মেঘালয়ৰ ৰাজধানী শ্বিলঙত খাচী ষ্টুডেণ্টছ ইউনিয়নৰ বাইক ৰেলীয়ে বুধবাৰে হিংসাত্মক ৰূপ ধাৰণ কৰে। ৰেলীৰ সময়ত বিভিন্ন স্থানত পথচাৰীক আক্ৰমণ কৰাৰ অভিযোগ উত্থাপিত হোৱাৰ লগতে কেইবাখনো চৰকাৰী যান-বাহন জ্বলাই দিয়া হয়। ঘটনাক কেন্দ্ৰ কৰি শ্বিলং চহৰত উত্তেজনা বৃদ্ধি পাইছে।
আৰক্ষীৰ তথ্য অনুসৰি, ৰেলীৰ মাজতে শ্বিলঙৰ বিভিন্ন পথত যান-বাহনত আক্ৰমণ সংঘটিত হয়। দুখন চৰকাৰী বাহনত অগ্নিসংযোগ কৰা হয়। ইয়াৰ উপৰি পি আৰ কলনিত থকা নেতাজী সুভাষচন্দ্ৰ বসুৰ আবক্ষ মূৰ্তি আৰু স্বামী বিবেকানন্দৰ মূৰ্তি থকা কাঁচৰ কেছটোও ভাঙি পেলোৱাৰ অভিযোগ উঠিছে।
পাঁচটা দাবীৰে এই ৰেলী আয়োজন কৰা হৈছিল। সংগঠনটোৱে চৰকাৰক ১৫ দিনৰ সময়সীমা দি দাবীসমূহ পূৰণ কৰাৰ দাবী জনাইছিল। দাবী পূৰণ নোহোৱাৰ পিছতে শ্বিলঙত ক’লা পতাকা বাইক ৰেলীৰ কাৰ্যসূচী ঘোষণা কৰা হৈছিল।
দাবীসমূহৰ ভিতৰত Meghalaya Residents Safety and Security Act, 2016 সম্পূৰ্ণৰূপে কাৰ্যকৰী কৰা, Meghalaya Public Service Commission আৰু District Selection Committee-ৰ নিযুক্তি প্ৰক্ৰিয়াত সংস্কাৰ, অভিবাসী শ্ৰমিক সম্পৰ্কীয় আইন কাৰ্যকৰী কৰা, NEIGRIHMS-ত নাৰ্ছ নিযুক্তিৰ নিয়ম সলনি কৰা আৰু Grade B, C আৰু D পদৰ নিযুক্তিত সাক্ষাৎকাৰ প্ৰথা উঠাই দিয়াৰ দাবী অন্যতম।
ইয়াৰ লগতে পূ জয়ন্তীয়া পাহাৰত শ্ৰী চিমেন্টৰ প্ৰস্তাৱিত চূণশিল খনন প্ৰকল্পক লৈ ৩১ জুলাইত অনুষ্ঠিত ৰাজহুৱা শুনানিৰ প্ৰক্ৰিয়াক লৈও সংগঠনটোৱে আপত্তি কৰিছে। সংগঠনটোৱে শুনানিখন বাতিল ঘোষণা কৰাৰ লগতে সংশ্লিষ্ট আৰক্ষী বিষয়া আৰু মেঘালয় প্ৰদূষণ নিয়ন্ত্ৰণ বৰ্ডৰ বিষয়াসকলৰ বিৰুদ্ধে ব্যৱস্থা গ্ৰহণৰ দাবী জনাইছে।
ঘটনাৰ পিছত শ্বিলঙৰ বিভিন্ন স্থানত আৰক্ষী আৰু নিৰাপত্তা বাহিনী মোতায়েন কৰা হৈছে।
হিংসাৰ ঘটনাৰ মাজতে আন্দোলনৰ মূল দাবীসমূহৰ পৰা আঁতৰি গৈ হিংসাত্মক পৰিস্থিতি সৃষ্টিক লৈ নতুনকৈ প্ৰশ্ন উত্থাপন হৈছে।
