শিৱসাগৰ জিলা উপায়ুক্ত কাৰ্যালয়ৰ চুকাফা ভৱনত আজি যোৰহাট লোকসভা সমষ্টিৰ সাংসদ তপন কুমাৰ গগৈয়ে শিৱসাগৰ জিলা উপায়ুক্তৰ সৈতে এক বৈঠকত মিলিত হয়।
বৈঠকত কভিড-১৯ সন্দৰ্ভত শিৱসাগৰ জিলাৰ সাম্প্ৰতিক পৰিস্থিতিৰ ওপৰত আলোচনা কৰা হয়। দিল্লীৰ পৰা আহি হোম কুৱাৰেণ্টাইনত থকা সাংসদগৰাকীয়ে ২২ এপ্ৰিলত কুৱাৰেণ্টাইন সামৰি কালি মুখ্য মন্ত্ৰীৰ লগত চৰাইদেউ জিলা উপায়ুক্তৰ সৈতে বৈঠকত মিলিত হোৱাৰ লগতে চৰাইদেউ অসামৰিক চিকিৎসালয় পৰিদৰ্শন কৰিছিল আৰু সন্ধিয়ালৈ নাজিৰাৰ মহকুমাধিপতিৰ সৈতে নাজিৰাৰ নৱোদয় বিদ্যালয়ৰ কুৱাৰেণ্টাইন চেণ্টাৰ পৰিদৰ্শন কৰি পৰিস্থিতিৰ বুজ লৈছিল।
আজি গগৈয়ে শিৱসাগৰ জিলা উপায়ুক্ত লক্ষীনন্দন গগৈৰ সৈতে বৈঠকত মিলিত হৈ জিলাখনৰ সাম্প্ৰতিক পৰিস্থিতিৰ বিষয়ে আলোচনা কৰে। তাৰ পিছতে সাংসদগৰাকী শিৱসাগৰ অসামৰিক চিকিৎসালয়ত উপস্থিত হৈ কোৱাৰেণ্টাইন চেণ্টাৰ পৰিদৰ্শন কৰাৰ লগতে চিকিৎসালয়খনৰ সকলো বিভাগ পৰিদৰ্শন কৰে।
চিকিৎসালয় পৰিদৰ্শন কালত সাংসদ গগৈয়ে চিকিৎসালয়খনত নিমাৰ্ণ হৈ থকা এটি নতুন বিল্ডিঙৰ কাম যথেষ্ট লেহেমীয়া হোৱা দেখা পাই ক্ষোভ প্ৰকাশ কৰি শীঘ্ৰেই নিমাৰ্ণ কাৰ্য সম্পূৰ্ণ কৰিবলৈ নিৰ্দেশ দিয়ে।
