কাজিৰঙা ৰাষ্ট্ৰীয় উদ্যানৰ প্ৰস্তাৱিত পৰিৱেশ-সংবেদনশীল অঞ্চল (Eco-Sensitive Zone বা ESZ) সংকোচনৰ বাবে অসম চৰকাৰে আগবঢ়োৱা পদক্ষেপৰ তীব্ৰ বিৰোধিতা কৰিছে ইলোৰা বিজ্ঞান মঞ্চই। এই সিদ্ধান্ত তাৎক্ষণিকভাৱে পুনৰ্বিবেচনা কৰিবলৈ চৰকাৰক আহ্বান জনাই মঞ্চই এক প্ৰেছ বিবৃতিযোগে নিজৰ স্থিতি স্পষ্ট কৰে।
সংগঠনটোৰ সভাপতি ডাঃ মনোৰঞ্জন শৰ্মা আৰু সাধাৰণ সম্পাদক মনোজ ৰায়ে প্ৰকাশ কৰা বিবৃতি অনুসৰি, কাজিৰঙা ৰাষ্ট্ৰীয় উদ্যান, ইয়াৰ সংলগ্ন ব্যাঘ্ৰ সংৰক্ষিত অঞ্চল আৰু কাষৰীয়া ভূ-অঞ্চলসমূহে এক অনন্য আৰু জৈৱিকভাৱে স্পৰ্শকাতৰ পৰিস্থিতিতন্ত্ৰ (Ecosystem) গঢ়ি তুলিছে। বিশেষকৈ বাৰিষাৰ সময়ত কাজিৰঙাৰ বানপানীৰ গতিপ্ৰকৃতি আৰু দক্ষিণৰ দাঁতিকাষৰীয়া কাৰ্বি আংলঙৰ পাহাৰৰ সৈতে থকা ভৌগোলিক সংযোগেই উদ্যানখনৰ বন্যপ্ৰাণীৰ মূল জীৱনৰেখা। বানৰ সময়ত গঁড়, হাতী, বনৰীয়া ম’হ আদিকে ধৰি অসংখ্য বন্যপ্ৰাণীয়ে কাৰ্বি আংলঙৰ ওখ ঠাইলৈ আশ্ৰয় বিচাৰি গতি কৰে। চৰকাৰীভাৱে চিহ্নিত ৯টা বন্যপ্ৰাণী কৰিডৰে এই পৰিৱেশগত সংযোগৰ গুৰুত্বৰ সাক্ষ্য বহন কৰে।
সৰ্বোচ্চ ন্যায়ালয়েও কাজিৰঙা–কাৰ্বি আংলং অঞ্চলৰ ভৌগোলিক সংবেদনশীলতা স্বীকাৰ কৰি কাৰ্বি আংলঙৰ পাহাৰৰ পৰা কাজিৰঙালৈ বৈ অহা নৈ-নিজৰাৰ জলগ্ৰহণ অঞ্চলত খনন কাৰ্য নিষিদ্ধ কৰাৰ লগতে কৰিডৰসমূহত নিৰ্মাণ কাৰ্য নিয়ন্ত্ৰণ কৰিছে। এনে সময়ত চূড়ান্ত পৰিৱেশ-সংবেদনশীল অঞ্চল নিৰ্ধাৰণ নোহোৱালৈকে বাহাল থকা ১০ কিলোমিটাৰৰ সুৰক্ষা-সীমাৰ ঠাইত স্থানভেদে ১–৩ কিলোমিটাৰলৈ সংকুচিত কৰিব বিচৰা চৰকাৰী প্ৰস্তাৱ বিজ্ঞানসন্মত নহয় বুলি মঞ্চই উল্লেখ কৰে। সৰ্বনিম্ন আইনী মানদণ্ড এক কিলোমিটাৰ হ’লেও কাজিৰঙাৰ দৰে জটিল জৈৱ-বৈচিত্ৰ্যপূৰ্ণ অঞ্চলৰ বাবে সেয়া যথেষ্ট হ’ব নোৱাৰে।
ইলোৰা বিজ্ঞান মঞ্চই লগতে স্পষ্ট কৰে যে স্থানীয় বাসিন্দাৰ জীৱিকা আৰু প্ৰয়োজনীয় উন্নয়নমূলক কাম-কাজৰ প্ৰতি তেওঁলোকৰ পূৰ্ণ সমৰ্থন আছে। কিন্তু তাৰ সুযোগ লৈ কাজিৰঙা আৰু ইয়াৰ চৌপাশে প্ৰস্তাৱিত পঞ্চতাৰকা হোটেল, বিলাসী ৰিজৰ্ট আৰু বৃহৎ পৰিসৰৰ বাণিজ্যিক চাহ-পৰ্যটন প্ৰকল্পসমূহৰ বাবে পৰিৱেশৰ ক্ষতি হ’বলৈ দিয়া অনুচিত। সেয়েহে কোনো চূড়ান্ত সিদ্ধান্ত গ্ৰহণৰ পূৰ্বে বন্যপ্ৰাণীৰ চলাচল, জলপ্ৰবাহ আৰু বহনক্ষমতাৰ ওপৰত ভিত্তি কৰি এক নিৰপেক্ষ আৰু ব্যাপক বৈজ্ঞানিক অধ্যয়ন সম্পন্ন কৰিবলৈ মঞ্চই চৰকাৰৰ ওচৰত দাবী জনাইছে।
