বৰাক উপত্যকাৰ শিলচৰৰ নিচেই কাষত অৱস্থিত ডলু চাহ বাগিছাৰ মইনাগড় সংমণ্ডলত ৰাজ্য চৰকাৰে ৮০০ একৰতকৈ অধিক ভূমিত গ্ৰীণফিল্ড বিমান বন্দৰ নিৰ্মাণৰ বাবে যো-জা চলাইছে।
প্ৰাপ্ত তথ্য অনুসৰি মুখ্যমন্ত্ৰী ড০ হিমন্ত বিশ্ব শৰ্মা নেতৃত্বাধীন বিজেপি চৰকাৰে উক্ত ভূমিত বিমানবন্দৰ নিৰ্মাণ কৰিব বুলি কেন্দ্ৰলৈ ইতিমধ্যে প্ৰস্তাৱ প্ৰেৰণ কৰিছে।
ইয়াক লৈ তীব্ৰ অসন্তুষ্টি প্ৰকাশ কৰিছে বাগানত কৰ্মৰত দুই সহস্ৰাধিক শ্ৰমিকে। বাগানৰ মালিক আৰু কিছু সংগঠনে চৰকাৰৰ সৈতে মিলি চাহ বাগিছাৰ চাহ গছ থকা ভূমিত বিমান বন্দৰ নিৰ্মাণৰ ষড়যন্ত্ৰত লিপ্ত হোৱা বুলি গুৰুতৰ অভিযোগ তুলিছে বাগানত কৰ্মৰত শ্ৰমিকসকলে।
বিমান বন্দৰ নিৰ্মাণ হ’লে বাগানত কৰ্মৰত প্ৰায় দুহেজাৰ শ্ৰমিক কৰ্ম সংস্থাপন হেৰুওৱাৰ আশংকাত ভুগিছে। বাগান কতৃপক্ষই শ্ৰমিক সকলক ক্ষতিপূৰণ, বকেয়াৰ লগতে অন্য স্থানত সংস্থাপন দিয়া হ’ব বুলি আশ্বাস দিছে যদিও বৰ্তমানলৈকে তেওঁলোক সৈমান হোৱা নাই।
যোৱা ১৯ এপ্ৰিলত কাছাৰ জিলা প্ৰশাসন, ৰাজহ চক্ৰ বিষয়া, আৰক্ষী আৰু বাগানৰ মালিকে বিমান বন্দৰ নিৰ্মাণৰ বাবে সীমা নিৰ্দ্ধাৰণ কৰিবলৈ ডলু চাহ বাগিছাৰ মইনাগড় সংমণ্ডলত উপস্থিত হৈ সীমা নিৰ্দ্ধাৰণৰ বাবে খুঁটিও পুতিছিল।
তেনে সময়তে উক্ত স্থানত বাগানত কৰ্মৰত হাজাৰ হাজাৰ শ্ৰমিক উপস্থিত হৈ প্ৰতিবাদ সাব্যস্ত কৰে। বাগানৰ শ্ৰমিকসকলে তীব্ৰ প্ৰতিবাদ কৰাৰ ফলত উক্ত স্থানৰ পৰা প্ৰশাসনৰ লোক উভটি যাবলৈ বাধ্য হয়।
ইপিনে, চাহ বাগিছাৰ ভূমিৰ বিপৰীতে চাহগছ নথকা অন্য কোনো খালী স্থানতহে বিমানবন্দৰ স্থাপনৰ দাবী জনায়। প্ৰাপ্ত তথ্য অনুসৰি শিলচৰৰ কুম্ভীৰগ্ৰামত থকা বিমান বন্দৰৰ কাষৰীয়া অঞ্চলত চৰকাৰে ইচ্ছা কৰিলে সীমা বহলাব পাৰে যদিও সেয়া নকৰি বিমান বন্দৰৰ পৰা ১৫ কি:মি দূৰতহে গ্ৰীণফিল্ড বিমানবন্দৰ নিৰ্মাণৰ বাবে যো-জা কৰাত এতিয়া ক্ষোভিত হৈ পৰিছে শ্ৰমিকসকল।
চি আই টি ইউ, আই.এম.টি.এছ.ই, বি.এম.এছ নামৰ তিনিটা সংগঠন মইনাগড় সংমণ্ডলত বিমান বন্দৰ স্থাপনৰ ক্ষেত্ৰত প্ৰশাসনৰ পক্ষত থকা বুলি খবৰ ওলাইছে। ওপৰোক্ত সংগঠন কেইটাই শ্ৰমিকৰ বিপৰীতে মালিকৰ লগতহে সু-সম্পৰ্ক বজাই ৰাখে বুলি অভিযোগ উত্থাপিত হৈছে।
ইপিনে, অসম মজুৰি শ্ৰমিক ইউনিয়ন প্ৰতিবাদকাৰী চাহ শ্ৰমিকসকলৰ পক্ষত থকা বুলি জানিব পৰা গৈছে। তেওঁলোকেও ডলু চাহবাগিছাৰ মইনাগড় সংমণ্ডলৰ ভূমিত বিমানবন্দৰ স্থাপনৰ বিৰোধিতা কৰিছে।
প্ৰতিবাদকাৰী শ্ৰমিকসকলৰ দাবী মানি নল’লে তেওঁলোকে প্ৰতিবাদ অধিক উত্তপ্ত কৰাৰ হুংকাৰ দিছে।
