পঞ্চম পৰ্যায়ৰ লকডাউন অৰ্থাৎ আনলক-১ৰ আৰম্ভ হোৱাৰ পাছতেই কাৰ্যালয়সমূহ খুলিবলৈ লৈছে।
যাতায়ত ব্যৱস্থা স্বাভাৱিক হোৱাৰ পাছতে সকলো চৰকাৰী-বেচৰকাৰী কাৰ্যালয় সম্পূৰ্ণৰূপে খুলিব।
এনে পৰিস্থিতিত কৰ্মক্ষেত্ৰত কৰ’না ভাইৰাছৰ সংক্ৰমণ ৰোধ কৰিবলৈ বৃহস্পতিবাৰে কেন্দ্ৰীয় চৰকাৰে নিৰ্দেশনা জাৰি কৰিছে।
এই নিৰ্দেশনা অনুসৰি, লক্ষণহীন কৰ্মচাৰীসকলেহে কাৰ্যালয়ত অহাৰ অনুমতি লাভ কৰিব। জ্বৰ, চৰ্দি আদি থকা কৰ্মচাৰীক কাৰ্যালয়ত প্ৰৱেশ কৰিবলৈ দিয়া নহ’ব।
সেইদৰে কাৰ্যালয়লৈ অহা বাহিৰা লোকৰ ক্ষেত্ৰতো একেই নিয়ম প্ৰযোজ্য হ’ব।
আনহাতে, লক্ষণবিহীন হ’লেই যে কাৰ্যালয়লৈ আহিব পাৰিব সেয়া নহয়।
যিসকল কৰ্মচাৰী কনটেইনমেন্ট জ’নত থাকে তেওঁলোককো কৰ্মক্ষেত্ৰত যোগ দিবলৈ অনুমতি দিয়া নহয়।
কনটেইনমেন্ট জ’ন উঠি যোৱাৰ পাছতহে কাৰ্যালয়লৈ আহিব পাৰিব আৰু তেতিয়ালৈকে ঘৰৰ পৰাই কাম চলাব লাগিব।
ইপিনে, প্ৰতিজন বিষয়া, কৰ্মচাৰী তথা কাৰ্যালয়লৈ অহা লোকৰ মাস্ক বা ফেচ ক’ভাৰ থকাটো বাধ্যতামূলক। অন্যথা কাৰ্যালয়ত প্ৰৱেশৰ অনুমতি নাপাব।
তদুপৰি,কাৰ্যালয়ৰ সকলো স্থান ছেনিটাইজড কৰিব লাগিব। কৰ্মচাৰীসকলে সামাজিক দূৰত্ব বজাই ৰাখিব লাগিব।
মাস্কৰ উপৰি গ্ল’ভছ পিন্ধিব লাগিব আৰু সঘনাই হাত ধুই বা ছেনিটাইজাৰ ব্যৱহাৰ কৰিব লাগিব। কাৰ্যালয়ৰ চৌপাশত থু পেলোৱা নিষেধ।
আনহাতে, প্ৰতিজন কৰ্মচাৰীৰে আৰোগ্য সেতু এপ থকাটো বাধ্যতামূলক। কাৰ্যালয়ত থাৰ্মেল স্ক্ৰীণিং কৰিব লাগিব। কাৰ্যালয়ত এক মিটাৰ দূৰত্ব বজাই ৰাখি বহিব লাগিব।
কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰ্যালয়ে এই নিৰ্দেশনা জাৰি কৰিছে। ৮জুনৰ পৰা এই নিৰ্দেশনা কাৰ্যকৰীভাৱে বলবৎ হ’ব।
কাৰ্যালয়ৰ উপৰি হোটেল, ৰেষ্টুৰেন্ট তথা ধৰ্মীয় স্থানসমূহতো পালন কৰিবলগীয়া নিয়ম সম্পৰ্কে নিৰ্দেশনা জাৰি কৰা হৈছে।
