কালিৰ (শুকুৰবাৰ) দিনটো বলীউডৰ বাবে যথেষ্ট গুৰুত্বপূৰ্ণ আৰু আকৰ্ষণীয় আছিল, কাৰণ একেদিনাই ছবিগৃহত মুক্তি পাইছে বিভিন্ন ধাৰাৰ তিনিখন ছবি। একেদিনাই ডাঙৰ পৰ্দাত মুক্তি পালে কংগনা ৰানাৱতৰ ‘ভাৰত ভাগ্য বিধাতা’, দিলজিৎ দোচাঞ্জৰ ‘মেই ৱাপছ আউংগা’ আৰু প্ৰবীণ অভিনেতা মনোজ বাজপেয়ীৰ ‘গভৰ্ণৰ’ ছবি। এতিয়া প্ৰথম দিনাৰ বক্স অফিচত ছবিসমূহৰ সংগ্ৰহৰ পৰিসংখ্যাও চৰ্চালৈ আহিছে।
বক্স অফিচৰ প্ৰতিবেদন
মুকলি দিনৰ সংগ্ৰহত বাণিজ্য বিশ্লেষকসকল অলপ আচৰিত হৈছে। কাৰণ কোনো এখন ছবিয়েই বক্স অফিচত ডাঙৰ বা বিস্ফোৰক আৰম্ভণি কৰিব নোৱাৰিলে। তাতোকৈ আচৰিত কথাটো হ’ল, তাৰকাৰে ভৰা শক্তিশালী অভিনেতা-অভিনেত্ৰী থকাৰ পাছতো তিনিখন ছবিৰ কোনো এখনেই প্ৰথম দিনাই ১ কোটিৰ সীমা স্পৰ্শ কৰিব নোৱাৰিলে।
‘ভাৰত ভাগ্য বিধাতা‘
প্ৰথম দিনাৰ সংগ্ৰহঃ ০.৭৬ কোটি টকা
অভিনয়: কংগনা ৰানাৱত, গিৰিজা অক আৰু স্মিতা টাম্বে।
‘ভাৰত ভাগ্য বিধাতা’ ২৬/১১ মুম্বাইত সংঘটিত সন্ত্ৰাসবাদী আক্ৰমণৰ হৃদয় বিদাৰক আৰু ৰোমাঞ্চকৰ সত্য কাহিনী। কেমা হাস্পতালৰ চিকিৎসক আৰু স্বাস্থ্যসেৱা কৰ্মীসকলৰ অসাধাৰণ বীৰত্বৰ কাহিনী বৰ্ণনা কৰা হৈছে, যিয়ে নিজৰ জীৱনকো তুচ্ছ কৰি ৰোগীক বচাইছিল।
এই ছবিখনত কংগনা ৰানাৱটে এগৰাকী নাৰ্ছৰ চৰিত্ৰত অভিনয় কৰিছে। অতি শক্তিশালী আৰু আৱেগিক বিষয়বস্তুৰ মাজতো ছবিখনে মুক্তিৰ প্ৰথম দিনাই আশানুৰূপ দৰ্শকক আকৰ্ষণ কৰাত ব্যৰ্থ হয়। ফলত প্ৰথম দিনটোৰ সংগ্ৰহ ০.৭৬ কোটি টকাতে সীমাবদ্ধ হৈ পৰিল।
‘মেইন ৱাপছ আউংগা‘
প্ৰথম দিনাৰ সংগ্ৰহঃ ০.৯১ কোটি টকা
অভিনয়: দিলজিৎ দোচাঞ্জ, বেদাং ৰাইনা, নাছিৰুদ্দিন শ্বাহ আৰু শৰ্ৱৰী ওৱাঘ।
প্ৰখ্যাত পৰিচালক ইমতিয়াজ আলীৰ পৰিচালনাত নিৰ্মিত ‘মেই ৱাপছ আউংগা’ এখন পিৰিয়ডিক প্ৰেম কাহিনী। শুকুৰবাৰে মুক্তি পোৱা তিনিখন ছবিৰ ভিতৰত এই ছবিখনে দৰ্শকৰ পৰা সৰ্বাধিক সমৰ্থন আৰু মৰম লাভ কৰিছে। ছবিখনত দিলজিৎ দোচাঞ্জ আৰু শৰ্বৰী ওৱাঘৰ অন স্ক্ৰীণ কেমিষ্ট্ৰীয়ে দৰ্শকৰ যথেষ্ট সমাদৰ লাভ কৰে।
ইয়াৰ লগতে নাছিৰুদ্দিন শ্বাহ আৰু বেদাং ৰাইনাৰ অভিনয়েও ছবিখনক অধিক শক্তিশালী কৰি তুলিছে। আকৰ্ষণীয় গীত আৰু ইমতিয়াজ আলীৰ অনন্য ৰোমান্টিক কাহিনী কোৱা শৈলীৰ বলত ছবিখনে মুক্তিৰ প্ৰথম দিনাই ০.৯১ কোটি টকাৰ ব্যৱসায় কৰিছে।
‘গভৰ্ণৰ‘
প্ৰথম দিনাৰ সংগ্ৰহঃ ০.৬৯ কোটি টকা
অভিনয়: মনোজ বাজপেয়ী, আদা শৰ্মা আৰু নৌছাদ মহম্মদ কুঞ্জু।
ভাৱ গধূৰ আৰু চিন্তাশীল ছবি ভাল পোৱা দৰ্শকৰ বাবে পৰিচালক চিন্ময় মাণ্ডলেকাৰে লৈ আহিছে ‘গভৰ্ণৰ’। এইখন এখন ৰাজনৈতিক নাট্যধৰ্মী ছবি, যাৰ পটভূমি ১৯৯১ চনত ভাৰতৰ ঐতিহাসিক অৰ্থনৈতিক সংকট।
যদিও ইয়াক গুৰুত্বপূৰ্ণ আৰু গভীৰ বিষয়বস্তুৰে নিৰ্মাণ কৰা হৈছে, তথাপিও ছবিখন মূলতঃ এটা নিৰ্দিষ্ট শ্ৰেণীৰ দৰ্শকৰ বাবে নিৰ্মাণ কৰা হৈছে। সেইবাবেই মুক্তিৰ প্ৰথম দিনাই ছবিখনৰ বক্স অফিচ যাত্ৰা বৰ বেছি ভাল নাছিল। প্ৰথম দিনা মাত্ৰ ০.৬৯ কোটি টকাৰ ব্যৱসায় কৰিবলৈ সক্ষম হৈছে ‘গভৰ্ণৰ’য়ে।
যদিও তিনিখন ছবিৰ বিষয়বস্তুৰ বৈচিত্ৰ্য আছে, তথাপিও কোনো এখন ছবিয়ে বক্স অফিচত বৃহৎ সফলতা লাভৰ কোনো লক্ষণ দেখা পোৱা নাই। কিন্তু বাণিজ্য বিশেষজ্ঞসকলৰ মতে ছুটিৰ দিনত যদি দৰ্শকৰ সংখ্যা বৃদ্ধি পায় তেন্তে ছবিসমূহৰ আয়ৰ ক্ষেত্ৰত যথেষ্ট পৰিৱৰ্তন হ’ব পাৰে। এতিয়া দেখা যাওক কোনখন ছবিয়ে সাপ্তাহান্তিকত সৰ্বাধিক দৰ্শকক আকৰ্ষণ কৰিব পাৰে আৰু বক্স অফিচৰ যুঁজত আগবাঢ়িব পাৰে।
