কলকাতা নাইট ৰাইডাৰ্ছৰ হৈ যোৱা কেইবছৰত ম’ষ্ট ভেলুৱেব’ল প্লেয়াৰ হিচাপে নিজকে বহু ওপৰলৈ তুলিবলৈ সক্ষম হৈছে এইগৰাকী সম্ভাৱনাপূৰ্ণ দেশীয় ক্ৰিকেটাৰে।
কে কে আৰৰ বাবে নিৰ্ভৰযোগ্য দিল্লীৰ এই বেটছমেনগৰাকী হৈছে নীতিশ ৰানা। নিজৰ অদমনীয় প্ৰদৰ্শনেৰে তেওঁ ইতিমধ্যে সকলোৰে দৃষ্টি আকৰ্ষণ কৰিছে।
নীতিশে এতিয়াও টীম ইণ্ডিয়াৰ এগৰাকী নিৰ্ভৰযোগ্য মিডল অৰ্ডাৰ বেটছমেনৰ দায়িত্ব লোৱাৰ দৌৰত থাকিও অৱশ্যে সেই আকাংখিত সেই স্থান পাবলৈ সফল হোৱা নাই।
ইয়াৰ মাজতে চলিত আইপিএলত নীতিশ ৰানাক দেওবাৰে কে কে আৰে তেওঁলোকৰ প্ৰথমখন মেচত অপেনিং কৰিবলৈ পঠায়।
নীতিশে ৫৬টা বলত ৮০ৰাণৰ এক দৰ্শনীয় তথা বিস্ফোৰক ইনিংছ খেলে। তেওঁ ৯টা চাৰি আৰু ৪টা ছয় কোবায়।
ছানৰাইজাৰ্ছ হায়দৰাবাদৰ মহম্মদ নবীৰ বলত বিগ শ্বট খেলিবলৈ গৈ বিজয় শংকৰ হাতত কেচ তুলি দিয়া নীতিশে ইতিমধ্যে গঢ়ে এক অনবদ্য অভিলেখ।
আইপিএলৰ ইতিহাসত প্ৰথমৰ পৰা পাঁচ নম্বৰ-এই সকলো স্থানতে বেটিং কৰি অৰ্দ্ধশতক কৰা ক্ৰিকেটাৰৰ ভিতৰত তৃতীয়গৰাকী ক্ৰিকেটাৰ হিচাপে অভিলেখ গঢ়ে।
এইক্ষেত্ৰত আন দুগৰাকী বেটছমেন হ’ল মুম্বাইৰ অধিনায়ক তথা তাৰকা বেটছমেন ৰোহিত শৰ্মা আৰু শ্বেন ৱাটছন।
