বলিউদৰ অভিনেত্ৰী কংগণা ৰাণাৱট আৰু তেওঁ ভগ্নী ৰঙ্গোলী চান্দেললৈ পুনৰ চমন প্ৰেৰণ কৰিছে মুম্বাই আৰক্ষীয়ে।
সামাজিক মাধ্যমৰ যোগেদি ধৰ্মীয় বিদ্বেষ বিয়পোৱাৰ অভিযোগত দুই ভগ্নীলৈ মুম্বাই আৰক্ষীয়ে একেলেথাৰিয়ে তিনিবাৰ চমন প্ৰেৰণ কৰিছে।
মুম্বাই আৰক্ষীয়ে অহা ২৩-২৪ নৱেম্বৰত বান্দ্ৰা থানাত দুই ভগ্নীক হাজিৰ হ’বলৈ নিৰ্দেশ দিছে।
উল্লেখ্য যে বলিউদৰ অভিনেত্ৰী কংগণা আৰু ভগ্নী ৰঙ্গোলীয়ে টুইটাৰ যোগে সাম্প্ৰদায়িক বিষবাষ্প বিয়পোৱাৰ লগতে দুটা ধৰ্মীয় লোকৰ মাজত অশান্তি সৃষ্টি কৰোৱাৰ চেষ্টা কৰা বুলি আৰক্ষীৰ ওচৰত অভিযোগ দাখিল কৰা হৈছিল।
যোৱা অক্টোবৰ মাহত মুম্বাইৰ এগৰাকী কাষ্টিং ডাইৰেক্টৰে কংগণা আৰু তেওঁৰ ভগ্নীৰ বিৰুদ্ধে চ’ছিয়েল মিডিয়াৰ লগতে টেলিভিশ্যন চেনেলটো সাম্প্ৰদায়িক ঘৃণা বিয়পোৱাৰ চেষ্টা কৰা বুলি আৰক্ষীক অভিযোগ দাখিল কৰিছিল।
এই অভিযোগৰ ভিত্তিতে মুম্বাই আৰক্ষীক বান্দ্ৰা মেট্ৰ’পলিটান আদালতে এটা গোচৰ ৰুজু কৰিবলৈ নিৰ্দেশ দিছিল।
আদালতৰ নিৰ্দেশ মৰ্মেই মুম্বাই আৰক্ষীয়ে কংগণাৰ লগতে কংগণা আৰু তেওঁৰ ভগ্নীলৈ চমন প্ৰেৰণ কৰিছে।
উল্লেখ্য যে ইয়াৰ পূৰ্বে চলিত বৰ্ষৰ মাৰ্চৰ ৯ তাৰিখে দুই অভিযুক্তলৈ চমন প্ৰেৰণ কৰি ১০ তাৰিখে থানাত উপস্থিত হ’বলৈ নিৰ্দেশ দিয়া হৈছিল যদিও ভাতৃৰ বিয়াৰ বাবে দুয়োৱে সময় বিচাৰিছিল।
