যোৰহাট জিলাত সংঘটিত হোৱা এক ভয়ংকৰ আৰু চাঞ্চল্যকৰ ঘটনা। কংগ্ৰেছ দলৰ এগৰাকী স্থানীয় নেতাক দুৰ্বৃত্তই নিৰ্মমভাৱে হত্যা কৰাৰ সন্দেহ প্ৰকাশ কৰা হৈছে। বুধবাৰে জিলাখনৰ ককিলামুখ অঞ্চলৰ এটা মথাউৰিৰ পৰা ঢেকৰগড়া ব্লক কংগ্ৰেছৰ সংখ্যালঘু বিভাগৰ সভাপতি আমিৰ আলীৰ মৃতদেহ উদ্ধাৰ হোৱাৰ পিছতেই সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে।
প্ৰাপ্ত তথ্য অনুসৰি, বুধবাৰে স্থানীয় ৰাইজে ককিলামুখৰ মথাউৰিত এটা মৃতদেহ প্ৰত্যক্ষ কৰি লগে লগে আৰক্ষীক খবৰ দিয়ে। ঘটনাস্থলীত আৰক্ষী উপস্থিত হৈ মৃতদেহটো কংগ্ৰেছ নেতা আমিৰ আলীৰ বুলি চিনাক্ত কৰে। স্থানীয় সূত্ৰ আৰু প্ৰাথমিক অনুসন্ধানৰ ভিত্তিত এয়া এক সুপৰিকল্পিত হত্যাকাণ্ড বুলি সন্দেহ কৰা হৈছে। দুৰ্বৃত্তই নিশাৰ ভাগত নেতাজনক হত্যা কৰি মৃতদেহটো লুকুৱাই ৰখাৰ উদ্দেশ্যৰে মথাউৰিত পেলাই থৈ যোৱা বুলি ধাৰণা কৰা হৈছে। এই ঘটনাই স্থানীয় ৰাইজ আৰু দলীয় কৰ্মীসকলৰ মাজত গভীৰ উদ্বেগ প্ৰকাশ কৰাৰ লগতে নিৰাপত্তাজনিত শংকাৰো সৃষ্টি কৰিছে।
ঘটনাৰ খবৰ বিয়পি পৰাৰ লগে লগে জিলাখনৰ কংগ্ৰেছ কৰ্মীসকলৰ মাজত শোকৰ ছাঁ পৰাৰ লগতে তীব্ৰ ক্ষোভৰো উদগীৰণ হৈছে। দলীয় নেতৃত্বই এই ঘটনাক কঠোৰ ভাষাৰে গৰিহণা দি দোষীক অনতিপলমে কৰায়ত্ব কৰিবলৈ দাবী জনাইছে। এগৰাকী প্ৰত্যক্ষদৰ্শীয়ে জানিবলৈ দিয়া মতে মৃতদেহটো উদ্ধাৰ হোৱা স্থানত সংগ্ৰামৰ কিছু চিন স্পষ্ট হৈ আছিল আৰু আৰক্ষীয়ে সেই সকলোবোৰ তথ্য সংগ্ৰহ কৰিছে। অপৰাধীক বিচাৰি উলিয়াবলৈ আৰক্ষীৰ এটা বিশেষ দলে অভিযান চলাই আছে।
সাম্প্ৰতিক সময়ত যোৰহাট আৰক্ষীয়ে সমগ্ৰ অঞ্চলটোত নিৰাপত্তা ব্যৱস্থা কটকটীয়া কৰিছে যদিও এই পৰ্যন্ত হত্যাকাণ্ডৰ সৈতে জড়িত কোনো লোকক গ্ৰেপ্তাৰ কৰিবলৈ সক্ষম হোৱা নাই আৰু সমগ্ৰ জিলাখনতে এই ঘটনাক কেন্দ্ৰ কৰি এক চেপা উত্তেজনাই বিৰাজ কৰিছে।
