কাজিৰঙা ৰাষ্ট্ৰীয় উদ্যানৰ কাষতে বোকাখাতৰ মৰিধনশিৰি নদীৰ পাৰৰ খেতিৰ পথাৰত অইল ইণ্ডিয়াই চলোৱা ভূকম্পন জৰীপে আজি সমগ্ৰ অঞ্চলতে এক আতংকময় পৰিৱেশৰ সৃষ্টি কৰে।
প্ৰাপ্ত তথ্য মতে কাজিৰঙাৰ অগৰাতলি ৰেঞ্জৰ সমীপৰ বহিখোৱা পথাৰত আজি অইল ইণ্ডিয়াৰ হৈ আলফা জিঅ’ ইণ্ডিয়া নামৰ কোম্পানীটোয়ে এই চিচমিক চাৰ্ভেৰ কাম আৰম্ভ কৰে। ভূ-গৰ্ভ কম্পনেৰে তেল সন্ধান কৰাৰ নামত কোম্পানীটোয়ে বহিখোৱা পথাৰত ড্ৰিল কৰি মাটিৰ তলত এলানি বিস্ফোৰণ ঘটায়। ফলত স্থানীয় লোকসকল শংকিত হৈ পৰে।
আনহাতে এই ঘটনাৰ পিছতে বোকাখাতৰ জীপাল কৃষক শ্ৰমিক সংগঠনৰ কৰ্মী সকল ঘটনাস্থলীত উপস্থিত হৈ এই কাৰ্যৰ বিৰোধিতা কৰি তৎকালীনভাৱে এই ভূকম্পন বন্ধ কৰি দি ভৱিষ্যতে এনে কাৰ্য নকৰিবৰ বাবে আলফা জিঅ’ ইণ্ডিয়া নামৰ কোম্পানিটোক সকীয়াই দিয়ে।
উল্লেখযোগ্য যে কাজিৰঙা ৰাষ্ট্ৰীয় উদ্যানৰ ইক’ চেনচিটিভ জ’ন আৰু নুমলীগড় শোধানাগাৰৰ ন’ ডেভিলপমেণ্ট জ’নতে হোৱা এই চিচমিক জৰীপৰ বিষয়ে কাজিৰঙাৰ কৰ্তৃপক্ষ একেবাৰে অৱগত নহয়। আনকি এই জৰীপৰ বিষয়ে বোকাখাত মহকুমা প্ৰশাসনো অৱগত নহয়।
আনহাতে জীপাল নামৰ সংগঠনটোৰ প্ৰতিবাদত বহিখোৱাত এই চিচমিক চাৰ্ভে বন্ধ কৰি আলফা জিঅ’ ইণ্ডিয়াৰ কৰ্মকৰ্তাই গোলাঘাটৰ উপায়ুক্তক এখন পত্ৰ প্ৰদৰ্শন কৰে।
ইফালে জীপালৰ বিষয় ববীয়া সোনেশ্বৰ নৰহে সংবাদ মাধ্যমৰ আগত জনোৱা অনুসৰি অই ইণ্ডিয়াই এনেদৰে নীতি বৰ্হিভূতভাৱে চলোৱা জৰীপে বোকাখাতৰ লগতে কাজিৰঙা ৰাষ্ট্ৰীয় উদ্যানকো ভয়ংকৰভাৱে ক্ষতি কৰিব। গতিকে কোনো কাৰণতে বোকাখাতত এই ভূকম্পন জৰীপ হ’বলৈ দিয়া নহ’ব বুলি তেওঁ সংবাদ মাধ্যমৰ আগত মন্তব্য কৰে।