উত্তৰাখণ্ডৰ যোশীমঠ চহৰত দেখা দিয়া দুৰ্যোগৰ অনুৰূপ দৃশ্য এইবাৰ পৰিলক্ষিত হৈছে জম্মু-কাশ্মীৰত। যোশীমঠ সংকটৰ দৰেই এইবাৰ প্ৰকৃতিৰ ৰোষত পৰিছে উপত্যকাটোৰ ড’ডা জিলা। এই সংকটৰ ফলত জিলাখনৰ এখন গাঁও প্ৰায় নি:চিহ্ন হৈ যোৱাৰ উপক্ৰম হৈছে।
প্ৰকাশিত খবৰ অনুসৰি, ভূমিস্খলনৰ কবলত পৰা ড’ডা জিলাৰ এখন গাঁও বিস্তৰ ক্ষতিৰ সন্মুখীন হোৱাৰ লগতে ২০ টাতকৈও অধিক ঘৰ আৰু এটা মছজিদত চিৰাল ফাট মেলিছে। এনে সংকটৰ ফলত স্থানীয় বাসিন্দাসকলৰ মাজত এতিয়া আতংকৰ সৃষ্টি হৈছে।
স্থানীয় বিষয়াসকলে জানিবলৈ দিয়া মতে, ক্ষতিগ্ৰস্ত পৰিয়ালকেইটাক নিৰাপদ স্থানলৈ স্থানান্তৰ কৰা হৈছে আৰু বিশেষজ্ঞৰ দল এটাক গাঁওখনলৈ প্ৰেৰণ কৰা হৈছে। এই দলটোৱে এনে অস্বাভাৱিক স্খলনৰ উদ্ভৱ হোৱাৰ কাৰণৰ তদন্ত কৰিছে বুলি তেওঁলোকে সদৰী কৰিছে।
ড’ডাৰ উপ আয়ুক্ত বিষেশ মহাজনে এই দুৰ্যোগৰ সন্মুখীন হোৱা স্থানীয় লোকসকলৰ সুৰক্ষা নিশ্চিত কৰাৰ বাবে তথা তেওঁলোক যাতে কোনো ধৰণৰ অসুবিধাৰ সন্মুখীন নহয়, তাৰ বাবে প্ৰশাসনে সকলো প্ৰয়োজনীয় ব্যৱস্থা গ্ৰহণ কৰিছে বুলি সংবাদ মাধ্যমৰ আগত অৱগত কৰিছে।
অপৰিকল্পিত পথ নিৰ্মাণকে ধৰি আন কেইবাটাও কাৰকে পাহাৰীয়া গাঁওখনত এনেদৰে দুৰ্যোগৰ সৃষ্টি কৰা বুলি দাবী কৰিছে স্থানীয় একাংশ লোকে।
উল্লেখ্য যে, শেহতীয়াকৈ এনে ভয়াৱহ দুৰ্যোগৰ কবলত পৰি নি:চিহ্ন হৈ যোৱাৰ উপক্ৰম হৈছিল উত্তৰাখণ্ডৰ যোশীমঠ চহৰ। চিৰাল ফাটৰ প্ৰকোপত চহৰখনত এক অকল্পনীয় পৰিস্থিতিৰ সৃষ্টি হৈছিল। দুৰ্যোগৰ কবলত পৰা প্ৰায় ৪ হাজাৰ লোকক সাহায্য শিবিৰলৈ স্থানান্তৰ কৰা হৈছিল।
চহৰখনৰ স্থানীয় বাসিন্দা আৰু বিশেষজ্ঞসকলে এই সংকটৰ বাবে অঞ্চলটোৰ অপৰিকল্পিত আৰু বিশৃংখল আন্তঃগাঁথনি প্ৰকল্পৰ বাবে স্পষ্টকৈ দোষাৰোপ কৰিছে। ইফালে যোশীমঠৰ পিছতে এনে অনুৰূপ পৰিস্থিতিয়ে উত্তৰাখণ্ডৰ আন এখন চহৰ তেহৰী গড়ৱালকো স্পৰ্শ কৰিছিল।
