অসমৰ প্ৰাণৰ শিল্পী জুবিন গাৰ্গৰ অকাল মৃত্যুত সমগ্ৰ ৰাজ্যই শোকত কাতৰ হৈ পৰিছে। অজস্ৰ অনুৰাগীৰ লগতে চৰকাৰেও কণ্ঠশিল্পীগৰাকীক শ্ৰদ্ধাঞ্জলি জনোৱাৰ বাবে বিভিন্ন পদক্ষেপ গ্ৰহণ কৰিছে।
এইবাৰ অনন্য ৰূপত জনতাৰ মৰমৰ কণ্ঠশিল্পীগৰাকীক শ্ৰদ্ধাঞ্জলি জনোৱা হৈছে। কাজিৰঙা ৰাষ্ট্ৰীয় উদ্যানত জুবিনৰ গানেৰেই নামাকৰণ কৰা হৈছে এটি নৱজাত হাতী পোৱালিৰ।
বিশ্ব পশু দিৱসৰ দিনা শনিবাৰে কাজিৰঙা ৰাষ্ট্ৰীয় উদ্যানত এটা হাতী পোৱালিৰ জন্ম হয়। এই অৰণ্যৰ আটাইতকৈ আদৰৰ হাতী কুঁৱৰী এই দিনটোতে মাতৃ হয়।
অৰণ্যৰ আটাইতকৈ আদৰৰ হাতীটো মাতৃ হোৱাৰ খবৰটো স্বাভাৱিকতে অতি আনন্দৰ খবৰ। সেই কুঁৱৰীয়ে পোৱালি জন্ম দিছে আৰু ফলত গোটেই অভয়াৰণ্যতে আনন্দৰ জোৱাৰ উঠিছে। হাতী পোৱালিটোক চাবলৈ ইতিমধ্যে ভিৰ কৰিছে পৰ্যটকে।
পৰিয়ালত নতুন আলহীৰ আগমনৰ দৰেই চৌদিশে আনন্দৰ পৰিৱেশ। আৰু সেই হাতী পোৱালিটোৰ নাম ৰখা হৈছে ‘মায়াবিনী’। যিটো জুবিনৰ এটি অতি জনপ্ৰিয় গান।
বনমন্ত্ৰী চন্দ্ৰ মোহন পাটোৱাৰীয়ে লিখিছে, “হাতী পোৱালিটোক ‘মায়াবিনী’ নাম দিয়া হৈছে, যাৰ ফলত অৰণ্যৰ জীৱনৰ ওপৰত এক নতুন পোহৰ পৰিছে।”
উল্লেখ্য যে যোৱা ২০ ছেপ্টেম্বৰত অসমৰ হিয়াৰ আমঠু কণ্ঠশিল্পী জুবিন গাৰ্গৰ মৃত্যু হয়। নৰ্থ-ইষ্ট ফেষ্টিভেলত অংশগ্ৰহণ কৰিবলৈ ছিংগাপুৰলৈ গৈছিল গায়কগৰাকী। তাতেই কেইগৰাকীমান সহযোগী তথা স্থানীয় অসমীয়া লোকৰ সৈতে সাগৰত ফুৰিবলৈ গৈ সাঁতুৰিবলৈ নামি প্ৰাণ হেৰুৱায় জুবিনে।
জুবিনৰ মৃত্যুত শোকস্তব্ধ হৈ পৰিছে সংগীত জগতৰ লগতে লাখ লাখ অনুৰাগী। ইপিনে, তেওঁৰ ৰহস্যজনক মৃত্যুৰ ঘটনাক লৈ তদন্ত অব্যাহত আছে।
