দেওবাৰে প্ৰধানমন্ত্ৰী নৰেন্দ্ৰ মোদীয়ে ঘোষণা কৰিছে যে আজিৰে পৰা অৰ্থাৎ ২২ ছেপ্টেম্বৰৰ পৰা দেশত আৰম্ভ হ’ব ‘সঞ্চয় উৎসৱ’। আজিৰ পৰাই জি এছ টি ২.০ কাৰ্যকৰী হ’ব। পাকঘৰৰ প্ৰয়োজনীয় সামগ্ৰীৰ পৰা আৰম্ভ কৰি ইলেক্ট্ৰনিকছ, ঔষধ আৰু অটোম’বাইললৈকে বহু সামগ্ৰী সস্তা হ’ব। জি এছ টি সংস্কাৰৰ অংশ হিচাপে প্ৰায় ৩৭৫ টা বস্তুৰ ওপৰত কম জি এছ টি হাৰ ৰূপায়ণ কৰা হৈছে। তালিকাত কোনবোৰ বস্তু আছে জানি লও আহক।
কেন্দ্ৰীয় বিত্তমন্ত্ৰী নিৰ্মলা সীতাৰমনে কয়- জি এছ টি পৰিষদে চাৰিটা জি এছ টি স্লেব (৫%, ১২%, ১৮% আৰু ২৮%) আঁতৰাই দুটা স্তৰৰ কাঠামো (৫% আৰু ১৮%) অনুমোদন জনাইছে। য’ত চিগাৰেট, ধঁপাত আৰু মদৰ দৰে কেইবাটাও ক্ষতিকাৰক সামগ্ৰীৰ ওপৰত ৪০% কৰ আৰোপ কৰাৰ প্ৰস্তাৱ দিয়া হৈছে।
এই নতুন জি এছ টি গাঁথনি সন্দৰ্ভত প্ৰধানমন্ত্ৰী মোদীয়ে কয়, ফলস্বৰূপে অত্যাৱশ্যকীয় সামগ্ৰী সস্তা হ’ব আৰু অৰ্থনীতি শক্তিশালী হ’ব। জি এছ টি ২.০ৰ অধীনত কোনবোৰ সামগ্ৰী সস্তা হ’ব?
আজিৰে পৰা অটোম’বাইল, ইলেক্ট্ৰনিকছ, পাকঘৰৰ প্ৰয়োজনীয় সামগ্ৰী আৰু ঔষধকে ধৰি ৩৭৫টাতকৈও অধিক সামগ্ৰী সস্তা হ’ব। এই তালিকাখন চাওঁক:
১) গাখীৰ, কফি, কনডেন্সড্ মিল্ক, বিস্কুট, মাখন, শস্যজাতীয় খাদ্য, কৰ্ণফ্লেক্স, ২০ লিটাৰ বটলত ভৰোৱা খোৱাপানী, শুকান ফল, ফলৰ পাল্প বা ফলৰ ৰস, ঘিউ, আইচক্ৰীম, জাম আৰু জেলী, কেচাপ, জলপান, পনিৰ, পেষ্ট্ৰি, চচ্চেজ আৰু মাংস আৰু নাৰিকল পানীৰ দাম হ্ৰাস পোৱা দেখা যাব।
২) তদুপৰি, আফটাৰ শ্বেভ লোচন, ফেচ ক্ৰীম, ফেচ পাউদাৰ, চুলিত লগোৱা তেল, চেম্পু, শ্বেভিং ক্ৰীম, টেলকম পাউদাৰ, টুথব্ৰাছ আৰু টয়লেটৰ চাবোন বাৰৰ দাম হ্ৰাস পোৱা দেখা যাব পাৰে।
৩) ইলেক্ট্ৰনিকছ শিতানত এয়াৰ কণ্ডিচনাৰ (এচি), ডিচৱাছাৰ, টেলিভিছন (টিভি) আৰু ৱাশ্বিং মেচিনৰ দাম হ্ৰাস পাব।
৪) সাধাৰণ মানুহৰ বাবে ঔষধৰ দামও কমিব। ডায়েগনষ্টিক কিট আৰু গ্লুক’মিটাৰৰ দৰে চিকিৎসা সঁজুলিৰ জি এছ টি ৫%লৈ হ্ৰাস কৰা হৈছে, যাৰ ফলত মূল্যও হ্ৰাস পাব পাৰে। প্ৰতিবেদন অনুসৰি জিএছটি সংস্কাৰৰ সৌজন্যত ইতিমধ্যে চৰকাৰে ফাৰ্মাচীসমূহক এম আৰ পি সলনি কৰিবলৈ বা কম দামত ঔষধ বিক্ৰী কৰিবলৈ নিৰ্দেশ দিছে।
৫) জি এছ টি হ্ৰাস কৰা হৈছে চেলুন, ফিটনেছ চেণ্টাৰ, ফিটনেছ ক্লাব, চেলুন আৰু যোগাসনৰ দৰে শাৰীৰিক আৰু সুস্থতা সেৱাৰ ওপৰতো, যাৰ ফলত মানুহ উপকৃত হ’ব পাৰে।
৬) চিমেণ্টৰ জি এছ টি ২৮%ৰ পৰা ১৮%লৈ হ্ৰাস কৰা হৈছে, যাৰ ফলত ঘৰৰ মূল্য হ্ৰাস পোৱাৰ সম্ভাৱনা আছে। ইয়াৰ ফলত ৰিয়েল এষ্টেট খণ্ডত উত্থান ঘটিব বুলি আশা কৰা হৈছে। জি এছ টি সংস্কাৰৰ সৰ্বাধিক লাভৱান হৈছে অটো খণ্ড, য’ত চেছকে ধৰি কৰ ৩৫-৫০%ৰ পৰা ৪০%লৈ হ্ৰাস কৰা হৈছে।
উল্লেখযোগ্য যে জি এছ টি ৰেট কৰ্তনৰ ঘোষণাৰ পিছত আমুল, এইচ ইউ এল, ল’ৰিয়েল, হিমালয়কে ধৰি কেইবাটাও ব্ৰেণ্ডে নিজৰ সামগ্ৰীৰ মূল্য হ্ৰাসৰ কথা ঘোষণা কৰিছে। অটো ব্ৰেণ্ডসমূহেও ২০২৫ চনৰ ২২ ছেপ্টেম্বৰৰ পৰা কাৰ্যকৰী হোৱা হাৰ হ্ৰাস কৰিবলৈ পিছ পৰি থকা নাই।
