পাকঘৰত পিঁয়াজ আৰু নহৰু অবিহনে ভাৰতীয় পাকঘৰ এটা অসম্পূৰ্ণ। কাৰণ বেছিভাগ খাদ্যতে পিয়াঁজ আৰু নহৰুৰ গুৰুত্বপূৰ্ণ ভূমিকা আছে। ইহঁতে সোৱাদ বৃদ্ধি কৰে। সোৱাদৰ বাহিৰেও পিঁয়াজ আৰু নহৰু দুয়োটা স্বাস্থ্য উপকাৰী।
কিছুমানে ভাতৰ লগত কেঁচা পিঁয়াজ খাবলৈ ভাল পায়। কিছুমান খাদ্যত কেঁচা পিঁয়াজ, নহৰু ব্যৱহাৰ কৰা হয়। চালাড, চানা-মুড়িত কেঁচা পিঁয়াজ সৰু সৰুকৈ কাটি দিয়া হয়। কিছুমান চাটনি, আচাৰত কেঁচা নহৰু থাকে।
এনেদৰে কেঁচাই ব্যৱহাৰ কৰিলে পিয়াঁজ আৰু নহৰুৰ পুষ্টিকৰ গুণ সম্পূৰ্ণৰূপে উপলব্ধ হয়নে? সেই বিষয়ে জানিবলৈ চেষ্টা কৰা যাওক।
প্ৰতিৰোধ ক্ষমতা বৃদ্ধি:
পিঁয়াজ আৰু নহৰু কেঁচাই খালে ইয়াৰ এন্টি-বেক্টেৰিয়েল আৰু এন্টিমাইক্ৰ’বিয়াল গুণ অক্ষত থাকে। ই ৰোগ প্ৰতিৰোধ ক্ষমতা বৃদ্ধি কৰে। ফলত বহু ৰোগৰ পৰা ৰক্ষা পোৱা সম্ভৱ।
কলেষ্টেৰল নিয়ন্ত্ৰণ:
নহৰু আৰু পিঁয়াজত থকা ফাইবাৰ, পটাছিয়াম, এন্টিঅক্সিডেন্ট কেঁচাকৈ খালেও সম্পূৰ্ণৰূপে পোৱা যায়। ই হৃদৰোগৰ সম্ভাৱনা হ্ৰাস কৰাত সহায় কৰে। ইয়াৰ উপৰিও কলেষ্টেৰলৰ মাত্ৰাও যথেষ্ট হ্ৰাস কৰে। ৰক্তবাহী নলীত চৰ্বি জমা হোৱাৰ বাবে ঘটা হাৰ্ট এটেকৰ সম্ভাৱনা হ্ৰাস কৰে।
পাচনতন্ত্ৰৰ বাবে উপকাৰী:
পিঁয়াজ আৰু নহৰুৱে ভাল আন্ত্ৰিক বেক্টেৰিয়াৰ বৃদ্ধিত সহায় কৰে। এইবোৰ কেঁচাই খালে ভাল। ইয়াত থকা প্ৰিবায়টিক ফাইবাৰে পাচনতন্ত্ৰৰ উন্নতি সাধন কৰে। বদহজমৰ দৰে পেটৰ সমস্যা দূৰ কৰে। সিজোৱা পিঁয়াজো হজম শক্তিৰ বাবে উপকাৰী।
হৃদযন্ত্ৰ সুস্থ কৰি ৰাখে:
নহৰু আৰু পিঁয়াজত থকা ফাইবাৰ, পটাছিয়াম, এন্টিঅক্সিডেন্টে ৰক্তচাপ কমোৱাত সহায় কৰে। তেজৰ লিপিডৰ মাত্ৰা নিয়ন্ত্ৰণ কৰে। ফলত হৃদৰোগৰ সম্ভাৱনা বহু পৰিমাণে হ্ৰাস পায়। ইয়াৰ এন্টিবেক্টেৰিয়েল গুণে সংক্ৰমণৰ সম্ভাৱনা হ্ৰাস কৰে।
কৰ্কট ৰোগ প্ৰতিৰোধ:
পিঁয়াজ, নহৰুত থকা এন্টিঅক্সিডেন্ট, ফ্লেভোনয়ড কেঁচাকৈ খালেও পোৱা যায়। ই শৰীৰৰ প্ৰদাহ কমায়। ইয়াৰ ফলত কেন্সাৰ, হৃদৰোগ আদি গুৰুতৰ ৰোগৰ সম্ভাৱনা কম হয়। কেঁচা পিঁয়াজ, নহৰু খালে এন্টিঅক্সিডেন্ট, চালফাৰ যৌগ শৰীৰত প্ৰৱেশ কৰে। ই পাকস্থলী, কলন কেন্সাৰৰ বিৰুদ্ধে কাম কৰে।
পাৰ্শ্বক্ৰিয়া:
পিঁয়াজ আৰু নহৰু কেঁচাকৈ খালে স্বাস্থ্যৰ বাবে অবিশ্বাস্য উপকাৰ পোৱা যায়। কিন্তু কম পৰিমাণে সেৱন কৰিব লাগে। যিকোনো খাদ্যৰ অধিক পৰিমাণে খালে উপকাৰতকৈ পাৰ্শ্বক্ৰিয়া বেছি। পাচনতন্ত্ৰৰ সমস্যা, বুকু জ্বলাপোৰা কৰা, এচিড ৰিফ্লাক্স, এলাৰ্জী আদি সমস্যা হ’ব পাৰে। গতিকে পৰিমিত পৰিমাণৰ কেঁচা পিয়াজ আৰু নহৰু খাব। সেয়ে খালী পেটত খোৱাৰ পৰা বিৰত থাকিব লাগে। পিঁয়াজে শৰীৰ ঠাণ্ডা কৰে। গতিকে বাৰিষাৰ সময়ত কেঁচাকৈ নাখাব। গৰমৰ দিনত খোৱাটো শৰীৰৰ বাবে উপকাৰী।
যদিও পিঁয়াজ আৰু নহৰু দুয়োটা পুষ্টিকৰ, তথাপিও কেঁচাকৈ খালে ইয়াত চালফাৰৰ পৰিমাণৰ বাবে মুখৰ দুৰ্গন্ধ আৰু ঘামত গোন্ধ ওলাব পাৰে। কেঁচাই খাব বিচাৰিলে কথাটো মনত ৰাখিব।
