অসমৰ বিভিন্ন প্ৰান্তৰ লগতে কলিয়াবৰৰো কেইবাটাও স্থানত ভূ-মাফিয়াই চলাইছে অবৈধ মাটি খনন। অঞ্চলটোত অবিৰতভাৱে চলি থকা এই কাৰ্যই স্থানীয় বাসিন্দা তথা কৃষকসকলৰ মাজত গুৰুতৰ উদ্বেগৰ সৃষ্টি কৰিছে।
সূত্ৰ অনুসৰি, কলিয়াবৰৰ চিকনি, বৰচং, ৰহাধোলা আৰু ইয়াৰ সমীপৱৰ্তী অঞ্চলসমূহত এচাম মাটিৰ ব্যৱসায়ীয়ে কৃষিভূমিত নিৰ্বিচাৰে খনন কাৰ্য চলাই আছে। প্ৰাপ্ত তথ্যমতে, এই কাৰ্যকলাপৰ ফলত কৃষিভূমিৰ বিস্তৰ ক্ষতিসাধন হোৱাৰ লগতে কৃষিজীৱি লোকসকলৰ জীৱিকাৰ প্ৰতিও তীব্ৰ ভাবুকি নামি আহিছে।
স্থানীয় ৰাইজৰ অভিযোগ যে মাটি খননৰ বাবে জেচিবি (JCB), ডাম্পাৰ আৰু ট্ৰেক্টৰৰ দৰে গধুৰ যন্ত্ৰপাতি ব্যাপকভাৱে ব্যৱহাৰ কৰা হৈছে। তেওঁলোকে দাবী কৰা মতে, বৰ্তমানৰ চৰকাৰী নিয়ম-নীতিক সম্পূৰ্ণৰূপে উলংঘা কৰি কোনো ধৰণৰ নিৰীক্ষণ অবিহনেই এই অবৈধ খনন কাৰ্য অব্যাহত আছে।
অব্যাহত থকা খনন কাৰ্যই উৰ্বৰ কৃষিভূমি স্থায়ীভাৱে ক্ষতিগ্ৰস্ত কৰাৰ আশংকাত স্থানীয় ৰাইজ ম্ৰিয়মাণ হৈ পৰিছে। তেওঁলোকে সংশ্লিষ্ট বিভাগ তথা প্ৰশাসনক এই বিষয়ত তাৎক্ষণিকভাৱে হস্তক্ষেপ কৰিবলৈ আৰু অবৈধ খননৰ লগত জড়িতসকলৰ বিৰুদ্ধে কঠোৰ আইনী ব্যৱস্থা গ্ৰহণ কৰিবলৈ আহ্বান জনাইছে।
মাটি নিষ্কাশন আৰু ভূমি ব্যৱহাৰৰ স্পষ্ট নিয়মাৱলী থকাৰ পিছতো কলিয়াবৰৰ এই অঞ্চলসমূহত অবৈধ খনন এক সাধাৰণ ঘটনাত পৰিণত হৈছে। পৰিৱেশ আৰু কৃষিৰ অধিক ক্ষতি ৰোধ কৰিবলৈ এতিয়া প্ৰশাসনৰ তৎপৰতাহে একমাত্ৰ আশা হৈ পৰিছে।
