আয়কৰ হ’ল কোনো ব্যক্তি বা প্ৰতিষ্ঠানে চৰকাৰক দিয়া বাৰ্ষিক কৰ। কিছুমান চৰ্ত পূৰণ হ’লে বা লেনদেন সম্পূৰ্ণ হ’লে চৰকাৰক এই কৰ দিব লাগে। কাৰণ আইন অনুসৰি আপোনাৰ ব্যৱসায়, চাকৰি বা আন যিকোনো ক্ষেত্ৰৰ পৰা পোৱা আয়ৰ কিছু অংশ প্ৰতি বছৰে চৰকাৰক কৰ হিচাপে দিব লাগে।
চাকৰিৰ পৰা পোৱা দৰমহা, ব্যৱসায় বা পেছাৰ পৰা লাভ, ঘৰৰ ভাড়াৰ পৰা অহা ধন, বেংকত জমা ধনৰ সুত, মাটি বা শ্বেয়াৰ বিক্ৰীৰ পৰা পোৱা লাভ, এই সকলোবোৰ আয়ৰ পৰিসৰত অন্তৰ্ভুক্ত কৰা হৈছে।
কোনবোৰ ক্ষেত্ৰত কৰ ৰেহাই দিয়া হয়?
চৰকাৰৰ হিচাপ অনুসৰি যিসকলৰ বাৰ্ষিক আয় ৪ লাখ টকাতকৈ কম বা সমান হয় তেওঁলোকে আয়কৰ দিব নালাগে। অৱশ্যে কথাটো সদায় একে নাথাকে। কিছুমান ক্ষেত্ৰত আয় ৪ লাখ টকাতকৈ কম হ’লেও কিছুমান চৰ্ত বা লেনদেন পূৰণ হ’লেই আয়কৰ দিব লাগে। কাৰণ, চৰকাৰে প্ৰতি বছৰে এক নিৰ্দিষ্ট পৰিমাণৰ ধন পৰ্যন্ত আয়কৰ ৰেহাই দিয়ে।
কোনবোৰ ক্ষেত্ৰত আয়কৰ পৰিশোধ কৰাটো বাধ্যতামূলক?
ভাৰতীয় আয়কৰ আইন অনুসৰি আয় কৰ ৰেহাই হ’লেও বেংক একাউণ্টত বাৰ্ষিক লেনদেন ১ কোটিতকৈ অধিক হয় বা চেভিংছ একাউণ্টত ৫০ লাখতকৈ অধিক টকা জমা হ’লেও চৰকাৰক কৰ দিব লাগে। এই ক্ষেত্ৰত আইটিআৰ দাখিল কৰাটো বাধ্যতামূলক।
বিদেশ ভ্ৰমণত আয়কৰ দিব লাগে নেকি?
যদি কোনো ভাৰতীয় নাগৰিকে বিদেশ ভ্ৰমণত ২ লাখতকৈ অধিক টকা খৰচ কৰে, তেন্তে তেওঁ আই টি আৰ দাখিল কৰিব লাগিব। চৰকাৰে লগতে কৈছে যে যদি কোনো ব্যক্তিৰ প্ৰতিষ্ঠান বা ঘৰৰ বিদ্যুতৰ বিল বছৰি ১ লাখ টকাৰ অধিক হয় তেন্তে আই টি আৰ দাখিল কৰাটো বাধ্যতামূলক।
আয় কম হ’লেও আইটিআৰ বাধ্যতামূলক কিয়?
আয় কম হ’লেও কেইবাটাও ক্ষেত্ৰত আইটিআৰ বাধ্যতামূলক। উদাহৰণস্বৰূপে, দৰমহাৰ পৰা কৰ্তন কৰা টিডিএছৰ ৰিটাৰ্ণ পাবলৈ। আপোনাৰ চৰকাৰী নথি-পত্ৰ সংৰক্ষণ কৰিবলৈ। আৰু ব্যৱসায় এটাৰ লাভ-লোকচান বা মূলধনী লোকচানৰ হিচাপ ৰাখিবলৈ আইটিআৰ দাখিল কৰাটোও বাধ্যতামূলক বুলি গণ্য কৰা হয়।
আয়কৰ দাখিল নকৰিলে কি কি অসুবিধাৰ সন্মুখীন হ’ব?
আয়কৰ আইন অনুসৰি যদি কোনো ব্যক্তিয়ে নিজৰ মূলধনৰ পৰা চৰকাৰক নিৰ্দিষ্ট পৰিমাণৰ কৰ নিদিয়ে তেন্তে কেইবাটাও ক্ষেত্ৰত সমস্যাৰ সৃষ্টি হ’ব পাৰে। যদি কোনো ব্যক্তিয়ে চৰকাৰক কৰ ফাঁকি দিয়ে, তেন্তে ২৩৪এফ ধাৰা অনুসৰি সৰ্বাধিক ৫,০০০ টকা জৰিমনা বিহা হ’ব পাৰে। যদি মুঠ আয় ৫ লাখ পৰ্যন্ত হয় তেন্তে ১০০০ টকালৈকে জৰিমনা সীমিত হ’ব পাৰে।
ইয়াৰ লগতে টিডিএছৰ ধন পোৱাত সমস্যা হ’ব পাৰে বা ব্যক্তিজনে ভৱিষ্যতে ব্যৱসায় বা মূলধনী লোকচানৰ সালসলনিৰ সুবিধা হেৰুৱাব পাৰে। সেইদৰে. গৃহ ঋণ, ভিছাৰ আবেদন (কিছুমান ক্ষেত্ৰত), শিক্ষাৰ ঋণ লোৱাত সমস্যা হ’ব পাৰে।
