অসমৰ ভয়াবহ বান পৰিস্থিতিৰ পিছতে এই বাৰ বিগত কেইবাদিনো ধৰি অব্যাহত থকা নেৰানেপেৰা বৰষুণৰ ফলত সম্পূৰ্ণৰূপে বিপৰ্যস্ত হৈ পৰিছে কেৰালাৰ জনজীৱন। ৰাজ্যখনত প্ৰাকৃতিক দুৰ্যোগৰ ফলত হোৱা বিভিন্ন দুৰ্ঘটনাত সোমবাৰলৈকে মৃত্যু হোৱা লোকৰ সংখ্যা ১৫ জনলৈ বৃদ্ধি পোৱাৰ লগতে আন ৭ জন লোক বৰ্তমানো নিৰুদ্দেশ হৈ আছে। সোমবাৰে পুৱা ৰাজ্যৰ মুখ্যমন্ত্ৰীয়ে কেৰালাৰ বান পৰিস্থিতিৰ পৰ্যালোচনা কৰি উচ্চপদস্থ বিষয়াসকলৰ সৈতে এখন জৰুৰীকালীন বৈঠকত মিলিত হয়। পৰৱৰ্তী সময়ত চৰকাৰৰ তৰফৰ পৰা সংবাদমেল যোগে উদ্ধাৰ আৰু সাহায্য অভিযান ক্ষিপ্ৰতৰ কৰাৰ কথা প্ৰকাশ কৰে।
সোমবাৰে পুৱা ৯ বজালৈকে প্ৰাপ্ত তথ্য অনুসৰি, সমগ্ৰ ৰাজ্যতে ৩১৬ টা ত্ৰাণ শিবিৰ মুকলি কৰা হৈছে। বৰষুণ আৰু বানৰ ফলত গৃহহীন হোৱা ১১,০১৮ জন লোকে এই শিবিৰসমূহত আশ্ৰয় লৈছে। কেৱল আলপ্পুঝা জিলাতেই ৩৭৭ টা পৰিয়ালৰ ১,৩০০ গৰাকী লোকক নিৰাপদ স্থানলৈ স্থানান্তৰ কৰা হৈছে। ইয়াৰ ভিতৰত চেংগান্নুৰ অঞ্চলত সৰ্বাধিক ১৭ টা শিবিৰত ২১৩ টা পৰিয়ালৰ ৭৫৯ জন লোকে আশ্ৰয় গ্ৰহণ কৰি আছে। আনহাতে, কোঝিকোডৰ পৰম্বিল বজাৰ অঞ্চল বানত বুৰ যোৱাৰ ফলত প্ৰায় ২০০ টা পৰিয়ালক নিৰাপদ স্থানলৈ লৈ যোৱা হৈছে আৰু কক্কায়াম জলাশয়ৰ পানী নিৰ্ধাৰিত সৰ্বোচ্চ সীমাৰ কাষ চপাৰ লগে লগে সমগ্ৰ জিলাখনতে উচ্চ সতৰ্কতা জাৰি কৰা হৈছে। পথনমথিট্টা জিলাতো জৰুৰীকালীন প্ৰস্তুতি চলোৱা হৈছে। এৰ্নাকুলামত মুভাট্টুপুঝা আৰু থোডুপুঝাকে ধৰি প্ৰধান নদীসমূহৰ পানী বিপদসীমাৰ ওপৰেৰে বৈছে আৰু ইদুক্কিত নেৰানেপেৰা বৰষুণৰ ফলত নদীবান্ধৰ জলপৃষ্ঠ ক্ৰমাৎ বৃদ্ধি পাবলৈ ধৰিছে।
বৰষুণৰ প্ৰকোপ কিছু পৰিমাণে হ্ৰাস পাইছে যদিও মধ্যমীয়াৰ পৰা ধাৰাষাৰ বৰষুণ এতিয়াও অব্যাহত আছে। বতৰ বিজ্ঞান বিভাগে সোমবাৰে কেৰালাৰ বতৰৰ সতৰ্কবাণী হালধীয়াৰ পৰা কমলা ৰঙলৈ (Orange Alert) উন্নীত হৈছে। তিৰুৱনন্তপুৰম, কোল্লাম, ত্ৰিশুৰ আৰু পালক্কাড় জিলাৰ বাহিৰে ৰাজ্যখনৰ আন সকলো জিলাতেই অতিমাত্ৰা বৰষুণৰ আশংকা প্ৰকাশ কৰি এই সতৰ্কতা জাৰি কৰা হৈছে। ইফালে, দুৰ্যোগৰ মাজতে ৰাজ্যৰ বিদ্যুৎ বিভাগৰ মন্ত্ৰীয়ে জানিবলৈ দিয়ে যে বানত ক্ষতিগ্ৰস্ত হোৱা ৯২ শতাংশ বিদ্যুৎ সংযোগ ইতিমধ্যে পুনৰুদ্ধাৰ কৰা হৈছে আৰু বাকী মেৰামতিৰ কাম ক্ষিপ্ৰতাৰে চলি আছে।
এই প্ৰাকৃতিক দুৰ্যোগৰ প্ৰভাৱ কেৱল সাধাৰণ জনজীৱনতেই নহয়, বৰঞ্চ ৰাজ্যখনৰ অৰ্থনীতিতো মাধমাৰ শোধাইছে। আগন্তুক ‘ওনাম’ উৎসৱৰ পূৰ্বে অহা এই বানপানীৰ বাবে ব্যৱসায়ীসকল এক বৃহৎ লোকচানৰ সন্মুখীন হৈছে। কেৰালা মাৰ্চেণ্টছ চেম্বাৰ অৱ কমাৰ্চৰ সভাপতি পি নিয়াজাৰে প্ৰকাশ কৰা অনুসৰি, শ শ ব্যৱসায়িক প্ৰতিষ্ঠানৰ কোটি কোটি টকাৰ সা-সম্পত্তি পানীত বিনষ্ট হৈছে। উৎসৱৰ বতৰৰ বাবে ধাৰলৈ হ’লেও বৃহৎ পৰিমাণত মজুত কৰি ৰখা সামগ্ৰী নষ্ট হোৱাৰ ফলত ক্ষুদ্ৰ ব্যৱসায়ীসকল তীব্ৰ বিত্তীয় সংকটত পৰিছে আৰু চৰকাৰে উচিত পদক্ষেপ গ্ৰহণ নকৰিলে বহু ব্যৱসায় বন্ধ হৈ পৰাৰো আশংকা কৰা হৈছে।
ইফালে, বিৰোধী দলে এই দুৰ্যোগক লৈ ৰাজনীতি কৰা বুলি অভিযোগ উত্থাপন কৰিছে ৰাজ্যৰ স্বাস্থ্যমন্ত্ৰীয়ে। তেওঁ দাবী কৰে যে ত্ৰাণ শিবিৰসমূহত পৰ্যাপ্ত পৰিমাণৰ ঔষধ মজুত আছে আৰু ৰোগ প্ৰতিৰোধৰ বাবে স্বাস্থ্য বিভাগে সকলো ব্যৱস্থা ফলপ্ৰসূভাৱে গ্ৰহণ কৰিছে। শিবিৰসমূহত ঔষধৰ অভাৱ হোৱা বুলি কোনো অভিযোগ চৰকাৰে লাভ কৰা নাই বুলিও তেওঁ স্পষ্ট কৰি দিয়ে।
