দেওবাৰে উত্তৰ বঙাইগাঁও ষ্টেডিয়ামত প্ৰায় ৫০ হাজাৰ কোচ ৰাজবংশী সম্প্ৰদায়ৰ লোকে এক বৃহৎ প্ৰতিবাদী কাৰ্যসূচী গ্ৰহণ কৰে। সদৌ কোচ ৰাজবংশী ছাত্ৰ সন্থাৰ (আক্ৰাছু) উদ্যোগত আয়োজিত এই প্ৰতিবাদী সভাত নতুন কমতাপুৰ ৰাজ্য গঠন, অনুসূচীত জনজাতি (এছ টি) হিচাপে আনুষ্ঠানিক স্বীকৃতি, কমতাপুৰ মুক্তি সংগঠন (কে এল অ‘) ৰ সৈতে শান্তি চুক্তি আদি দীৰ্ঘদিনীয়া দাবীসমূহৰ ওপৰত আলোকপাত কৰা হয়।
বিভিন্ন কোচ ৰাজবংশী গোটৰ নেতাই এই বৃহৎ সমাৱেশত ভাষণ প্ৰদান কৰি কয় যে কেন্দ্ৰীয় আৰু অসম ৰাজ্য চৰকাৰে অসংখ্য প্ৰতিশ্ৰুতি প্ৰদান কৰাৰ পিছতো তেওঁলোকৰ প্ৰয়োজনীয়তাক আওকাণ কৰা বুলি অভিযোগ উত্থাপন কৰে।
ভাষণ প্ৰসংগত নেতা বৰ্মনে চৰকাৰক সকীয়াই দি কয় যে, “আমাৰ ধৈৰ্য্য শেষ হৈ গৈ আছে। ২০২৬ চনৰ নিৰ্বাচনৰ পূৰ্বে যদি চৰকাৰে আমাৰ সম্প্ৰদায়ক স্বীকৃতি নিদিয়ে, তেন্তে এই চৰকাৰখনক উফৰাই পেলোৱাৰ বাহিৰে আমাৰ হাতত আন উপায় নাথাকিব। বাৰে বাৰে আলোচনা হোৱাৰ পিছতো কোনো সুনিৰ্দিষ্ট ব্যৱস্থা গ্ৰহণ কৰা হোৱা নাই। আমাৰ সংস্কৃতি, ভাষা, ভূমি ৰক্ষাৰ বাবে চৰকাৰে তাৎক্ষণিক ব্যৱস্থা ল‘ব লাগিব।”
সাংবাদিকৰ সৈতে হোৱা কথা-বতৰাত আক্ৰাছুৰ কেন্দ্ৰীয় সভাপতি গৰাকীয়ে কয় যে চৰকাৰে ক্ষমতালৈ অহাৰ পূৰ্বে ছয় জনগোষ্ঠীক অনুসূচিত জনজাতিৰ মৰ্যাদা প্ৰদান কৰাৰ প্ৰতিশ্ৰুতি দিছিল, কিন্তু তাৰ পিছৰ পৰাই আমাৰ দাবীক আওকাণ কৰিছে।
যদি চৰকাৰে ২৫ নৱেম্বৰৰ ভিতৰত একো ব্যৱস্থা গ্ৰহণ নকৰে, তেন্তে আমি ৰে‘ল আৰু ঘাইপথ অৱৰোধ কৰি আমাৰ আন্দোলন তীব্ৰতৰ কৰিম, আৰু প্ৰয়োজন হ‘লে আনকি অসম বন্ধৰ আহ্বানো কৰিব বুলি উল্লেখ কৰে। আৰু কয় যে এয়া কেৱল দাবী নহয়, এয়া আমাৰ অস্তিত্ব আৰু পৰিচয়ৰ বাবে এক আন্দোলন বুলি মত পোষণ কৰে।
নেতাসকলে স্থানীয় কৰ্তৃপক্ষক স্মাৰক পত্ৰ প্ৰেৰণ কৰি অসম আৰু কেন্দ্ৰীয় চৰকাৰক অনুসূচিত জনজাতিৰ মৰ্যাদা প্ৰদানৰ ক্ষেত্ৰত ক্ষিপ্ৰতা অনা, কমতাপুৰ পুনৰ সংগঠিত কৰা, আৰু কে এল অ‘ৰ সৈতে শান্তি আলোচনা আৰম্ভ কৰিবলৈ আহ্বান জনায়।
