সকলো বয়সৰ লোকৰ বাবে চুলি সৰা এক ডাঙৰ সমস্যা। বিভিন্ন কাৰণত চুলি সৰা হ’ব পাৰে। বহুতে অভিযোগ কৰে যে বিভিন্ন চুলিৰ পেক ব্যৱহাৰ কৰাৰ পিছতো চুলি সৰা কমি নাযায়। বিশেষজ্ঞসকলৰ মতে, অত্যধিক চুলি সৰাৰ আঁৰত কিছু কাৰণ আছে।
থাইৰয়ড
চুলি সৰাৰ লগত জড়িত অন্যতম সাধাৰণ স্বাস্থ্যজনিত সমস্যা হ’ল থাইৰয়ড। বিশেষকৈ হাইপোথাইৰয়ডিজম আৰু হাইপাৰথাইৰয়ডিজম। চুলিৰ বৃদ্ধিকে ধৰি বিপাকীয় ক্ৰিয়া নিয়ন্ত্ৰণত থাইৰয়ড গ্ৰন্থিয়ে গুৰুত্বপূৰ্ণ ভূমিকা পালন কৰে। থাইৰয়ড হৰম’নৰ ভাৰসাম্যহীনতাই চুলিৰ বৃদ্ধিৰ স্বাভাৱিক পৰ্যায়ত ব্যাঘাত জন্মায়। ইয়াৰ ফলত অত্যধিক চুলি সৰা হয়।
পুষ্টিৰ অভাৱ
অত্যাৱশ্যকীয় পুষ্টিকৰ উপাদানৰ অভাৱ হোৱা খাদ্যই চুলিৰ শক্তি আৰু বৃদ্ধিত প্ৰভাৱ পেলাব পাৰে। চুলি সুস্থ কৰি ৰখাৰ বাবে ভিটামিন বি ১২, ভিটামিন ডি, আইৰণ, জিংক আদি গুৰুত্বপূৰ্ণ ভিটামিন আৰু খনিজ পদাৰ্থ অতি প্ৰয়োজনীয়। এই পুষ্টিকৰ উপাদানৰ অভাৱত চুলি পাতল হোৱা, চুলি সৰি পৰা সমস্যাৰ সৃষ্টি হয়।
মানসিক চাপ
মানসিক চাপ চুলি সৰাৰ এটা কাৰণ। যেতিয়া শৰীৰে শাৰীৰিক বা আৱেগিক মানসিক চাপৰ সন্মুখীন হয়, তেতিয়া ইয়াৰ ফলত টেল’জেন এফ্লুভিয়াম নামৰ অৱস্থাৰ সৃষ্টি হ’ব পাৰে।
হৰম’নৰ ভাৰসাম্যহীনতা
হৰম’নৰ উঠা-নমা চুলি সৰাত প্ৰভাৱ পেলোৱা আন এটা গুৰুত্বপূৰ্ণ কাৰক। বিশেষকৈ মহিলাৰ বাবে। পলিচিষ্টিক অভাৰী চিনড্ৰম (PCOS)ৰ দৰে অৱস্থাৰ ফলত পুৰুষ হৰম’ন এণ্ড্ৰজেনৰ অতিৰিক্ত উৎপাদনৰ পিনে আগবাঢ়ে।
এলোপেচিয়া এৰিয়েটা
অটোইম্যুউন ৰোগ যেনে এলোপেচিয়া এৰিয়েটা ৰোগৰ ফলত চুলি নোহোৱা টাক পৰা আৰু ব্যাপকভাৱে চুলি সৰাৰ সমস্যা হ’ব পাৰে।
ৰক্তহীনতা
চুলি সৰাৰ লগত জড়িত আন এটা অৱস্থা হ’ল আইৰণৰ অভাৱত হোৱা ৰক্তকণিকা অভাৱজনিত ৰক্তহীনতা। লোহিত ৰক্তকণিকাৰ সংখ্যা কমি গ’লে মূৰৰ ছালত অক্সিজেনৰ যোগান কমি যায়। ইয়াৰ ফলত চুলি সৰা সমস্যা হয়।
কিছুমান ঔষধ
কৰ্কট ৰোগৰ চিকিৎসাত ব্যৱহৃত কিছুমান ঔষধ, কিছুমান প্ৰকাৰৰ বাতবিষ, বিষণ্ণতাৰ ঔষধ, তেজ পাতল কৰা ঔষধ, কিছুমান এন্টিবায়টিক, এন্টিফাংগেল ঔষধেও চুলি সৰাৰ কাৰণ হ’ব পাৰে।
