প্ৰথমতে চূৰচূৰীয়াকৈ গুণগুণনি আৰম্ভ হৈছিল। প্ৰেমৰ ফান্দত পৰিছে কৰ্ণাটকৰ এজন মন্ত্ৰী। ক্ৰমান্বয়ে ই এক বৃহৎ বিতৰ্কলৈ পৰিণত হৈছে। কোৱা হৈছে যে সেই মন্ত্ৰীগৰাকীয়ে অকল নহয়, মুঠ ৪৮ জন ৰাজনৈতিক নেতা হানী ট্ৰেপিঙত ফান্দত পৰিছে। ইয়াৰ ভিতৰত কেন্দ্ৰীয় পৰ্যায়ৰ নেতাও আছে।
কৰ্ণাটকৰ সমবায় মন্ত্ৰী কে এন ৰাজন্নাই বৃহস্পতিবাৰে বিধানসভাত স্বীকাৰ কৰে যে ৪৮ জন ৰাজনৈতিক নেতা সেই জালত পৰিছে। স্বাভাৱিকতে এনে কথাত বিধানসভাত বিতৰ্কৰ সূচনা হয়।
ৰাজন্নাই কয় যে এইটো কোনো বিশেষ দলৰ কথা নহয়। সমগ্ৰ বিষয়টো চোৱাচিতা কৰিবলৈ তেওঁ উচ্চ পৰ্যায়ৰ তদন্তৰ আহ্বান জনাইছে। তেওঁ কোৱা শুনা যায়, “মই জনাত ৪৮ জন সেই চিডি আৰু পেন ড্ৰাইভৰ ফান্দত পৰিছে।” আনকি তেওঁ বিৰোধী বিধায়কসকলৰ ফালে আঙুলিয়াই কয়, “তেওঁলোকও ইয়াৰ লগত জড়িত।”
পিছত অধ্যক্ষক সম্বোধন কৰি ৰাজন্নাই কয়, “সন্মানীয় অধ্যক্ষ, কৰ্ণাটকক চিডি আৰু পেন ড্ৰাইভৰ কাৰখানা বুলি কোৱা হয়! মই এই কথা কোৱা নাই, বহুতে কৈছে। এইটো এটা গুৰুতৰ অভিযোগ। খবৰ পাইছো যে টুমাকুৰুৰ দুজন শক্তিশালী মন্ত্ৰী হানী ট্ৰেপিঙত পৰিছে। তাৰ ভিতৰত মই টুমাকুৰুৰ মন্ত্ৰী। আনজন হৈছে ড° পৰমেশ্বৰ। আমাৰ দুজনৰ বাহিৰে আৰু বহুতৰে কাহিনী ঘুৰি ফুৰিছে। ইয়াত সকলোবোৰ উল্লেখ কৰাটো সঠিক নহ’ব।”
এই সন্দৰ্ভত তেওঁ গৃহমন্ত্ৰীলৈ পত্ৰ লিখি সম্পূৰ্ণ তদন্তৰ দাবী জনাব বুলিও দাবী কৰে। ৰাজন্নাৰ প্ৰশ্ন, “এই সকলোবোৰৰ প্ৰযোজক কোন? পৰিচালক কোন? এই সকলোবোৰ প্ৰকাশ হওক। মানুহৰ জনা অধিকাৰ আছে।”
ৰাজন্নাৰ পুত্ৰ এম এল চি ৰাজন্নাইও এই বিষয়ত মাত মাতিছে। তেওঁ দাবী কৰে যে বিগত ছমাহ ধৰি ৰাজনীতিবিদক হানী ট্ৰেপিঙত পেলোৱাৰ চেষ্টা কৰা হৈছে। অভিযোগ অনুসৰি হোৱাটছএপত ফোন বা মেছেজ কৰিও জাল পতা হৈছে। প্ৰসংগক্ৰমে কৰ্ণাটক ৰাজ্যৰ ৰাজনীতিত বৰ্তমান এই বিষয়টোক লৈ উত্তাল হৈ পৰিছে। লগতে সমগ্ৰ বিষয়টোৰ তদন্তৰ দাবী জনাইছে বিজেপিয়ে। কংগ্ৰেছেও সৰৱ হৈছে। ইফালে বিষয়টো মুখ্যমন্ত্ৰী সিদ্দাৰমাইয়াৰ ওচৰলৈও গৈছে। তেওঁক ফান্দত পেলাবলৈ চেষ্টা কৰা বুলিও অভিযোগ উত্থাপন কৰিছে এজন মন্ত্ৰীয়ে।
