদ্ভৱ ইংলেণ্ডৰ নাগৰিক ৱাছিম খানক নিযুক্তি দিয়াত মিঞাদাদ অসন্তুষ্ট হৈ পৰিছে।
প্ৰধান মন্ত্ৰী ইমৰাণ খানৰ নিৰ্দেশতেই এই কাম কৰা হৈছে বুলি দাবী কৰিছে প্ৰাক্তন অধিনায়কগৰাকীয়ে।
মিঞাদাদে কয় যে দেশৰ ক্ৰিকেট বোৰ্ডৰ গুৰুত্বপূৰ্ণ পদ এটাত এগৰাকী বিদেশীক নিযুক্তি দি ইমৰাণ খানে নিজকে ভগৱান বুলি ভাৱিছে।
তেওঁ কয় যে ইমৰাণে নিজকে একমাত্ৰ বিচক্ষণ ব্যক্তি বুলি ভাৱিছে।
নিজৰ য়ুটিউব চেনেলত মিঞাদাদে কয় যে পিচিবি যিধৰণে হতাশাজনকভাৱে পৰিচালিত হৈছে তাক লৈ তেওঁ ব্যক্তিগতভাৱইমৰাণ খানৰ সৈতে কথা পাতিব।
মিঞাদাদে কয় যে দেশৰ বাবে সঠিক নহ’লে তেওঁ কাকো এৰি নিদিয়ে।
পাকিস্তানত যোগ্য ব্যক্তিৰ অভাৱ হৈছে নেকি যে বিদেশৰ পৰা লোক আমদানি কৰিব লগা হৈছে বুলিও মিঞাদাদে প্ৰশ্ন কৰে।
তদুপৰি, মিঞাদাদে কটাক্ষ কৰি ইমাৰণৰ উদ্দেশ্যি কয়,’’মই তোমাৰ অধিনায়ক আছিলো। তুমি মোৰ নহয়। মই ৰাজনীতিলৈ আহিম আৰু তেতিয়া তোমাৰ সৈতে কথা পাতিম। মই সদায় তোমাক নেতৃত্ব দিছো।‘’