বিগত এটা দশকত ভাৰতীয় ন্যায়পালিকাৰ স্বচ্ছতা আৰু উত্তৰদায়ীত্বক লৈ এক গুৰুত্বপূৰ্ণ তথ্য পোহৰলৈ আহিছে। কেন্দ্ৰীয় বিধি আৰু ন্যায় মন্ত্ৰালয়ে যোৱা ১৩ ফেব্ৰুৱাৰী, শুকুৰবাৰে সংসদত সদৰী কৰা অনুসৰি, বিগত ১০ বছৰত ভাৰতৰ মুখ্য ন্যায়াধীশৰ কাৰ্যালয়ে কৰ্মৰত ন্যায়াধীশসকলৰ বিৰুদ্ধে মুঠ ৮,৬৩০ টা বিভিন্ন ধৰণৰ অভিযোগ লাভ কৰিছে। লোকসভাত এক লিখিত প্ৰশ্নৰ উত্তৰত দাঙি ধৰা এই পৰিসংখ্যাই বৰ্তমানৰ ন্যায়িক ব্যৱস্থাত জবাবদিহিতা নিশ্চিত কৰাৰ প্ৰয়োজনীয়তাক লৈ নতুনকৈ বিতৰ্কৰ সূচনা কৰিছে।
‘বাৰ এণ্ড বেঞ্চ‘ৰ বাতৰি অনুসৰি, দ্ৰাবিড় মুন্নেত্ৰ কাঝাগম (ডিএমকে)ৰ সাংসদ মাথেস্বৰন ভি এছ-এ লোকসভাত সোধা এক প্ৰশ্নৰ উত্তৰত চৰকাৰৰ হৈ এই তথ্য দাঙি ধৰে বিধি আৰু ন্যায় ৰাজ্যিক মন্ত্ৰী (স্বতন্ত্ৰ দায়িত্ব) অৰ্জুন ৰাম মেঘৱালে। উল্লেখনীয় যে মাথেস্বৰন ভি এছ-এ মন্ত্ৰালয়ৰ পৰা উচ্চ ন্যায়ালয় আৰু উচ্চতম ন্যায়ালয়ৰ ন্যায়াধীশসকলৰ বিৰুদ্ধে দুৰ্নীতি, যৌন দুৰাচাৰ বা অন্যান্য গুৰুতৰ অনিয়মৰ সৈতে জড়িত অভিযোগৰ তালিকা বিচাৰিছিল।
ইয়াৰ উত্তৰত অৰ্জুন ৰাম মেঘৱালে উচ্চতম ন্যায়ালয়ৰ পৰা প্ৰাপ্ত তথ্যৰ ভিত্তিত লিখিত উত্তৰ দাখিল কৰি জনায় যে কৰ্মৰত ন্যায়াধীশসকলৰ বিৰুদ্ধে ৮,৬৩০ টা অভিযোগ পোৱা গৈছে। ইয়াৰ ভিতৰত সৰ্বাধিক ১,১৭০ টা অভিযোগ ২০২৪ বৰ্ষত পোৱা গৈছে; আনহাতে আটাইতকৈ কম ৫১৮ টা অভিযোগ ২০২০ চনত মুখ্য ন্যায়াধীশৰ কাৰ্যালয়ে লাভ কৰিছে।
মাথেস্বৰনে তেওঁৰ প্ৰশ্নত এই অভিযোগসমূহৰ ওপৰত কোনো ব্যৱস্থা গ্ৰহণ কৰা হৈছে নেকি বুলিও সুধিছিল। অৱশ্যে বিধি মন্ত্ৰালয়ৰ উত্তৰত এই দিশটোৰ কোনো উল্লেখ কৰা হোৱা নাই। লগতে অভিযোগসমূহৰ ওপৰত লোৱা ব্যৱস্থাৰ কোনো নথি কিয় নাই, সেইটোও স্পষ্ট কৰা হোৱা নাই।
এই সন্দৰ্ভত সাংসদগৰাকীয়ে আন এটা প্ৰশ্ন উত্থাপন কৰিছিল যে উচ্চ ন্যায়ালয় বা উচ্চতম ন্যায়ালয়ৰ ন্যায়াধীশসকলৰ বিৰুদ্ধে দুৰ্নীতি, যৌন অপৰাধ বা গুৰুতৰ অনিয়মৰ অভিযোগৰ তথ্য ৰক্ষণাবেক্ষণৰ বাবে উচ্চতম ন্যায়ালয়ে ব্যৱহাৰ কৰা কোনো ব্যৱস্থাৰ বিষয়ে কেন্দ্ৰীয় চৰকাৰ অৱগত নেকি? যদি হয়, তেন্তে বিগত ১০ বছৰত এনে কিমান অভিযোগ পোৱা গৈছে আৰু সেইবোৰৰ ওপৰত বছৰ বছৰ ধৰি কি ব্যৱস্থা গ্ৰহণ কৰা হৈছে? প্ৰশ্নটোত এইটোও সোধা হৈছিল যে চৰকাৰে ন্যায়পালিকাৰ সদস্যসকলৰ বিৰুদ্ধে পোৱা অভিযোগসমূহ পদ্ধতিগতভাৱে পঞ্জীয়ন ও নিৰীক্ষণ কৰিবলৈ আৰু তেওঁলোকৰ জবাবদিহিতা নিশ্চিত কৰিবলৈ কোনো নিৰ্দেশনা জাৰি কৰা বা পদক্ষেপ লোৱাৰ কথা ভাবিছে নেকি?
