ম’টেৰাৰ অন্তিমখন টেষ্টত ইংলেণ্ডক এক ইনিংছ আৰু ২৫ৰাণত পৰাজিত কৰি ভাৰতে ৩-১ব্যৱধানত ছিৰিজটো হস্তগত কৰে। এই সূত্ৰে টীম ইণ্ডিয়াই নিউজিলেণ্ডক অঁতৰাই টেষ্ট চেম্পিয়নশ্বিপৰ তালিকাৰ শীৰ্ষত স্থান লাভ কৰিছে।
টীম ইণ্ডিয়াই এইদৰে বিশ্ব টেষ্ট চেম্পিয়নশ্বিপৰ ফাইনেল খেলাৰো যোগ্যতা অৰ্জন কৰিলে।
ৰুট বাহিনীৰ বিৰুদ্ধে ছিৰিজ বিজয়ত দলগতভাৱে ভাৰত লাভৱান হোৱাৰ সমান্তৰালকৈ ব্যক্তিগতভাৱে বিৰাট কোহলিয়েও কেইবাটাও অভিলেখ গঢ়ে। এই ছিৰিজ জয়ৰ সূত্ৰে কোহলিয়ে অধিনায়ক হিচাপে একাধিক অবিলেখ ভংগ কৰিবলৈ সক্ষম হয়।
ভাৰতক আটাইতকৈ অধিক টেষ্টত নেতৃত্ব দিয়াৰ ক্ষেত্ৰত মহেন্দ্ৰ সিং ধোনাৰ অভিলেখ স্পৰ্শ কৰে কোহলিয়ে। ধোনা আৰু কোহলি দুয়োজনে টীম ইণ্ডিয়াক ৬০খনকৈ টেষ্টত নেতৃত্ব দিছে।
অধিনায়ক হিচাপে ঘৰুৱা খেলপথাৰত আটাইকৈ অধিক টেষ্টত বিজয়ৰ ক্ষেত্ৰত ষ্টিভ ৱ’ক অতিক্ৰম কৰে কোহলিয়ে। নিজৰ দেশত কোহলিয়ে মুঠতে অধিনায়ক হিচাপে ২৩খন টেষ্টত জয়লাভ কৰে। ষ্টিভ ৱ’ৰ নেতৃত্বত অষ্ট্ৰেলিয়াই দেশৰ মাটিত মুঠ ২২খন টেষ্টত জয়লাভ কৰিছিল। ভাৰতীয়সকলৰ ভিতৰত ঘৰৰ মাটিত সৰ্বাধিক টেষ্ট বিজয়ৰ ধোনীৰ ৰেকৰ্ড (২১খন) আগৰ মেচখনতে বিৰাটে অতিক্ৰম কৰিছিল।
দেশৰ খেলপথাৰত কোহলিৰ নেতৃত্বত একেৰাহে ১০খন টেষ্টত বিজয়ী হৈছে ভাৰত। এইক্ষেত্ৰত কোহলিয়ে ৰিকি পন্টিঙৰ সৰ্বকালৰ ৰেকৰ্ড স্পৰ্শ কৰিছে। পন্টিঙেও ঘৰুৱা খেলপথাৰত নেতৃত্ব দি একেৰাহে ১০খন টেষ্টত বিজয় সাৱ্যস্ত কৰিছিল।
সামগ্ৰিকভাৱে টেষ্ট ইতিহাসত আটাইতকৈ বেছি মেচত জয়লাব কৰা অধিনায়কসকলৰ তালিকাত কিংবদন্তি ক্লাইভ লয়ডৰ ৰেকৰ্ড স্পৰ্শ কৰে কোহলিয়ে। কোহলিৰ নেতৃত্বত ভাৰতে ৩৬খন টেষ্টত বিজয়ী হৈছে। সেইদৰে ক্লাইভ লয়ডৰ নেতৃত্বতো ৱেষ্ট ইণ্ডিজে ৩৬খন মেচত জয়ী হৈছিল। দুয়োজনে যৌথভাৱে আটাইতকৈ বেছি টেষ্ট বিজয়ী অধিনায়কৰ তালিকাত চতুৰ্থ স্থানত আছে। এইক্ষেত্ৰত তেওঁলোকৰ আগত আছে গ্ৰেম স্মিথ (৫৩), ৰিকি পন্টিং(৪৮) আৰু ষ্টিভ ৱ’(৪১।
আনহাতে, আটাইতকৈ বেছি টেষ্টত নেতৃত্ব দিয়াৰ ক্ষেত্ৰত কোহলি আৰু ধোনী যৌথভাৱে ষষ্ঠ স্থানত আছে। এই তালিকাত তেওঁলোকতকৈ আগত আছে গেম স্মিথ (১০৯), এলেন বৰ্ডাৰ(৯৩), ষ্টিফেন ফ্লেমিং(৮০), ৰিকি পন্টিং(৭৭) আৰু ক্লাইভ লয়ড(৭৪)।