সংসদত আক্ৰমণৰ ঘটনা! গ্ৰেপ্তাৰ কৰ্ণাটকৰ প্ৰাক্তন আৰক্ষী বিষয়াৰ পুত্ৰ, উত্তৰ প্ৰদেশৰ নিবনুৱা যুৱক

দিন পাৰ হৈ যোৱাৰ লগে লগে সংসদ আক্ৰমণৰ ঘটনাৰ নতুন নতুন তথ্য পোহৰলৈ আহি আছে। যোৱা সপ্তাহত লোকসভাত স্মোক বোম বিস্ফোৰণ কাণ্ডত এই পৰ্যন্ত ৬ জন লোকক গ্ৰেপ্তাৰ কৰা হৈছে। এইবাৰ দিল্লী আৰক্ষীয়ে আৰু দুজন লোকক গ্ৰেপ্তাৰ কৰে। তাৰ ভিতৰত এজন কৰ্ণাটকৰ এজন প্ৰাক্তন শীৰ্ষ আৰক্ষী বিষয়াৰ পুত্ৰ। তদন্তকাৰীৰ মতে, এই আটকাধীন যুৱক দুজনো প্ৰত্যক্ষভাৱে এই আক্ৰমণৰ সৈতে জড়িত আছিল।

দিল্লী আৰক্ষীয়ে বুধবাৰে নিশা কৰ্ণাটকৰ বাগালকোটৰ পৰা সাই কৃষ্ণ নামৰ এজন যুৱকক গ্ৰেপ্তাৰ কৰে। এইজন সাই কৃষ্ণ বগলকোটৰ প্ৰাক্তন ডিএছপিৰ পুত্ৰ। আৰক্ষীৰ সূত্ৰ অনুসৰি সাই সংসদত আক্ৰমণ কৰা মনোৰঞ্জন ডিৰ ঘনিষ্ঠ বন্ধু।

লগতে পঢ়কঃ উপ-ৰাষ্ট্ৰপতি ধনখৰক ভেঙুচালি! বিতৰ্কৰ মাজত ৰাহুলৰ ওপৰতে দোষ চাপিলে মমতাই?

বাংগালুৰুৰ অভিযান্ত্ৰিক মহাবিদ্যালয়ত দুয়ো একেলগে অধ্যয়ন কৰিছিল। শেহতীয়াকৈ তেওঁ ঘৰৰ পৰাই আই টি কোম্পানী এটাত কাম কৰি আছিল। ঘৰতে থাকি মনোৰঞ্জনহঁতক সহায় কৰাৰ অভিযোগ উঠিছে যুৱকজনৰ বিৰুদ্ধে। দিল্লী আৰক্ষীয়ে তেওঁক সোধা-পোছা কৰি আছে।

কৰ্ণাটকৰ প্ৰাক্তন আৰক্ষী বিষয়াৰ পুত্ৰৰ উপৰি দিল্লী আৰক্ষীয়ে সংসদ আক্ৰমণৰ ঘটনাৰ সৈতে জড়িত উত্তৰ প্ৰদেশৰ এজন নিবনুৱা যুৱককো গ্ৰেপ্তাৰ কৰিছে। উত্তৰ প্ৰদেশৰ জালায়ুনৰ পৰা অতুল কুলশ্ৰেষ্ঠ নামৰ যুৱকজনক গ্ৰেপ্তাৰ কৰা হৈছে।

দিল্লী আৰক্ষীয়ে জনোৱা মতে, যুৱকজনে মূল অভিযুক্তৰ সৈতে নিয়মীয়াকৈ চ্যাটত কথা পাতিছিল। কিন্তু তেওঁৰ অতীতৰ অপৰাধজনিত তথ্য নাই। ৰাজনৈতিক সংযোগো নাই। কিন্তু তেওঁ শ্বহীদ ভগত সিঙৰ চিন্তাধাৰাৰ দ্বাৰা অনুপ্ৰাণিত।

লগতে পঢ়কঃ পত্ৰৰ পিছত পত্ৰ! প্ৰতাৰক চন্দ্ৰশেখৰৰ পৰা বাচিবলৈ নিৰাপত্তা বিচাৰিলে অভিনেত্ৰী জেকলিনে

আৰক্ষীয়ে দুয়োকে আটক কৰি জেৰা অব্যাহত ৰাখিছে। তেওঁলোকৰ পৰা অধিক তথ্য লাভ কৰিবলৈ চেষ্টা কৰা হৈছে। তেওঁলোকক জিম্মাত লোৱাৰ সম্ভাৱনাও আছে।