এই সকলোবোৰৰ উত্তৰত কোৱা হৈছিল যে ভাৰতৰ মুখ্য ন্যায়াধীশ আৰু উচ্চ ন্যায়ালয়সমূহৰ মুখ্য ন্যায়াধীশসকল ‘আভ্যন্তৰীণ প্ৰক্ৰিয়া‘ অনুসৰি ন্যায়াধীশসকলৰ বিৰুদ্ধে অভিযোগ গ্ৰহণ কৰিবলৈ সক্ষম। উত্তৰত লগতে কোৱা হৈছে যে কেন্দ্ৰীয় জন অভিযোগ নিবাৰণ আৰু নিৰীক্ষণ প্ৰণালী (CPGRAMS) বা আন কোনো মাধ্যমৰ জৰিয়তে ন্যায়পালিকাৰ সদস্যসকলৰ বিৰুদ্ধে প্ৰাপ্ত অভিযোগসমূহ মুখ্য ন্যায়াধীশ বা সংশ্লিষ্ট উচ্চ ন্যায়ালয়ৰ মুখ্য ন্যায়াধীশলৈ প্ৰেৰণ কৰা হয়। অৱশ্যে, অভিযোগৰ পদ্ধতিগত তথ্য সংৰক্ষণ আৰু জবাবদিহিতা নিশ্চিত কৰিবলৈ চৰকাৰে কোনো নিৰ্দেশনা জাৰি কৰাৰ প্ৰস্তাৱ দিছে নেকি বুলি সোধা প্ৰশ্নৰ উত্তৰ দিয়াৰ পৰা বিৰত থাকে মন্ত্ৰীগৰাকীয়ে।
এই সন্দৰ্ভত সাংবাদিক সৌৰভ দাসে সামাজিক মাধ্যমৰ জৰিয়তে উদ্বেগ প্ৰকাশ কৰি কয়, “মাদ্ৰাজ উচ্চ ন্যায়ালয়ৰ প্ৰাক্তন কাৰ্যকৰী মুখ্য ন্যায়াধীশ টি. ৰাজাৰ বিৰুদ্ধে দুৰ্নীতি আৰু দুৰাচাৰৰ অভিযোগৰ সৈতে জড়িত মোৰ গোচৰত দিল্লী উচ্চ ন্যায়ালয়ৰ সন্মুখত উচ্চতম ন্যায়ালয়ৰ ৰেজিষ্ট্ৰীয়ে শপতনামা দি কৈছে যে তেওঁলোকে বিচৰা ধৰণৰ তথ্য সংৰক্ষণ নকৰে। তেন্তে সংসদত বছৰেকীয়া তথ্য কেনেকৈ দিয়া হ’ল?”
তেওঁ আৰু প্ৰশ্ন কৰে, “তেন্তে উচ্চতম ন্যায়ালয়ৰ ৰেজিষ্ট্ৰীয়ে দিল্লী উচ্চ ন্যায়ালয়ৰ সন্মুখত শপত খাই মিছা কথা কৈছে নেকি? যদি সেয়াই হয়, তেন্তে এয়া অভূতপূৰ্ব আৰু তথ্য দিবলৈ অস্বীকাৰ কৰি এজন ন্যায়াধীশক সুৰক্ষা দিয়াৰ দায়িত্বত থকাসকলৰ বিৰুদ্ধে কঠোৰ ব্যৱস্থা গ্ৰহণ কৰিব লাগে! কাক সুৰক্ষা দিয়া হৈছে? তেওঁলোকে এনে কিয় কৰিছে? আৰু মোৰ আৰটিআই (RTI) প্ৰশ্নৰ উত্তৰ দিবলৈ তেওঁলোকৰ কিহৰ ভয়? আনকি তেওঁলোকে উচ্চ ন্যায়ালয়ক বিভ্ৰান্ত কৰাৰ পৰ্যায়লৈকে গৈছিল। আজি ব্যৱস্থাটো উন্মোচিত হৈছে; জবাবদিহিতা নিশ্চিত হ’ব লাগে।”
