অসমৰ গৌৰৱ কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্পৰ পৰা মধ্যপ্ৰদেশৰ কানহা ব্যাঘ্ৰ প্ৰকল্পলৈ পৰ্যায়ক্ৰমে প্ৰায় ৫০টা বনৰীয়া এছীয় ম‘হ স্থানান্তৰ কৰাৰ সকলো আনুষ্ঠানিকতা ইতিমধ্যে সম্পূৰ্ণ কৰা হৈছে। এই স্থানান্তৰণ প্ৰক্ৰিয়াৰ অংশ হিচাপে প্ৰথম অৱস্থাত ১৫টা বনৰীয়া ম‘হ কানহালৈ প্ৰেৰণ কৰাৰ সিদ্ধান্ত গ্ৰহণ কৰা হৈছে। প্ৰজাতিটোৰ উন্নত সংৰক্ষণ আৰু মধ্যপ্ৰদেশৰ বনাঞ্চলত পুনৰ সংস্থাপনৰ উদ্দেশ্যে এই গুৰুত্বপূৰ্ণ পদক্ষেপ গ্ৰহণ কৰা হৈছে।
পূব অসম বন্যপ্ৰাণী সংমণ্ডলৰ (কাজিৰঙা) বিভাগীয় বন বিষয়া অৰুণ বিঘ্নেশে জানিবলৈ দিয়া মতে, কৰ্তৃপক্ষই প্ৰথম পৰ্যায়ত একেলগে ১৫টা এছীয় বনৰীয়া ম‘হ স্থানান্তৰ কৰাৰ পৰিকল্পনা কৰিছিল যদিও প্ৰায়োগিক কাৰণত সেয়া সম্ভৱ নহ‘বও পাৰে। সেয়েহে, বৃহৎ পৰিমাণৰ ম‘হ স্থানান্তৰ কৰাৰ সম্ভাৱনীয়তা পৰীক্ষা কৰিবলৈ প্ৰথমে ৫ৰ পৰা ৬টা ম‘হ প্ৰেৰণ কৰা হ‘ব। অহা ১৮ আৰু ১৯ মাৰ্চত কাজিৰঙাৰ পৰা বনৰীয়া ম‘হসমূহ ট্ৰেংকুলাইজ (tranquillization) অৰ্থাৎ চেতনানাশক প্ৰয়োগ কৰি ধৰাৰ প্ৰক্ৰিয়া আৰম্ভ হ‘ব। ইয়াৰ প্ৰস্তুতি হিচাপে সোমবাৰে বনৰীয়া ম‘হ স্থানান্তৰণ ৰূপায়ণ সমিতিৰ এটা দলে এক ‘মক ড্ৰিল’ সম্পন্ন কৰে।
বন বিষয়া বিঘ্নেশে লগতে উল্লেখ কৰে যে অতীতত মধ্যপ্ৰদেশৰ কানহাত বনৰীয়া ম‘হৰ অৱস্থিতি আছিল। সেয়েহে মধ্যপ্ৰদেশ কৰ্তৃপক্ষই পুনৰ সংস্থাপন কাৰ্যসূচীৰ অংশ হিচাপে তেওঁলোকৰ বনাঞ্চলত এই জলজ ম‘হসমূহ মুকলি কৰি দিব বিচাৰে।
উল্লেখযোগ্য যে, ইয়াৰ পূৰ্বেও মানাহ ব্যাঘ্ৰ প্ৰকল্পৰ পৰা ছত্তীশগড়লৈ কেইটামান বনৰীয়া ম‘হ স্থানান্তৰিত কৰা হৈছিল। বৰ্তমান কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্পত এহেজাৰতকৈয়ো অধিক এছীয় বনৰীয়া ম‘হ আছে।
