লখিমপুৰ জিলাৰ বঙালমৰাত পোহৰলৈ আহিছে শনিবাৰে নিশা সংঘটিত এক চাঞ্চল্যকৰ ঘটনা। এজন নকল সোণৰ বেপাৰীক কৰায়ত্ত কৰিবলৈ যোৱা আৰক্ষীৰ এটা দলৰ ওপৰত শতাধিক লোকে আক্ৰমণ চলাই অভিযুক্তজনক পলুৱাই নিয়ে। এই আক্ৰমণত কেইবাজনো আৰক্ষী বিষয়াৰ লগতে আৰক্ষীৰ বাহনখনৰ চালকজনো গুৰুতৰভাৱে আহত হয়।
ঘটনাটো বঙালমৰাৰ সোণাপুৰ ৰমজান তিনিআলিত সংঘটিত হয়। আৰক্ষী সূত্ৰ অনুসৰি, বাহাৰুল ওৰফে “আম্বানী” নামৰ এজন কুখ্যাত নকল সোণৰ বেপাৰীৰ উপস্থিতিৰ আগতীয়া খবৰ লাভ কৰাৰ পিছত বঙালমৰা আৰক্ষীয়ে তেওঁক কৰায়ত্ত কৰাৰ পৰিকল্পনা কৰে। অভিযুক্তজনে পলায়ন কৰিব পাৰে বুলি আশংকা কৰি আৰক্ষীয়ে সাধাৰণ পোছাকত ব্যক্তিগত বাহন (নম্বৰ AR-08-A-7192) ব্যৱহাৰ কৰি অভিযান চলাইছিল।
আৰক্ষীয়ে বাহাৰুলক আটক কৰাৰ কিছুক্ষণ পিছতেই হঠাতে শতাধিক লোক ঘটনাস্থলীত উপস্থিত হৈ আৰক্ষীৰ ওপৰত আক্ৰমণ চলায়। আক্ৰমণকাৰীসকলে আৰক্ষীক মাৰপিট কৰাৰ লগতে আৰক্ষীৰ ব্যৱহৃত বাহনখন ভাঙি পেলায় আৰু অভিযুক্তজনক পলুৱাই নিয়ে।
এই আক্ৰমণত বঙালমৰা আৰক্ষী চকীৰ এছআই গকুল জয়শ্ৰীসহ কেইবাজনো আৰক্ষী বিষমভাৱে আহত হয়। লগতে বাহনখনৰ চালকজনো গুৰুতৰভাৱে আহত হয়। তেওঁক প্ৰথমে বঙালমৰা প্ৰাথমিক চিকিৎসালয়ত ভৰ্তি কৰোৱা হয় আৰু অৱস্থাৰ অৱনতি ঘটাত নিশাই লখিমপুৰ মেডিকেল কলেজ আৰু হাস্পতাললৈ প্ৰেৰণ কৰা হয়।
ঘটনাৰ পাছত আৰক্ষীৰ আন এটা দল ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে যদিও তেতিয়ালৈ আক্ৰমণকাৰীসকল পলায়ন কৰিবলৈ সক্ষম হয়। আৰক্ষীয়ে ঘটনাৰ সন্দৰ্ভত তদন্ত আৰম্ভ কৰিছে আৰু জড়িত লোকসকলক চিনাক্ত কৰি গ্ৰেপ্তাৰৰ চেষ্টা অব্যাহত ৰাখিছে।
উল্লেখযোগ্য যে, বঙালমৰা অঞ্চলত দীৰ্ঘদিন ধৰি নকল সোণ, জালনোট আৰু ড্ৰাগছৰ দৰে অবৈধ ব্যৱসায় চলি আহিছে। পূৰ্বে এই ধৰণৰ অপৰাধ কিছু পৰিমাণে নিয়ন্ত্ৰণত আহিছিল যদিও সাম্প্ৰতিক সময়ত পুনৰ অপৰাধী চক্ৰ সক্ৰিয় হৈ উঠাৰ অভিযোগ উঠিছে।
