আগন্তুক বিধানসভা নিৰ্বাচনৰ পূৰ্বে মধ্য গুৱাহাটী সমষ্টিৰ প্ৰাৰ্থী কুংকি চৌধুৰীলৈ সদৌ বিটিচি বাঙালি যুৱ ছাত্ৰ ফেডাৰেচনৰ কেন্দ্ৰীয় সমিতিয়ে আনুষ্ঠানিকভাৱে নৈতিক সমৰ্থন আগবঢ়াইছে। দেওবাৰে এক বিবৃতিযোগে সংগঠনটোৱে উচ্চশিক্ষিত আৰু নৱপ্ৰজন্মৰ প্ৰতিনিধি হিচাপে চৌধুৰীক বিধানসভালৈ নিৰ্বাচিত কৰাৰ প্ৰয়োজনীয়তাৰ ওপৰত বিশেষ গুৰুত্ব আৰোপ কৰিছে। নিৰ্বাচনৰ প্ৰাকক্ষণত ছাত্ৰ সংগঠনটোৰ এই সমৰ্থনে প্ৰাৰ্থীগৰাকীৰ নিৰ্বাচনী প্ৰচাৰ অভিযানলৈ এক নতুন গতি কঢ়িয়াই আনিছে।
এগৰাকী শিক্ষিত যুৱতী হিচাপে কুংকি চৌধুৰীয়ে সক্ৰিয় ৰাজনীতিত অংশগ্ৰহণ কৰা কাৰ্যক সংগঠনটোৱে আদৰণি জনাইছে। এই সন্দৰ্ভত ফেডাৰেচনৰ কেন্দ্ৰীয় সমিতিৰ সম্পাদক শুভ মজুমদাৰে কয় যে কুংকিৰ দৰে এগৰাকী উচ্চশিক্ষিত যুৱতীয়ে নিৰ্বাচনত প্ৰতিদ্বন্দ্বিতা কৰাটো গণতন্ত্ৰৰ বাবে এক অতি শুভ লক্ষণ। তেওঁ লগতে উল্লেখ কৰে যে ছাত্ৰ সংগঠন হিচাপে তেওঁলোকে যুৱ প্ৰজন্মৰ এই ৰাজনৈতিক সজাগতা আৰু নেতৃত্ব গ্ৰহণৰ প্ৰয়াসক পূৰ্ণ নৈতিক সমৰ্থন আগবঢ়াইছে।
মধ্য গুৱাহাটী সমষ্টিৰ সৰ্বাংগীণ উন্নয়নৰ স্বাৰ্থত ফেডাৰেচনে সমষ্টিটোৰ সমূহ ভোটাৰ, বিশেষকৈ বাঙালি ভোটাৰসকলক কুংকি চৌধুৰীৰ পক্ষত থিয় দিবলৈও আন্তৰিক আহ্বান জনাইছে। শিক্ষিত যুৱ শক্তিৰ হাতত নেতৃত্ব অৰ্পণ কৰিলে সমাজ তথা সমষ্টিৰ দ্ৰুত আৰু সামগ্ৰিক উন্নতি সম্ভৱ হ’ব বুলি সংগঠনটোৱে আশা প্ৰকাশ কৰিছে।
